"ჩვენ ვართ, ვიყავით და ყოველთვის ვიქნებით კავკასიის კულტურულ-მეცნიერული კერა და ცენტრი"


Похожее изображениеსაქართველოს პრეზიდენტმა სალომე ზურაბიშვილმა ორბელიანების სასახლეში სამეცნიერო საზოგადოების წარმომადგენლებს უმასპინძლა და მათ სიტყვითაც მიმართა.

პრეზიდენტმა საქართველოსა და კავკასიის შესახებ ცოდნის შეგროვებისა და გავრცელების მნიშვნელობაზე ისაუბრა. სალომე ზურაბიშვილი ამბობს, რომ ქვეყნის შიგნით შენარჩუნებულია თვითმყოფადობა, მაგრამ გლობალიზაციის პერიოდში საქართველო დაიკარგა, მისი ხმა ისე აღარ ისმის, როგორც უნდა ისმოდეს და საჭიროა ამ ყველაფრის დაბრუნება.

„დღეს სწორედ გლობალიზაციის პერიოდში ვართ. ჩვენ არ შეიძლება, დავიკარგოთ, გვაქვს ძალიან დიდი კულტურული და მეცნიერული საუნჯე, რომელიც არა მარტო უნდა დავიცვათ, უნდა გავაძლიეროთ და გავიტანოთ. ყველა აქ მყოფი ადამიანი ამ ძალიან დიდი საქმის მონაწილე ხართ, და ჩვენ ჩვენი ძალები უნდა შევაერთოთ. არ შეიძლება, შემოვიფარგლოთ მხოლოდ საქართველოთი. ჩვენ ვართ, ვიყავით და  ყოველთვის ვიქნებით კავკასიის კულტურულ-მეცნიერული კერა და ცენტრი. ეს ჩვენ თავში უნდა დავიჯეროთ, ზოგჯერ ესეც გვავიწყდება. რატომღაც რაღაც დაკომპლექსებული ერი გავხდით, როცა უზარმაზარი შესაძლებლობები გვაქვს“, – აცხადებს საქართველოს პრეზიდენტი.

მისი აზრით, უცხოეთში უნდა აღდგეს ქართულ ენაზე პერიოდული გამოცემები, ასევე უნდა მოხდეს თანამედროვე ტექნოლოგიებისა და ონლაინ პლატფორმის ათვისება ამ პროცესში.

ამასთან, პრეზიდენტმა, აღნიშნა, რომ საზღვარგარეთ საქართველოს ბევრი სერიოზული მეცნიერი მოღვაწეობს და ამ პროცესში [ქართული კულტურის გატანაში] ისინიც უნდა იყვნენ ჩართული.

„ჩვენ სხვა არც ჯარი გვაქვს, არც იარაღი და არც გვექნება, არც ის დიდი ეკონომიკური პოტენციალი, რომ უცებ დავიპყროთ თუნდაც რეგიონი, მაგრამ გვაქვს ის უზარმაზარი, ძალიან ძლიერი იარაღი, რასაც ჰქვია ცოდნა, მეცნიერება, კულტურა“, – აცხადებს სალომე ზურაბიშვილი.

სამეცნიერო საზოგადოება საქართველოს აღმასრულებელ ხელისუფლებას მიმართავს, საქართველოსა და კავკასიის შემსწავლელი მეცნიერებების საკოორდინაციო ცენტრი დაფუძნდეს.

„სამეცნიერო საზოგადოება საქართველოს აღმასრულებელ ხელისუფლებას მივმართავთ თხოვნით, გლობალიზაციის ხანაში კავკასიური ენებისა და კულტურების გადასარჩენად, კავკასიისა და საქართველოს შესახებ მსოფლიო სამეცნიერო საზოგადოებისთვის კომპეტენტური ინფორმაციის მისაწოდებლად, საქართველოს კულტურული მრავალფეროვნების შესანარჩუნებლად დააფუძნოს „საქართველოს შემსწავლელი მეცნიერებების საკოორდინაციო ცენტრი“.

