გიორგი კვირიკაშვილი ჩინეთში აბრეშუმის გზის ფონდის ხელმძღვანელს შეხვდა


საქართველოს ვიცე–პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, ჩინეთის სახალხო რესპუბლიკაში სამუშაო ვიზიტის ფარგლებში, აბრეშუმის გზის ფონდის ხელმძღვანელ ვანგ იანძის შეხვდა.
შეხვედრას ესწრებოდნენ ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი და საქართველოს საგანგებო და სრულუფლებიანი ელჩი ჩინეთში დავით აფციაური.
შეხვედრისას მხარეებმა ისაუბრეს “ახალი აბრეშუმის გზა – ეკონომიკური სარტყელის” პროექტის მნიშვნელობაზე არა მხოლოდ მასში მონაწილე კონკრეტული სახელმწიფოების, არამედ – გლობალური მასშტაბით. როგორც სამინისტროს მიერ გავრცელებულ ინფორმაციაშია ნათქვამი, პროექტის განხორციელება გაამარტივებს ტვირთების გადაადგილებას პროექტში ჩართულ ქვეყნებსა და რეგიონებს შორის, გაააქტიურებს სავაჭრო–ეკონომიკურ კავშირებს, მოიზიდავს დამატებით ინვესტიციებს, შექმნის ახალ სამუშაო ადგილებს და ხელს შეუწყობს პროექტის მონაწილე ქვეყნების განვითარებას.
საქართველოს ვიცე–პრემიერმა გიორგი კვირიკაშვილმა განსაკუთრებული ყურადღება გაამახვილა ჩინეთის სახალხო რესპუბლიკის პრეზიდენტის, სი ძინ პინის ინიციატივით დაწყებული პროექტის “ახალი აბრეშუმის გზა – ეკონომიკური სარტყელი” მნიშვნელობაზე და იმ სარგებელზე, რომელსაც ეს ინციატივა მოუტანს პროექტში მონაწილე თითოეულ სახელმწიფოს. გიორგი კვირიკაშვილმა ასევე აცნობა ჩინური მხარის წარმომადგენლებს საქართველოს პრემიერ–მინისტრის ინიციატივის შესახებ აბრეშუმის გზის ფორუმის დაფუძნების თაობაზე, რომელიც ყოვეწლიურად ჩატარდება და მასში მონაწილეობას მიიღებენ აბრეშუმის გზის პროექტის მონაწილე ქვეყნები და საერთაშორისო ორგანიზაციები.
შეხვედრაზე გიორგი კვირიკაშვილმა ასევე ისაუბრა იმ პროგრესზე, რომელიც განსაკუთრებით გამოიკვეთა საქართველოსა და ჩინეთს შორის საგარეო–ეკონომიკური თანამშრომლობის გაღრმავების მიმართულებით.
გიორგი კვირიკაშვილმა ასევე გაამახვილა ყურადღება იმ ნაბიჯებზე, რომელსაც ქვეყნის მთავრობა დგამს, რათა საქართველომ სათანადოდ შეასრულოს ევროპისა და აზიის დამაკავშირებელი სატრანზიტო დერეფნის ფუნქცია.
მან ჩინური მხარის წარმომადგენელს გააცნო საქართველოში მიმდინარე და დაგეგმილი პროექტები სატრანსპორტო–ლოგისტიკურ სფეროებში, მათ შორის, ანაკლიის ღრმაწყლოვანი ნავსადგურის შესახებ.
აბრეშუმის გზის ფონდი 2015 წლის თებერვალში დაფუძნდა. მის განკარგულებაშია 40 მილიარდი აშშ. დოლარი, რომელიც გამოყოფილია “ახალი აბრეშუმის გზა – ეკონომიკური სარტყელის” გლობალურ პროექტში ჩართულ სახელმწიფოებში სატრანსპორტო–ინფრასტრუქტურული, ლოგისტიკური და ენერგეტიკული პროექტების მხარდასაჭერად. საქართველო ერთ-ერთია იმ ქვეყნებს შორის, რომელიც აღნიშნულ გლობალურ პროექტში მონაწილეობს.
საქართველოს დელეგაცია პირველი იყო სამხრეთ კავკასიის რეგიონის ქვეყნებიდან, რომელმაც ფონდის ხელმძღვანელობასთან შეხვედრა გამართა.
სამუშაო ვიზიტის ფარგლებში, საქართველოს ვიცე–პრემიერი გიორგი კვირიკაშვილი ასევე შეხვდება ჩინეთის ვაჭრობის მინისტრ გაო ჰუჩენგს და ჩინეთის ეროვნული ტურიზმის ადმინისტრაციის თავმჯდომარეს ლი ჯინტაოს. გიორგი კვირიკაშვილი თავის ჩინელ კოლეგასთან ხელს მოაწერს ორ დოკუმენტს ორი ქვეყნის სავაჭრო–ეკონომიკური თანამშრომლობის შესახებ.




