შეცდომა თუ პროვოკაცია – რუსი დეპუტატი საქართველოს პარლამენტში


2 დღეა, რაც თბილისში მართლმადიდებლობის საპარლამენტთაშორისო ასამბლეის 26-ე გენერალური სესია მიმდინარეობს. დღეს  სესია პარლამენტის პლენარულ სხდომათა დარბაზში ჩატარდა. პარლამენტის სპიკერისთვის განკუთვნილი ადგილიდან, დელეგატებს არა ასამბლეის მდივანმა, საბერძნეთის წარმომადგენელმა, არამედ რუსეთის დუმის დეპუტატმა, კომუნისტური პარტიის წევრმა, სერგეი გავრილოვმა მიმართა.

დარბაზში პარტია „ევროპული საქართველოს“ წევრები პლაკატებითა და შეძახილებით შევიდნენ  და  სესიაში რუსეთის დუმის დეპუტატების, მათ შორის ასამბლეის პრეზიდენტის სერგეი გავრილოვის მონაწილეობა და მის მიერ სხდომის პარლამენტის თავმჯდომარის სავარძლიდან წაყვანა გააპროტესტეს.

მათი განცხადებით, რუსეთი ოკუპანტია და ოკუპანტი სხდომას არ უნდა უძღვებოდეს.  „ის აქ არ დაჯდება“, – აცხადებენ „ევროპული საქართველოს“ წევრები და გავრილოვს სხდომის დატოვებისკენ მოუწოდებდნენ. სესიაზე ამ დროისთვის შესვენებაა გამოცხადებული და დარბაზში გავრილოვი არ იმყოფება. პარლამენტის თავმჯდომარის სავარძელი დეპუტატმა, გიორგი კანდელაკმა დაიკავა.

დეპუტატები ზაქარია ქუცნაშვილმა და ადა მარშანიამ „ევროპული საქართველოს“ წევრებს სხდომათა დარბაზის დატოვებისკენ მოუწდოეს. მარშანიასა და ხოშტარიას შორის დაპირისპირებაც მოხდა.

ფრაქცია „ქართული ოცნების“ თავმჯდომარე მამუკა მდინარაძის თქმით, რუსი დეპუტატი საქართველოს პარლამენტის თავმჯდომარის სავარძელში შეუთანხმებლად აღმოჩნდა.

„ჩვენ მივიღეთ გადაწყვეტილება, რომ საქართველოს პარლამენტის სხდომათა დარბაზში სწორედ იმის გამო, რომ გავრილოვი შეუთანხმებლად აღმოჩნდა თავმჯდომარის სკამზე და მან ეს სხდომა წაიყვანა, გაბედა პარლამენტის თავმჯდომარისა და საპარლამენტო გუნდის პოზიციისგან შეუთანხმებლად და განსხვავებით, საქართველოს პარლამენტში ასამბლეის სხდომა ვეღარ გაგრძელდება“, – განაცხადა მდინარაძემ.

მან ასამბლეის წევრებს ბოდიში მოუხადა და აღნიშნა, რომ სხდომა ხვალ სხვა სივრცეში გაგრძელდება.

„ხვალ გაგრძელდება სხვა სივრცეში სხდომა, ნებისმიერი სასტუმრო იქნება თუ სხვა, ჩვენ ევროპელ პარტნიორებს და მათი პარლამენტის წარმომადგენლებს მიეცემათ საშუალება, თავისუფლად განაგრძონ ასამბლეის ფარგლებში მუშაობა, მაგრამ საქართველოს პარლამენტში მსგავსი შეცდომა აღარ, ვეღარ დაიშვება და ორგანიზატორებს, რომლებმაც დაუშვეს ის, რომ სერგეი გავრილოვი მოხვედრილიყო საქართველოს პარლამენტის თავმჯდომარის სკამზე, რა თქმა უნდა, პასუხი მოეთხოვება“, – განაცხადა მამუკა მდინარაძემ.

ინციდენტს  მყისვე მოყვა საქართველოს პრეზიდენტის, პრემიერ– მინისტრის და სხვადასხვა პოლიტიკოსებბის მწვავე კრიტიკა.

ბიძინა ივანიშვილის თქმით,  დაუშვებელია საქართველოს პარლამენტში ოკუპანტი სახელმწიფოს წარმომადგენელი ხელმძღვანელობდეს რაიმე ფორუმს, ამას აუცილებლად უნდა მოჰყვეს რეაგირება.  ირაკლი ღარიბაშვილი   მართლმადიდებლობის საპარლამენტთაშორისო ასამბლეის სესიის ორგანიზატორების პასუხისმგებლობის დასმას ითხოვს.