ცენტრი უზრუნველყოფს კოორდინაციას საქართველოს სამეცნიერო, საგანმანათლებლო და კვლევით ორგანიზაციებს შორის, რათა საქართველოს, კავკასიისა და ზოგადად, რეგიონის უსაფრთხოების, კულტურათა და რელიგიათა მშვიდობიანი თანაარსებობის ხელშეწყობისთვის მეცნიერულად იქნას შესწავლილი და საერთაშორისო საზოგადოებას მიეწოდოს ობიექტური ინფორმაცია საქართველოს, კავკასიისა და რეგიონის შესახებ“, – ნათქვამია საკოორდინაციო ცენტრის შექმნის მოთხოვნით გავრცელებულ განცხადებაში.

შეხვედრის ბოლოს, საქართველოსა და კავკასიის შემსწავლელი მეცნიერებების საკოორდინაციო ცენტრის დაფუძნების შესახებ დოკუმენტს ხელი მოეწერა.




"ბიძინა ივანიშვილი ყოველთვის სიმართლეს ამბობს"


Похожее изображениеსაქართველოს რეგიონული განვითარებისა და ინფრასტრუქტურის მინისტრ მაია ცქიტიშვილის განცხადებით, დარწმუნებულია, ყველა საქმე, რომელსაც პარტია „ქართული ოცნების“ თავმჯდომარე  ბიძინა ივანიშვილი ახორციელებს, კონკრეტული სოციალური ამოცანის შესრულებისკენაა მიმართული.

ამ კომენტარით მაია ცქიტიშვილმა ბიძინა ივანიშვილის მიერ, ინტერნეტჟურნალ „ველური ბუნებისთვის“ მიცემული ინტერვიუს შესახებ დასმულ კითხვას უპასუხა. საუბარია იმ ნაწილზე, სადაც ივანიშვილი ქვეყანაში ბოტანიკური და დენდროლოგიური პარკების განვითარებაში საკუთარ როლზე საუბრობს.

„როდესაც ჩვენ ვსაუბრობთ ხეების გადარგვაზე, ამ საკითხზე ძალიან ბევრი არაკეთილმოსურნე ცდილობდა, წარმოეჩინა ის მავნებლურად, დამანგრეველ საქმიანობად. ძალიან კარგად იცის იმ საზოგადოებამაც, სადაც ეს ყველაფერი შენდება, რომ სინამდვილეში ამ ხეების გადარგვა ხდებოდა, რათა გურიის რეგიონს კიდევ ერთი ღირსშესანიშნაობა შემატებოდა- დენდროლოგიური პარკი, რომლის ანალოგიც ჩვენს ქვეყანაში არ არის და რომელიც ძალიან მნიშვნელოვანი ადგილი იქნება ტურიზმისთვისაც, ამ რეგიონში კიდევ უფრო მეტი ტურისტის მოსაზიდად“ ,- განაცხადა მაია ცქიტიშვილმა.

კითხვაზე, ბიძინა ივანიშვილი ამბობს, რომ ხეები გადაშენებას გადაარჩინა, ცქიტიშვილმა ასე უპასუხა:

„რასაც ბიძინა ივანიშვილი ამბობს, ყოველთვის სიმართლეა. ასე რომ, შეგიძლიათ, მარტივად დაიჯეროთ“.




ბაგა–ბაღებისთვის 500 000-მდე ლარის ღირებულების სათამაშოები შეიძინეს


Картинки по запросу игрушки для детсадаთბილისის საბავშვო ბაგა-ბაღების მართვის სააგენტომ დედაქალაქში მოქმედი 181 ბაგა-ბაღისთვის ნახევარ მილიონამდე ლარის ღირებულების სათამაშოები შეისყიდა.

ტენდერის გზით სათამაშო ინვენტარის შეძენა თბილისში პირველად განხორციელდა, რადგან ჩვეულებრივ, საბავშვო ბაღები სათამაშოებს თავად აახლებენ.

თბილისის მერიის პრესსამსახურის ინფორმაციით, ბაგა-ბაღების მართვის სააგენტოს ხელმძღვანელი მოადგილესთან ერთად N73 და ბაგა-ბაღ „ხუთკუნჭულაში“ იმყოფებოდა. კახაბერ გვანცელაძემ შეძენილი სათამაშოები აღსაზრდელებთან ერთად დაათვალიერა.