ნოდარ ხადურმა გადასახადების გაზრდასთან დაკავშირებით კომენტარი გააკეთა


ფინანსთა მინისტრი ნოდარ ხადური სავალუტო ფონდის რეკომენდაციას ეხმაურება და ამბობს, რომ სოციალური ინტერესებიდან გამომდინარე გადასახადები არ გაიზრდება.
მისი თქმით, რეკომენდაციიდან გამომდინარე მუშოაბა მიმდინარეობს მიმდინარე ხარჯების შემცირებაზე და აღნიშნულ გეგმაზე დღეს მთავრობის სხდომაზე იმსჯელებენ.
„გადაწყვეიტლება მიღებული გვაქვს, რომ მოსახლეობის სოციალური ინტერესებიდან გამომდინარე გადასახადები არ გაიზარდოს. რაც შეეხება ხარჯებს, ამაზე უკვე არაერთხელ ვისაუბრეთ. შემცირება მხოლოდ მიმდინარე ხარჯებს შეეხება და არც კაპიტალური და არც სოციალური ხარჯები არ შემცირდება. გეგმაზე მუშაობა გრძელდება ყველა სამინისტრო თავის წინადადებებს ფინანსთა სამინისტროში წარმოადგენს და გადაწყვეტილებას ერთობლივად მივიღებთ”, – განაცხადა ხადურმა.




ერთადერთი გამოსავალი ინვესტორებისთვის პირობების შექმნაა – ემზარ ჯგერენაია


სავალუტო კრიზისის გადაჭრის გზებზე დღეს სასტუმრო „ჰოლიდეი-ინში“ ეკონომიკის ექსპერტებმა და ეროვნული ბანკის წარმომადგენლებმა ჟურნალ Business Time Georgia-ს მიერ ორგანიზებულ მრგვალი მაგიდის სხდომაზე იმსჯელეს.
ეკონომიკის ექსპერტი ემზარ ჯგერენაია მიიჩნევს, რომ საქართველოსთვის პრობლემების გადაჭრის მთავარი გზა ინვესტორებისთვის მიმზიდველი პირობების შექმნაა.
„ექსპორტი დავარდა და ჩვენ ვერ შევძლებთ გავლენა მოვახდინოთ იმ ქვეყანაზე, რომლისგანაც მოდის ეს სიგნალები, ანალოგიური ვარდნა არის ტრანსფერებზე ვალუტის გადმორიცხვის კუთხითაც, იქაც უძლურები ვართ. ვერც რუსეთის სანქციებს მოვიშორებთ და ვერც უკრაინის ომს შევაჩერებთ, ამიტომ ჩვენ რაც შეგვიძლია, ეს არის ინვესტორებისთვის კარგი პირობების შექმნა“,- ემზარ ჯგერენაიამ.




ლარი 2 თეთრით გამყარდა


საქართველოს ეროვნული ვალუტა აშშ დოლართან მიმართებაში თითქმის ორი პუნქტით გამყარდა.
ეროვნული ბანკის მიერ დღეს დადგენილი ოფიციალური კურსით ხვალ 1 აშშ დოლარი 2.2494 ლარი ეღირება, დღევანდელი კურსი კი – 2.2635 ლარი იყო.
ლარი ერთი პუნქტით გამყარდა ევროსთან მიმართებაშიც. ხვალ 1 ევრო/2.5564 ლარი ეღირება. დღეს კი, მისი ფასი 2.5675 ლარი იყო.




ლარის კურსთან დაკავშირებით მთავრობას გრძელვადიანი და მოკლევადიანი გეგმები აქვს – ხადური


