"ნაციონალურ მოძრაობას" რაღაც გაუგებარ სექტას ვუწოდებ – ირაკლი ღარიბაშვილი


საქართველოს პრემიერ-მინისტრი ირაკლი ღარიბაშვილი “ნაციონალურ მოძრაობას” “სექტას” უწოდებს.
ამის შესახებ მან დღეს სასტუმრო “ჰოლიდეი ინში” განაცხადა.
“რა უნდა დაუპირისპიროს მთავრობამ და მოსახლეობამ სიცრუის კამპანიას?! – სიმართლე. ეს არის ჩემი პასუხი. ჩვენ უნდა დავუპირისპიროთ სიმართლე და მოსახლეობას უნდა განვუმარტოთ ის პროცესები, რაც ქვეყანაში მიმდინარეობს. “ნაციონალურ მოძრაობის” პოლიტიკა და მსოფლმხედველობა გაჯერებულია ტყუილით, აგრესიით, ძალადობით, სადიზმით, სისასტიკით. ეს არის “ნაციოანლური მოძრაობის” მთელი 9-წლიანი საქმიანობის მოკლე აღწერა. ის ფაქტი, რომ მათ გამართეს აქცია და მოითხოვეს საქართველოს აბსოლუტური უმრავლესობის მიერ არჩეული მთავრობის გადადგომა, ეს სასაცილოა და სერიოზულ კომენტარსაც ვერ გავაკეთებ. ეს არის კიდევ ერთხელ დემონსტრირება იმისა, რომ ეს ადამიანები არიან ჩამოყალიბებული რაღაც გაუგებარ, მე არ მინდა ეს სიტყვა ვიხმარო, მაგრამ სხვა ვერაფერს ვუწოდებ, თუ არა სექტას, რომლებიც არ არიან ორიენტირებული ქვეყნის განვითარებაზე. მათი ამოცანაა, დესტრუქცია და შფოთვა შემოიტანონ. მითუმეტეს ამის ყველა საშუალება აქვთ – აქვთ ყველაზე მძლავრი მედიასაშუალება და ჰყავთ დესტრუქციული ძალები, რომლებიც ცდილობენ კანონს გარეთ არეულობა შემოიტანონ მოსახლეობაში, მაგრამ სახელმწიფო მათ კანონის ფარგლებში ადეკვატურ პასუხს გასცემს. არავის არ ვურჩევ, არც “ნაციონალურ მოძრაობას”, ყველაზე დესტრუქციულ ძალას ქვეყანაში, რაიმე ფორმით, რაიმე სახით რაიმე დაგეგმოს. სახელმწიფო იქნება ძალიან დაუნდობელი კანონის ფარგლებში”, – განაცხადა ირაკლი ღარიბაშვილმა.
მისივე თქმით, “ნაციონალებს” ჰქონდათ უფლება, ჩაეტარებინათ ძალით და ფულით მოგროვილი ხალხით აქცია, თუმცა ამ ხალხმა უნდა გაიგოს, რომ “ნაციონალურ მოძრაობას” არავითარი შანსი არ აქვს, რომ რაიმე პროცესები შეაფერხოს“.

ღარიბაშვილის შეფასებით, „ეს იყო სასაცილო აქცია, სადაც თქვეს, რომ განაწყენდა თურმე 10 000 კაცი და მთავრობა უნდა გადადგეს“.




შიდა ქართლის გუბერნატორი " თრიალეთს" საჯარო ბოდიშის მოხდას სთხოვს


შიდა ქართლის გუბერნატორი ზურაბ რუსიშვილი ტელეკომპანია “თრიალეთს” მიზანმიმართულ დისკრედიტაციაში ადანაშაულებს და ამბობს, რომ კომპანიის ჟურნალისტები მის წინააღმდეგ არასწორ ინფორმაციებს ავრცელებენ.
რუსიშვილი “თრიალეთისგან” საჯაროდ ბოდიშის მოხდას მოითხოვს, წინაარმდეგ შემთხვევაში იგი კომპნაიის წინააღმდეგ სარჩელის მომზადებას გეგმავს.
გუბერნატორი იმასაც ამბობს, რომ “თრიალეთმა” მას შემდეგ დაიწყო შავი პიარი, რაც სახლემწიფო რწმუნებულის აპარატმა შეთავაზებულ სარეკლამო მოსახურეობის გაწევაზე უარი უთხრა. რუსიშვილმა განცხადების გაკეთების შემდეგ მისი ქონებრივი დეკლარაციაც გაასაჯაროვა.
ზურაბ რუსიშვილის განცხადებას წინ პრემიერ-მინისტრის პრესკონფერენციაზე “თრიალეთის” ჟურნალისტის კითხვა უძღვოდა, კომპანიის რეპორტიორმა პრემიერს უთხრა, რომ გუბერნატორი საქმის ნაცვლად რეგიონში ბიზნესის კეთებით არის დაკავებული და ვინ აკონტროლებს ამას.
ირაკლი ღარიბაშვილმა ჟურნალისტს უსაყვედურა და აღნიშნა, რომ თუ მის მიერ დასახელებული ფაქტებიდან არც ერთი დადასტურდება, საჯაროდ მოიხადოს ბოდიში, ხოლო თუ დადასტურდება, თავად პრემიერი მოახდენს რეაგირებას.