„სათამაშოების შესყიდვისას გავითვალისწინეთ არსებული მეთოდოლოგიით განსაზღვრული თემატიკა და ასაკობრივი კატეგორიები. მნიშვნელოვანია, რომ შეძენილი ინვენტარი აკმაყოფილებს ევროკავშირის სტანდარტებს და ჯანმრთელობისათვის უსაფრთხო მასალით არის დამზადებული,“ – განაცხადა კახაბერ გვანცელაძემ.

მისივე თქმით, უახლოეს მომავალში საბავშვო ბაღებში ხის მასალისგან დამზადებული სათამაშოების შეტანაც დაიწყება.




ყალბი ფულის გასაღების ფაქტზე უცხო ქვეყნის ორი მოქალაქე დააკავეს


Картинки по запросу евроსაქართველოს ფინანსთა სამინისტროს საგამოძიებო სამსახურის თანამშრომლებმა დიდი ოდენობით ყალბი ფულის გასაღების ფაქტზე უცხო ქვეყნის ორი მოქალაქე დააკავეს.

საგამოძიებო სამსახურის ინფორმაციით, გამოძიებით დადგინდა, რომ ბრალდებულებმა, საქართველოში შემოიტანეს და ქვემო ქართლის რეგიონში გაასაღეს 20 ცალი ყალბი 500-ევროიანი კუპიურა.

„საგამოძიებო მოქმედებების შედეგად, ამოღებულია 10 000 ევროს ოდენობის ყალბი კუპიურა. გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას შვიდიდან 10 წლამდე ვადით“, – აღნიშნულია ინფორმაციაში.




"ნინო ბურჯანაძის ვიზიტი პასუხისმგებლიანი პოლიტიკოსის პოზიციაა"


Похожее изображениеრუსეთსა და საქართველოს შორის სავიზო რეჟიმის შემსუბუქების, შემდეგ კი მისი გაუქმების, ასევე ავიამიმოსვლის აღდგენის საკითხი სასწრაფოდ უნდა მოგვარდეს, – ეს განცხადება რუსეთის ფედერაციის საბჭოს საგარეო ურთიერთობათა კომიტეტის ხელმძღვანელმა, კონსტანტინ კოსაჩოვმა „დემოკრატიული მოძრაობის“ ლიდერ ნინო ბურჯანაძესთან შეხვედრის შემდეგ გააკეთა.

ინფორმაციას რუსული მედი ავრცელებს.

„არსებობს რამდენიმე პრაქტიკული საკითხი, რომელიც ჩვენს ყურადღებას და სწრაფ მოგვარებას საჭიროებს. ეს არის სავიზო პროცედურების შემსუბუქება და შემდგომ გაუქმება, ავიამიმოსვლის აღდგენა, საქონლის გარკვეულ სახეობებზე დაწესებული ტარიფების საკითხი. საერთო ჯამში, არსებობს კონკრეტული დღის წესრიგი, რომელზეც მსჯელობა მიმდინარეობს სხვადასხვა დონეზე და სხვადასხვა ფორმატში“, – განაცხადა კოსაჩოვმა.

რუსული მედიის ინფორმაციით, შეხვედრის დროს კოსაჩოვმა აღნიშნა, რომ საქართველო-რუსეთის ურთიერთობა ახლა ცუდ მდგომარეობაშია.

„თუმცა ჩვენ ყოველთვის ვთანხმდებით, რომ ჩვენი ერები აბსოლუტურად სხვა რამეს ელოდებიან. მთავრობამ, პარტიებმა და პოლიტიკოსებმა, რა თქმა უნდა, უნდა გაითვალისწინონ ეს საყოველთაო აზრი და ყველაფერი გააკეთონ, რომ ჩვენ ქვეყნებს შორის ურთიერთობა კვლავ ნორმალურ კურსს დაუბრუნდეს“, – განაცხადა კოსაჩოვმა.