ლარის კურსთან დაკავშირებით მთავრობას როგორც გრძელვადიანი, ასევე მოკლევადიანი გეგმები აქვს შემუშავებული. ამის შესახებ ფინანსთა მინისტრმა ნოდარ ხადურმა მთავრობის ეკონომიკური ბლოკის მინისტრების და ბიზნესის წარმომადგენლების შეხვედრის დასრულების შემდეგ განაცხადა.
“მოკლევადიანი გეგმა ითვალისწინებს პრივატიზაციის დაჩქარებას. ამ გეგმაში ასევე იგულისხმება გაიზარდოს ცნობადობა და ტურისტული მიმზიდველობა საქართველოში. რაც შეეხება ფინანსთა სამინისტროს, ბიუჯეტის და ფისკალური პოლიტიკის თვალსაზრისით პროგნოზის შემცირების კვალობაზე მოგვიწევს ბიუჯეტის გადახედვა. ბიუჯეტში არ შემცირდება ინფრასტრუქტურული და საინვესტიციო პროექტებისთვის, ასევე სოციალური კუთხით გამოყოფილი ხარჯები. ჩვენ სერიოზულ საგადასახადო სტიმულებზე ვმუშაობთ, ეს ეხება მშენებლობის სტმულირებას”, – განაცხადა ნოდარ ხადურმა.




ლარი უახლოეს მომავალში უნდა დასტაბილურდეს – გიორგი ქადაგიძე


ეროვნული ბანკის პრეზიდენტმა გიორგი ქადაგიძემ კომერციული ბანკების წარმომადგენლებთან შეხვედრის დასრულების შემდეგ განაცხადა, რომ ლარი უახლოეს მომავალში უნდა დასტაბილურდეს. ქადაგიძის თქმით, სახეზეა ლარის 30 %-ით გაუფასურება, მაგრამ ეს იმოპრტზე ბოლომდე ჯერ არ ასახულა,
“დღევანდელი მდგომარეობით ჩვენ მივიღეთ ლარის 30%-იანი გაუფასურება. ეს ჯერ ბოლომდე არ ასახულა იმპორტზე. იმპორტზე ასახვა მოხდება და დაწყებულია, რაც ნიშნავს, რომ იმპორტი შემცირდება. იმპორტის შემცირება თავისთავად ნიშნავს ნაკლებ მოთხოვნას უცხოურ ვალუტაზე. შესაბამისად, ლარი არსებული მონაცემებით, უახლოეს მომავალში უნდა დასტაბილურდეს”, – განაცხადა გიორგი ქადაგიძემ.




საექსპორტო ათეულში პირველი ადგილი კვლავ მსუბუქ ავტომობილებს უკავია


საქსტატის ცნობით, 2015 წლის იანვარში, სასაქონლო ჯგუფებიდან, საექსპორტო ათეულში პირველი ადგილი კვლავ მსუბუქმა ავტომობილებმა დაიკავა, 22 მლნ. აშშ დოლარი და მთელი ექსპორტის 14 პროცენტი შეადგინა. თხილისა და სხვა კაკალის ექსპორტი უდრიდა 19 მლნ. აშშ დოლარს, ხოლო მისი წილი მთლიან ექსპორტში 12 პროცენტს. მესამე ადგილზე სპილენძის მადნებისა და კონცენტრატების ჯგუფი დაფიქსირდა. ამ სასაქონლო ჯგუფის ექსპორტმა 17 მლნ. აშშ დოლარი და მთელი ექსპორტის 11 პროცენტი შეადგინა.
უმსხვილესი საიმპორტო სასაქონლო ჯგუფი 2015 წლის იანვარში ნავთობის აირები და აირისებრი ნახშირწყალბადები იყო, რომლის იმპორტმა 51 მლნ. აშშ დოლარი და მთელი იმპორტის 10 პროცენტი შეადგინა. მეორე ადგილზე იმყოფებოდა მსუბუქი ავტომობილების სასაქონლო ჯგუფი 42 მლნ. აშშ დოლარით, რაც იმპორტის 8 პროცენტი იყო. მესამე ადგილზე ნავთობისა და ნავთობპროდუქტების სასაქონლო ჯგუფი დაფიქსირდა 40 მლნ. აშშ დოლარით (იმპორტის 8 პროცენტი).




ეროვნული ვალუტა ყველა მეზობელ ქვეყანაში გაუფასურებულია – ნოდარ ხადური


ეროვნულ ბანკთან სინქრონულად ვმუშაობთ, რათა არსებული პროცესები ფასების ზრდაში არ გადაიზარდოს. ამის შესახებ ჟურნალისტებს მთავრობის დღევანდელი სხდომის შემდეგ საქართველოს ფინანსთა მინისტრმა ნოდარ ხადურმა განუცხადა.
„ძალიან ბევრი გეგმა გვაქვს, მათ შორის, ეროვნულ ბანკთან სინქრონულად ვმუშაობთ, რათა მონეტარული და ფისკალური პოლიტიკა ერთმანეთის თანმხვედრი იყოს და არ დავუშვათ, რომ პროცესები ფასების ზრდაში გადაიზარდოს. მინდა შეგახსენოთ, რომ ეროვნული ვალუტა ყველა მეზობელ ქვეყანაში გაუფასურებულია. ჩვენმა ერთ-ერთმა მთავარმა სავაჭრო პარტნიორმა აზერბაიჯანმა ერთი დღე-ღამის განმავლობაში 33,5 პროცენტით გააუფასურა საკუთარი ვალუტა“, — აღნიშნა ნოდარ ხადურმა.