სააკაშვილი უკრაინის პრეზიდენტის არაფორმალური მრჩეველია – ღარიბაშვლი


პრემიერ-მინისტრი ირაკლი ღარიბაშვილი მიხეილ სააკაშვილს უკრაინის პრეზიდენტის არაფორმალურ მრჩეველს უწოდებს.
როგორც დღეს გამართულ პრესკონფერენციაზე ღარიბაშვილმა განაცხადა, ყოფილი მაღალჩინოსნების უკრაინის მთავრობაში დანიშვნის გამო აღტაცებული არ არის.
“გასაგებია, რომ არ ვართ აღტაცებული და ბედნიერი, რომ სააკაშვილი და სხვები არიან რაღაც სტატუსით იქ, თუნდაც არაფორმალურით. ვიცით, რომ სააკაშვილი არაფორმალური მრჩეველია. მე პრეზიდენტს ვუთხარი კიდეც, რომ ეს მოსახლეობისთვის არის უსიამოვნო. თუმცა ეს მათი არჩევანია. მათ სჭირდებათ ამ მდგომარეობაში ისინი. თუმცა ჩემი ვიზიტის გადადების მიზეზი არ არის ის ფაქტი რომ რამდენიმე ყოფილი მაღალჩინოსანი დაინიშნენ უკრაინის მთავრობაში”, – განაცხადა პრემიერმა.




"კვლევები დაემთხვა ლარის მძლავრ რყევის პერიოდს და რასაკვირველია, ამან ბევრ საკითხებზე გავლენა მოახდინა"


საპარლამენტო უმრავლესობის წევრი, გია ვოლსკი IRI-ის კვლევის მიხედვით, “ქართული ოცნების” მოწინავე პოზიციაზე ყოფნით კმაყოფილია, თუმცა ამავდროულად IRI-სა და NDI-ს მომკვლევ ორგანიზაციებს უნდობლობას უცხადებს.
მისი თქმით, კვლევები დაემთხვა ლარის რყევის პერიოდს და ამან შედეგებზე შესალოა გავლენა მოახდინა.
“მომკვლევმა ორგანიზაციებმა, ვინც ჩართულია IRI-ს თუ NDI-ს კვლევებში, მაინცდამაინც საზოგადოების დიდი სიმპათია და ნდობა ვერ დაიმსახურეს. მონაცემები, რომელსაც გუშინ გავეცანი, დაფიქრების საფუძველს იძლევა. “ქართული ოცნება” წინ არის და ეს მოსალოდნელი იყო. ნდობა მის მიმართ მაღალია და იმ პრობლემების შეფასება, რაც გუშინ წარმოადგინეს, საინტერესოა. კვლევები დაემთხვა ლარის მძლავრი რყევის პერიოდს და რასაკვირველია, ამან ბევრ საკითხებზე გავლენა მოახდინა”, – განაცხადა ვოლსკიმ.




"ნაციონალური მოძრაობის" წევრების სხდომაზე არდასწრება ჩემი პრინციპული გადაწყვეტილება იყო - დავით ნარმანია