მან მადლობა გადაუხადა ბურჯანაძეს პოლიტიკური და სამოქალაქო პოზიციისთვის.

„გვესმის ის ფაქტი, რომ ჩამოდიხართ რუსეთში და საქართველოში ხშირად ადეკვატურად არ აღიქმება, მაგრამ ეს არის პასუხისმგებლიანი პოლიტიკოსის პოზიცია, რომელიც საკუთარი ქვეყნის ინტერესებით მოქმედებს. ჩვენ ამას ძალიან ვაფასებთ“,- განაცხადა კოსაჩოვმა.

1tv.ge




ნოემბერში პური – 12%-ით, ხორცი – 13%-ით, ხილი – 30%–ით გაძვირდა


Похожее изображениеსტატისტიკის ეროვნულმა სამსახურმა ინფლაციის განახლებული მაჩვენებელი გამოაქვეყნა. დოკუმენტის მიხედვით, 2019 წლის ნოემბერში საქართველოში ფასების საერთო დონე 7%-ით გაიზარდა, რა ზომის ინფლაციაც ქვეყანაში 2017 წლის შემდგომ არ ყოფილა. 

საქსტატის მონაცემებით, ინფლაციის ზრდაზე ყველაზე დიდი გავლენა სურსათისა და უალკოჰოლო სასმელების გაძვირებამ გამოიწვია. ცალკეული სასაქონლო ჯგუფების მიხედვით ფასების მატება ასეთია:

სურსათი და უალკოჰოლო სასმელები: ჯგუფში ფასები გაიზარდა 13.4 პროცენტით, რაც წლიურ ინფლაციაზე 4.02 პროცენტული პუნქტით აისახა. ფასები მომატებულია შემდეგ ქვეჯგუფებზე: ხილი და ყურძენი (30.3 პროცენტი), ბოსტნეული და ბაღჩეული (16.2 პროცენტი), რძე, ყველი და კვერცხი (15.4 პროცენტი), თევზეული (14.5 პროცენტი), ხორცი და ხორცის პროდუქტები (13.1 პროცენტი), პური და პურპროდუქტები (11.9 პროცენტი), შაქარი, ჯემი და სხვა ტკბილეული (11.5 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (8.2 პროცენტი), ყავა, ჩაი და კაკაო (3.9 პროცენტი), ზეთი და ცხიმი (2.8 პროცენტი);

ალკოჰოლური სასმელები, თამბაქო: ფასები გაიზარდა 15.4 პროცენტით, რაც 1.03 პროცენტული პუნქტით აისახა წლიური ინფლაციის მთლიან მაჩვენებელზე. ფასები მომატებულია როგორც თამბაქოს ნაწარმზე (29.9 პროცენტი), ისე ალკოჰოლურ სასმელებზე (3.4 პროცენტი);

დასვენება, გართობა და კულტურა: ფასები გაზრდილია 7.0 პროცენტით, შესაბამისად, ჯგუფის წვლილმა წლიურ ინდექსში 0.4 პროცენტული პუნქტი შეადგინა. ფასები გაიზარდა დასვენების, გართობისა და კულტურის ხანგრძლივი მოხმარების სხვა საქონელზე (11.6 პროცენტი), ასევე გასართობ და კულტურულ მომსახურებაზე (1.6 პროცენტი);

ტრანსპორტი: ჯგუფში დაფიქსირდა ფასების 3.1 პროცენტიანი მატება, რაც 0.37 პროცენტული პუნქტით აისახა ინფლაციის მთლიან მაჩვენებელზე. ჯგუფში ფასები გაიზარდა სატრანსპორტო საშუალებების შეძენაზე (9.6 პროცენტი), სატრანსპორტო მომსახურებაზე (3.0 პროცენტი) და პირადი სატრანსპორტო საშუალებების ექსპლუატაციაზე (2.6 პროცენტი);

სასტუმროები, კაფეები და რესტორნები: ფასები მომატებულია 7.4 პროცენტით, რაც 0.32 პროცენტული პუნქტით აისახა მთლიანი ინდექსის ზრდაში. ფასები გაიზარდა საზოგადოებრივ კვებაზე (8.4 პროცენტი) და ღამის გასათევით მომსახურებაზე (1.0 პროცენტი).