ლარის კურსის ვარდნასთან დაკავშირებით ხელისუფლებამ კრიზისული კომიტეტი უნდა შექმნას – ემზარ ჯგერენაია


ეკონომიკის ექსპერტის, ემზარ ჯგერენაიას განცხადებით, ლარის კურსის ვარდნასთან დაკავშირებით ხელისუფლებამ კრიზისული კომიტეტი უნდა შექმნას. ამის შესახებ ექსპერტმა პრაიმ–ტაიმის პრესკლუბში ჟურნალისტებს განუცხადა.
„სასწრაფოდ უნდა შეიქმნას კრიზისული კომიტეტი, რომელშიც აღმასრულებელი ხელისუფლების წარმომადგენლები, ეკონომიკური გუნდი მთლიანად, შინაგან საქმეთა მინისტრი, პარლამენტის თავმჯდომარე, ეროვნული ბანკის პრეზიდენტი შევლენ. უნდა შემუშავდეს ერთიანი სამოქმედო გეგმა. უნდა მივმართოთ სავალუტო ფონდს. მისი ფუნქცია და მოვალეობაა ასეთ დროს დაუჭიროს ქვეყანას მხარი. უნდა მივმართოთ დონორებს. ჩვენ თუ მარტივად შევხედავთ ამ პრობლემას, რომ ეროვნული ბანკი განახორციელებს სავალუტო ინტერვენციას ბაზარზე და ამით მოგვარდება, ეს არის ძალიან დიდი შეცდომა, რომელმაც შეიძლება კატასროფამდე მიგვიყვანოს. დავხარჯავთ სავალუტო რეზერვებს და მოხდება გაუგონარი. გაუგონარი კი იქნება ის, რომ ინვესტორი, რომელიც დღეს საქართველოში მუშაობს და თავისი მოგების რეპატრიაციის თემას უყურებს, როგორც კი დაინახავს, რომ ამას საფრთხე ემუქრება, თავისი საქმიანობის შეკვეცას და ქვეყნიდან კაპიტალის გატანას დაიწყებს. ეს იქნება კატასტროფა“, – აცხადებს ჯგერენაია.




ეროვნულმა ბანკმა ლარის გასამყარებლად 40 მილიონიანი ინტერვენცია მეოთხედ განახორციელა


საქართველოს ეროვნულმა ბანკმა ბოლი 4 თვის განმავლობაში სავალუტო ბაზარზე ინტერვენცია მეოთხედ განახორციელა და 19 თებერვალს გამართულ სავალუტო აუქციონზე 40 000 000 აშშ დოლარი გაყიდა.
სებ-ის ინფორმაციით, ვაჭრობისას საშუალო შეწონილმა გაცვლითმა კურსმა 1აშშ დოლართან მიმართებაში 2.1464 ლარი შეადგინა.
საქართველოს ეროვნულმა ბანკმა პირველი 40 მილიონიანი ინტერვენცია სავალუტო ბაზარზე 2014 წლის 25 ნოემბერს განახორციელა. ამ ტარნზაქციის შემდეგ ლარი აშშ დოლართან მიმართებაში მცირედით მხოლოდ ერთი დღით გამყარდა.
სებ-მა ლარის კურსის ვარდნის შესაჩერებლად სავალუტო ბაზარზე ინტერვენცია მეორედ 2014 წლის 2 დეკემბერს განახორციელა. ეროვნული ბანკის მიერ დადგენილმა საშუალო შეწონილმა გაცვლითმა კურსმა 1.8605 შეადგინა.
მესამედ ინტერვენცია ბაზარზე 11 თებერვალს განხორციელდა. სავალუტო აუქციონზე საქართველოს ერობნულმა ბანკმა 40 000 000 აშშ დოლარი გაყიდა. საშუალო შეწონილმა გაცვლითმა კურსმა 2.0240 შეადგინა.
ოთხი ინტერვენციის შედეგად ეროვნულმა ბანკმა ნოემბერ-დეკემბერ-თებერვალში სავალუტო რეზერვებიდან 160 მლნ აშშ დოლარი გაყიდა.