დედაქალაქის მერის, დავით ნარმანიას განცხადებით, ის, რომ თბილისის მთავრობის სხდომაზე საკრებულოს ფრაქცია “ნაციონალური მოძრაობა – თბილისის” წევრები ირაკლი აბესაძე და თემურ გრიგალაშვილი არ შეუშვეს, პირადად მისი პრინციპული გადაწყვეტილება იყო.
“ის, რომ ისინი არ დაუშვეს მთავრობის დღევანდელ სხდომაზე, ეს იყო ჩემი პრინციპული გადაწყვეტილება და ამას აქვს რამდენიმე საფუძველი. პირველი, როცა ისინი შიგნით სხედან, გამოდიან გარეთ, სხვანაირად საუბრობენ და საზოგადოება შეცდომაში შეჰყავთ. მეორე, წინა შეხვედრაზე, როდესაც “ნაციონალური მოძრაობის” წარმომადგენლები დაესწრნენ სხდომას, მე მათ ვუთხარი, რომ დედაქალაქისთვის ბაღის შენობის დაბრუნებასთან დაკავშირებით უნდა ყოფილიყო გადაწყვეტილება მიღებული და ისინი უნდა დაგვხმარებოდნენ ამაში, რაც არ არის გაკეთებული. ასევე მათ უნდათ, მთავრობის სხდომაზე შემოსვლის შემდეგ, ცალკეული საკითხები ასწიონ და მასკარადად აქციონ პროცესი.
ჩვენ საქმეს ვაკეთებთ და არ დავუშვებთ, რომ ამ საქმის კეთებაში ვინმემ ხელი შეგვიშალოს,“ – განაცხადა დავით ნარმანიამ დედაქალაქის მთავრობის სხდომის დასრულების შემდეგ.




ნარმანია ქართულ ხასიათს ბოლომდე არ ერგება – ივანიშვილი


ექსპრემიერი ბიძინა ივანიშვილი მერიაში განხორციელებულ დაკავებებს ეხმაურება და ამბობს, რომ არ არსებობს სახელმწიფო, სადაც კორუფცია არ არსებობს.
ამის შესახებ ივანიშვილმა ჟურნალისტებთან საუბრისას განაცხადა.
მან დავით ნარმანიას საქმიანობა შეაფასა და აღნიშნა, რომ ის ევროპული ტიპის მენეჯერია.
„ეს არის პრობლემა მთლიანად ჩვენი საზოგადოების და მე არ ვიტყოდი, რომ ჩვენი საზოგადოება ამ მხრივ ვინმესგან განსხვავებულია. კორუფციას ყველგან ნახავთ, სახელმწიფო არ არსებობს, სადაც სახელმწიფო მოხელეს კორუფცია არ ჩაუდენია. ნარმანია არის მეთოდური, ევროპული ტიპის მენეჯერი. ქართულ ხასიათს შეიძლება ბოლომდე იდეალურად არ ერგება. მას მოუწევს გათვალისწინება რეალობის და ცოტა მეტი ფორსირება მოუწევს თავისი მენეჯერული თვისებების. საერთო ჯამში ნარმანია ჩემთვის არჩეული იყო იმისთვის, რომ ეს ყოფილიყო სიმბოლო ახალი მართვის. ის, რაც სააკაშვილმა დააფუძნა… შენობები, რომლების არქიტექტურულ დამუშავებასაც 2-3 წელი სჭირდებოდა, 9 თვეში ან 8 თვეში აშენებდა, გზებს აგებდა და რამდენიმე დღეში ეს გზა ფუჭდებოდა. მომავალში, ცოტა გვიან ნარმანიას სტილი იქნება იდეალური“, – განაცხადა ივანიშვილმა.




პრეზიდენტი შეთავაზების შემთხვევაში პუტინთან შეხვედრის შესაძლებლობას განიხილავს


საქართველოს პრეზიდენტი შეთავაზების შემთხვევაში მზად არის რუსეთის პირველ პირთან შეხვედრის შესაძლებლობა განიხილოს.
ამის შესახებ საგარეო ურთიერთობათა საკითხებში პრეზიდენტის მრჩევლმა თენგიზ ფხალაძემ ვლადიმერ პუტინის პრესმდივნის განცხადების საპასუხოდ განაცხადა.
თუმცა აქვე განმარტა, რომ ამ ეტაპზე არანაირი შეხვედრისთვის მზადება არ მიმდინარეობს.
“საქართველოს სახელმწიფოს არაერთხელ აღუნიშნავს, რომ ნებისმიერი მწვავე პრობლემა უნდა მოგვარდეს მოლაპარაკების გზით. აქედან გამომდინარე, საქართველოს პრეზიდენტს არაერთხელ დაუფიქსირებია მზადყოფნა ნებისმიერი მოლაპარაკებისთვის, თუ ეს მოლაპარაკება რეალურად, მიზნად ისახავს იმ პრობლემების გადაჭრას, რომელიც არსებობს რუსეთის ფედერაციასთან და რეალურად აწუხებს ჩვენ საზოგადოებას. დღეისათვის მსგავსი შეხვედრისთვის არანაირი მზადება არ მიმდინარეობს. თუმცა საქართველო მტკიცედ დგას იმ პოზიციაზე, რომ ნებისმიერი მწვავე პრობლემა უნდა გადაიჭრას მშვიდობიანი გზით და საქართველო მზად არის ნებისმიერ მწვავე პრობლემაზე სასაუბროდ. თუ იქნება შემოთავაზება, მზად ვართ ეს შემოთავაზება სერიოზულად განვიხილოთ“, – განაცხადა ფხალაძემ.
პესკოვის თქმით, ქართველი და რუსი დიპლომატები ორი ქვეყნის პირველი პირების შეხვედრას არ გამორიცხავენ.