bm.ge




“შეგვპირდნენ, რომ ვაჟა გაფრინდაშვილს გამოუშვებენ, ელოდებიან სასამართლოს გადაწყვეტილებას”


gomelauriშინაგან საქმეთა მინისტრი ვახტანგ გომელაური აცხადებს, რომ ოკუპირებული ცხინვალის სასამართლოს გადაწყვეტილებით, უკანონოდ დაკავებულ ექიმს, ვაჟა გაფრინდაშვილს გაათავისუფლებენ.

მისი თქმით, სიტუაციას შედარებით ამარტივებს ვაჟა გაფრინდაშვილის პროფესია, რადგან საერთაშორისო სამართლის ნორმებით, ექიმის დაკავება მიღებული არ არის.

“ჩვენ გვაქვს კონტაქტი. ჩართულია ყველა საერთაშორისო ორგანიზაცია. ხაზგასასმელია, რომ ეს ადამიანი არის ექიმი და არა მებრძოლი ან ყოფილი ძალოვანი სტრუქტურის წარმომადგენელი. მე ვფიქრობ, რომ ამ ადამიანს გამოუშვებენ. თვითონაც უხერხულად არიან, დარწმუნებულები ვართ. რაც უნდა ცხელი ომი იყოს, ექიმის დაკავება მსოფლიოში არსად არ შეიძლება და უშვებენ. აქედან გამომდინარე, შეგვპირდნენ და გამოუშვებენ, ელოდებიან სასამართლოს გადაწყვეტილებას“, – განაცხადა ვახტანგ გომელაურმა.

15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან.




ვაშაძე:"შეხვედრა უშედეგოდ დასრულდა... საპროტესტო აქციები გაგრძელდება"


Картинки по запросу გრიგოლ ვაშაძეიმის მიუხედავად, რომ შეხვედრა უშედეგოდ დასრულდა, ოპოზიცია მოლაპარაკებების გასაგრძელებლად მზად არის.  როგორც „ნაციონალური მოძრაობის“ წევრმა გრიგოლ ვაშაძემ განაცხადა, მართველი გუნდი შეხვედრაზე მხოლოდ იმიტომ მივიდა, რომ მოქალაქეების, ოპოზიციის და სტრატეგიული მოკავშირეების მხრიდან სტრესს გრძნობდა, თუმცა კატეგორიული უარი თქვა იმ კომპრომისული შეთავაზების, რომელმაც ოპოზიციამ მოამზადა და 150-მა პარტიამ მოაწერა ხელი. 

„ჩვენ დავადასტურეთ, რომ მიუხედავად იმისა, რომ ეს შეხვედრა უშედეგოდ დასრულდა, თუ ამას მოინდომებენ ჩვენი მედიატორები და სტრატეგიული პარტნიორები, ჩვენ მეორე რაუნდსაც დავესწრებით. არ მივცემთ არასოდეს ე.წ. „ქართულ ოცნებას“ და მართველ გუნდს იმის თქმის საშუალებას, რომ ოპოზიცია არ არის მზად საუბრისთვის.

ჩვენი სტრატეგიული მოკავშირეები არიან შუამავლები, ამიტომ მათ არ შეიძლება, ჰქონდეთ რამე შემოთავაზება გარდა იმისა, რომ ყველას სურს, საქართველოში იქნებ დამკვიდრდეს ნორმალური პოლიტიკური კულტურა, როდესაც იდეოლოგიური განსხვავებები არ არის სამკვდრო-სასიცოცხლო მტრობის მიზეზი.

რაც შეეხება სამართლებრივ არგუმენტებს, ეს არგუმენტები მოსმენილი გაქვთ არაერთხელ ირაკლი კობახიძისგან ტელევიზიის მეშვეობით, სადაც მთავარი არგუმენტია, რომ არ მომწონს და ეს არ არის კონსტიტუციური. ის, რომ მორალური და პოლიტიკური ვალდებულება ჰქონდათ აღებული პროპორციული არჩევნების ჩატარების, რასაც ახალგაზრდების ჯანმრთელობა და კინაღამ სიცოცხლე შეეწირა, ამაზე არ საუბრობენ; ის, რომ ოპოზიციამ წინმსწრებად გადადგა კომპრომისული ნაბიჯი – ვთქვით, რომ კარგი, ვერ გაიტანეთ ან თქვენ თვითონვე ჩააგდეთ კონსტიტუციის შესწორება და არ იქნება პროპორციული არჩევნები, აგერ გთავაზობთ კომპრომისულ წინადადებას, რომელსაც არ სჭირდება კონსტიტუციის გადახედვა და გადასწორება“, – განაცხადა ვაშაძემ.

ამასთან, მისი თქმით, საპროტესტო აქციები გაგრძელდება.

სასტუმრო „ბილტმორში“ „ქართული ოცნების“ და ოპოზიციური პარტიების წარმომადგენლების შეხვედრა დაახლოებით 6 საათს გაგრძელდა, რომელსაც ასევე  დიპლომატიური მისიების წარმომადგენლებიც ესწრებოდნენ.




ჰოლივუდის კინოსტუდიები საქართველოს სანქციებით ემუქრებიან


 Картинки по запросу hollywoodMotion Picture Association of America, რომელიც წარმოადგენს დისნეის , ვორნერ ბრაზერსს , უნივერსალ ფიქჩერსს, სონის, პარამაუნტ ფიქჩერსს, ნეტფლიქსსა და სხვა დიდ კინოსტუდიებს, შეშფოთებას გამოთქვამს საქართველოში არსებულ ინტერნეტსაიტებზე არალეგალური ფილმების ჩვენების გამო.

ორგანიზაციის პრეზიდენტმა და მმართველმა დირექტორმა, სტენ მაკკოიმ, წერილი მისწერა კომუნიკაციების კომისიის, საქპატენტისა და ინტერნეტმეკობრეობის წინააღმდეგ შექმნილ ასოციაციას. მეკობრეობის შემცირება ჩვენთვის მთავარ პრიორიტეტად რჩება და აღსრულება აუცილებელი და მნიშვნელოვანი ნაბიჯია ამ პრიორიტეტის მისაღწევად. საქართველოში adjaranet.com და imovies.cc უჩვენებენ MPA- ს წევრი კომპანიების ფილმებს მათი თანხმობის გარეშე, რაც მნიშვნელოვანი პრობლემაა, – ნათქვამია MPA-ს გამოგზავნილ წერილში.

ამ ფაქტს საგანგებო წერილით გამოეხმაურა კავეას კინოთეატრების ქსელი, სადაც აღნიშნულია, რომ მოპარული ფილმების გავრცელება და მოხმარება, ანუ ინტერნეტმეკობრეობა, ზიანს აყენებს და საფრთხეს უქმნის არა მხოლოდ ჰოლივუდის ფილმების ჩვენებას ქართველი მაყურებლისთვის, არამედ თავად ქართულ ფილმებსაც და მათ მწარმოებლებს როგორც ქვეყნის შიგნით, ისე ქვეყნის გარეთ.

ამერიკული კინოსტუდიები შეშფოთებას გამოთქვამენ საქართველოში ინტერნეტმეკობრეობის მიმართულებით არსებული მდგომარეობის გამო და პრობლემის მოუგვარებლობის შემთხვევაში სანქციების დაწესებას აპირებენ, რაც კინო და ტელე მსოფლიო პრემიერების დაგვიანებით ან, რიგ შემთხვევაში, მათი სრულად გაუქმებით იქნება გამოხატული.

კინოსტუდიები იმედოვნებენ, რომ, კომუნიკაციების კომისიის დახმარებით, ინტერნეტსივრცე მალე გათავისუფლდება არალეგალური, არაკანონიერი ფილმებისა და სერიალებისგან.