ჯეიმს აპატურაი: გუშინ ხელმოწერილი ე.წ. ხელშეკრულება ძალიან ბევრი მიმართულებით არის ნეგატიური სიგნალი


ნატო-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ჯეიმს აპატურაი აცხადებს, რომ ორგანიზაცია და ალიანსის პარტნიორები შეშფოთებულები არიან რუსეთის ხელისუფლების პოლიტიკით იმ ქვეყნების მიმართ, რომლებსაც არჩეული აქვთ ჩრდილოატლანტიკური კურსი.
ამის შესახებ აპატურაიმ ” მოამბისთვის” მიცემულ ინტერვიუში ისაუბრა. მისი თქმით, ნატო აღშოთებულია იმ ე.წ. ხელშეკრულებით, რომელსაც ხელი მოეწერა ოკუპირებულ ცხინვალსა და რუსეთის ფედერაციას შორის.
“არა მგონია, საქართველოს მოსახლეობისთვის სიურპრიზი იყოს, რომ ჩვენ არ ვცნობთ ეგრეთ წოდებულ ხელშეკრულებებს, რომლებსაც არ აქვთ კანონიერი, იურიდიული საფუძველი. ნატო და ნატო-ს მოკავშირეები არასდროს აღიარებენ მათ. ნატო აღიარებს საქართველოს ტერიტორიულ მთლიანობას და სუვერენიტეტს. გუშინ ხელმოწერილი ეგრეთ წოდებული ხელშეკრულება ძალიან ბევრი მიმართულებით არის ნეგატიური სიგნალი. ეს არის რუსეთის პოლიტიკის გაგრძელება საქართველოს მიმართ. ასევე, ეს არის რუსეთის პოლიტიკის გაგრძელება ევროპის მიმართ. რუსეთს სურს, ხელი შეუშალოს ქვეყნებს, დამოუკიდებლად გააკეთონ არჩევანი. ცუდი სიგნალია იმის გამოც, რომ ეს ე.წ. ხელშეკრულებები ეკონომიკურ და სოციალურ საკითხებთან მიმართებაში უფრო ფართოა, ვიდრე ე.წ. ხელშეკრულება, რომელიც რუსეთმა აფხაზეთთან გააფორმა. ბევრი ქართველი პოლიტიკოსი რუსეთის გადაწყვეტილებას მცოცავ ანექსიად აფასებს და ვფიქრობ, რომ ეს შეფასება მართალია. რთულია ჟენევაში მოლაპარაკება, მაგრამ, რაც ჩვენ ვიცით, საქართველოს მთავრობის მხრიდან მოლაპარაკებები უნდა შენარჩუნდეს და გაგრძელდეს, იმის მიუხედავად თუ რამდენად ართულებს რუსეთი მოლაპარაკებებს და ფონს ამ მოლაპარაკებებისთვის. ჩვენ ვფიქრობთ, რომ კარგი იდეაა, ვინაიდან ეს მოლაპარაკებების სახეა. ამიტომ, ძალიან მნიშვნელოვანია საქართველო აჩვენებს, რომ მომწიფებული პარტნიორია და არავის აძლევს საფუძველს, დაადანაშაულონ, რომ არ ეძებს საუკეთესო გზებს და არ აკეთებს ყველაფერს. პოლიტიკური თვალსაზრისით ეს ძალიან მნიშვნელოვანია” – განაცხადა აპატურაიმ.
რაც შეეხება ე.წ. ხელშეკრულების იმ ნაწილს, რომელიც შეიარაღებული ძალების გაერთიანებას გულისხმობს, აპატაურაის თქმით, გაუგებარია, თუ რას ცვლის ეს გადაწყვეტილება.
“მე როგორც გავიგე, ეს ე.წ. ხელშეკრულება როგორც აფხაზეთის შემთხვევაში, გულისხმობს ეგრეთ წოდებულ სამხრეთ ოსეთის შეიარაღებული ძალების რუსეთის შეიარაღებულ ძალებთან გაერთიანებას, ერთობლივ სტრუქტურად ჩამოყალიბებას. რუსეთის შეიარაღებული ძალები ხომ, ისედაც სამხრეთ ოსეთის ტერიტორიაზე იმყოფებიან, ისევე, როგორც აფხაზეთში. ამიტომ, არ ვიცი ზუსტად რას ცვლის ეს გადაწყვეტილება. მე მოვისმინე საქართველოს მთავრობის მხრიდან. ყოფილი ხელისუფლებაც აცხადებდა, რომ ვერ ხედავენ ამ პრობლემის ძალისმიერი მეთოდებით გადაჭრის გზებს. საქართველოს აქვს ნაკისრი ვალდებულებაც და არაერთხელ გაკეთებული ძალის გამოუყენებლობის შეასხებ განცხადება. როგორც მე ვიცი, საქართველო არ აპირებს თავს დაესხას სამხრეთ ოსეთს. ამიტომ, ვერ ვხედავ ამ კუთხით განსაკუთრებულ საფრთხეს”, – განაცხადა ჯეიმს აპატურაიმ.




რუსეთის მხრიდან სამხედრო საფრთხე არსებობს – ირინა იმერლიშვილი


უშიშროების საბჭოს მდივანი ირინა იმერლიშვილი რუსეთსა და ცხინვალს შორის ე.წ. ხელშეკრულების გაფორმებას ეხმაურება. იმერლიშვილის თქმით, მართალია დოკუმენტს იურიდიული ძალა არ გააჩნია და ის სამართლის ნორმებს არღვევს, თუმცა ამ ხელშეკრულებით საქართველოს ოკუპირებულ ტერიტორიებზე რუსი სამხედროების ყოფნა სამხედრო საფრთხეს წარმოშობს.
„როდესაც ჩვენ გვაქვს ოკუპირებული ტერიტორიები და ამ ტერიტორიებზე დგანან რუსი სამხედროები, რა თქმა უნდა, სამხედრო საფრთხე არსებობს. თუმცა ჩვენ კიდევ ერთხელ მაქსიმალურად უნდა ვეცადოთ, რომ არაღიარების პოლიტიკა და ტერიტორიული მთლიანობის მიმართ საერთაშორისო მხარდაჭერა იყოს გამოხატული”, – განაცხადა ირინა იმერლიშვილმა.
შეგახსენებთ, რომ რუსეთის პრეზიდენტმა ვლადიმერ პუტინმა და ოკუპირებული ცხინვალის ე.წ პრეზიდენტმა ლეონიდ თიბილოვმა ე.წ მოკავშირეობისა და ინტეგრაციის ხელშეკრულებას ხელი კრემლში მოაწერეს.
ხელშეკრულება ეკონომიკურ, სოციალურ, ჰუმანიტარულ და უსაფრთხოების სფეროში ურთიერთ თანამშრომლობას გულისხმობს.




საქართველოს პრეზიდენტი რუსეთსა და სამხრეთ ოსეთთან ე.წ. ხელშეკრულების გაფორმებას გამოეხმაურა


საქართველოს პრეზიდენტი გიორგი მარგველაშვილი რუსეთის ფედერაციასა და ე.წ. ცხინვალის საოკუპაციო რეჟიმს შორის ე.წ. მოკავშირეობისა და ინტეგრაციის შესახებ ხელშეკრულების ხელმოწერასთან დაკავშირებით უკიდურეს აღშფოთებას გამოხატავს. მან ამ საკითხზე განცხადება გაავრცელა. როგორც მასშია ნათქვამი, სუვერენული სახელმწიფოს ტერიტორიული მთლიანობის წინააღმდეგ გადადგმული ეს ნაბიჯი კიდევ უფრო ამძიმებს ოკუპაციის შედეგად შექმნილ ვითარებას და იგი ანექსიის ხარისხში გადაჰყავს.
“აღმაშფოთებელია, რომ საქართველოს ხელისუფლების ძალისხმევას, მოინახოს ვითარების დარეგულირებისა და არსებული პრობლემების გადაჭრის გონივრული გზები, რუსეთის ფედერაცია პასუხობს ყოვლად დესტრუქციული ქმედებებით, რაც პრობლემას უქმნის მოლაპარაკებების პროცესს და უკიდურესად ამწვავებს არსებულ ვითარებას.
მივმართავთ საერთაშორისო თანამეგობრობას, გავაერთიანოთ ძალისხმევა სუვერენული სახელმწიფოების ტერიტორიების ანექსიის აღსაკვეთად და რუსეთის ფედერაციის იმ ქმედებების შესაჩერებლად, რომელიც უხეშად უგულებელყოფს საერთაშორისო სამართალს და საფრთხეს უქმნის არა მხოლოდ რუსეთის უშუალო მეზობელ ქვეყნებს, არამედ საერთო ევროპულ უსაფრთხოებას”, – აღნიშნულია განცხადებაში.