"საპრივატიზაციო პროექტის ფარგლებში არანაკლებ 100 ობიექტი იქნება გამოტანილი"


Картинки по запросу თურნავაპროექტის „100 საინვესტიციო შეთავაზება ბიზნესს“ ფარგლებში, ეკონომიკის სამინისტრო სულ მცირე, 200 მლნ ლარის ინვესტიციას ელოდება, – ამის შესახებ ეკონომიკისა და მდგრადი განვითარების მინისტრმა  ნათია თურნავამ განაცხადა.

მისი შეფასებით, აღნიშნული პროექტი, რომელიც უწყებამ ბიზნესს შესთავაზა, უპრეცედენტო ინიციატივაა. მინისტრი განმარტავს, რომ უახლოესი თვეების განმავლობაში გაიმართება 100 პარალელური ელექტრონული აუქციონი.

„საერთო ჯამში, აუქციონზე არანაკლებ 100 ობიექტი იქნება გამოტანილი. მთლიანობაში ეს არის, სულ მცირე,  150 მლნ ლარის საწყისი ღირებულების ობიექტები. ველოდებით აქედან ინვესტიციას ასევე სულ მცირე, 200 მლნ ლარის. რაც მთავარია, ამ ციფრების მიღმა დგას ახალი სამუშაო ადგილები, დაახლოებით 2 500 ახალი სამუშაო ადგილი შეიქმნება, როდესაც ეს ობიექტები ამოიყიდება და აშენდება სასტუმროები, ახალი საწარმოები, ფერმები თუ სხვადასხვა ობიექტი“, – განაცხადა მინისტრმა.

მისი თქმით, იმისთვის, რომ შემდეგ ბიზნესს პრობლემა არ შეექმნას და დროც არ დაიკარგოს, ყველაფერი წინასწარ არის მომზადებული, ობიექტები შეფასებულია, შეთანხმებულია ადგილობრივ მუნიციპალიტეტებთან, სხვადასხვა შესაბამის უწყებასთან.

„ასევე გვაქვს რეკომენდაციები, რა ტიპის ბიზნესი შეიძლება, კონკრეტულ ობიექტზე განვითარდეს. რა თქმა უნდა, ბიზნესს შეუძლია, შემდეგ შეცვალოს და თავისი შეხედულებით განავითაროს, მაგრამ პირველი ორიენტაციისთვის ეს არის ძალიან მნიშვნელოვანი, რადგან ეყრდნობა ანალიზს. ველოდებით, რომ ამ გზით, როგორც დავპირდით მოსახლეობას, ერთი ფანჯრის პრინციპით ავაწყობთ სერვისებს. ეს არის ზუსტად ამ ერთი ფანჯრის პრინციპის გამოხატულება და ამ გზით, ჩვენ კვლავაც მაღალ ეკონომიკურ ზრდას შევინარჩუნებთ“, – აღნიშნა მინისტრმა.

ნათია თურნავა ვარაუდობს, რომ აუქციონები უახლოესი 12 თვის განმავლობაში გაგრძელდება.

„რაც კი გვაქვს გაჩერებული და არ იყო აქამდე ჩართული ეკონომიკურ ბრუნვაში, ეტაპობრივად ყველაფერს შევთავაზებთ ინვესტორებს. გვინდა, ყველგან შეიქმნას მეურნეობები, საწარმოები, სასტუმროები და დასაქმდნენ ადამიანები“, – აღნიშნა ეკონომიკისა და მდგრადი განვითარების მინისტრმა.

ეკონომიკისა და მდგრადი განვითარების სამინისტრომ დღეს ბიზნესს 100-ზე მეტი საპრივატიზაციო ობიექტი წარუდგინა. პრივატიზებისთვის განკუთვნილი ობიექტების ნუსხა მოიცავს ქვეყნის მასშტაბით სახელმწიფოს საკუთრებაში არსებულ უძრავ ქონებას და მოიცავს თბილისსა და საქართველოს 45-მდე ქალაქსა და მუნიციპალიტეტს. საპრივატიზაციო ნუსხაშია სამრეწველო ობიექტები, სასაწყობე და სატბორე მეურნეობები, სამედიცინო დაწესებულებები, სპორტული ინფრასტრუქტურა, სასტუმროები და დეველოპერებისთვის საინტერესო სხვა სახელმწიფო ქონება.