„უმძიმესი სანახავია საქართველოს უმაღლესი საკანონმდებლო ორგანოს მთავარ ტრიბუნასთან ოკუპანტი ქვეყნის დეპუტატის ხილვა! ეს ფაქტი ზიანს აყენებს ჩვენი თავისუფლების იდეას, აზიანებს ქართულ პარლამენტარიზმს! სრულად ვიზიარებ ქართული საზოგადოების სამართლიან პროტესტს და მივმართავ ამის ორგანიზატორებს – დაუყოვნებლივ განუმარტონ საზოგადოებას მომხდარის მიზეზები და მოახდინონ მკაცრი რეაგირება მომხდარზე“, – აღნიშნა  საქართველოს პრემიერ-მინისტრმა მამუკა ბახტაძემ.

საპროტესტო აქციები  საქართველოს ქალაქებში გაიმართა. ოპოზიციურმა პარტიებმა პარლამენტის თავმჯდომარის ირაკლი კობახიძის გადადგომა მოითხოვეს, მოგვიანებით კი პარლამენტის წინ აქცია გამართეს და ვადამდელი საპარლამენტო არჩევნების დანიშნვაც მოითხოვეს.

აღსანიშნავია, რომ ირაკლი კობახიძე სამუშაო ვიზიტით ბაქოში იმყოფება და მომხდარის შესახებ მოგვიანებით შეიტყო. მან ასევე დაგმო რუსი დეპუტატის ქმედება და აღოტება გამოხატა ინციდენტის შესახებ.

რაც შეეხება თვითონ სერგეი გავრილოვს, მას და რუსეთის დანარჩენ დეპუტატებს საქართველოს დატოვება სასწრაფო წესით, დროზე ადრე მოუწია.

რა იყო ეს, შეცდომა თუ პროვოკაცია, საზოგადოებას ჯერ ვერ გაურკვევია, თუმცა ფაქტია, რომ მისი ყურადღება “თბილისი  პრაიდის” ჩატარების თემისგან თითქმის 100%–ით გადატანილია…

ალექსანდრე მგალობლიშვილი




რა "ისტორიული მნიშვნელობის დოკუმენტებს" მოაწერა ხელი აშშ–ში მამუკა ბახტაძემ?


მამუკა ბახტაძე - აშშ-თან შევთანხმდით ისტორიული მნიშვნელობის დოკუმენტებსა და პრინციპებზე, რომლებიც იქნება გარანტი, რომ საქართველო განვითარდება სტაბილურადსაქართველოს პრემიერ-მინისტრის, მამუკა ბახტაძის აშშ-ში ვიზიტის ფარგლებში, საქართველოს ეკონომიკისა და მდგრადი განვითარების სამინისტროსა და აშშ-ის კომერციის დეპარტამენტს შორის ორმხრივი სავაჭრო ურთიერთობების გაფართოებისთვის თანამშრომლობის საკითხებზე ურთიერთგაგების მემორანდუმი გაფორმდა.

დოკუმენტი, რომელსაც ხელი მამუკა ბახტაძისა და აშშ-ის ვაჭრობის მდივან ვილბურ როსის შეხვედრის შემდეგ მოეწერა, ორმხრივი სავაჭრო ურთიერთობების კიდევ უფრო გაფართოებას შეუწყობს ხელს…

ეს და კიდევ სხვა მრავალი, მკითხველისთვის არაფრის მთქმელი ფრაზებით არის აღწერილი პრემიერის მიერ ხელმოწერილი მემორანდუმის არსი და მნიშვნელობა…ტრადიციულად, ორივე მხარემ კმაყოფილება გამოთქვა  და ერთმანეთს მადლობა გადაუხადა გაწეული თანამშრომლობისთვის.

შემდეგ საქმე შეეხო “კომერციულ წარმომადგენლობას”:

შეხვედრისას, მხარეები შეთანხმდნენ, რომ დაიწყება საქართველოში აშშ-ის კომერციული წარმომადგენლობის შექმნის პროცესი, რომელიც რეგიონული დატვირთვის ოფისი იქნება. კომერციული წარმომადგენლობის გახსნის საკითხზე მუშაობის დაწყების საკითხი ასახულია ურთიერთგაგების მემორანდუმში, რომელსაც საქართველოს პრემიერ-მინისტრისა და აშშ-ის კომერციის მდივნის შეხვედრის შემდეგ, საქართველოს ეკონომიკისა და მდგრადი განვითარების მინისტრმა ნათია თურნავამდა აშშ-ის კომერციის მდივანმა ვილბურ როსმა მოაწერეს ხელი.

გაიგეთ რამე? მე არა.

არანაკლებ ბუნდოვანი იყო საქართველოს პრემიერ–მინისტრის განცახდება, გამგები კი გაიგებს ალბათ:

„ორი დღის წინ მიღებული უმნიშვნელოვანესი დოკუმენტი – სტრატეგიული პარტნიორობის 10 წლისთავისადმი მიძღვნილი ერთობლივი დეკლარაცია ასახავს იმ პრიორიტეტებს, რომელიც გვექნება აშშ-თან ერთად შემდგომი წლების განმავლობაში, რომ საქართველოსა და აშშ-ს შორის სტრატეგიული პარტნიორობა გადავიყვანოთ ხარისხობრივად ახალ დონეზე. დეკლარაციაში ასევე აღნიშნულია უმნიშვნელოვანესი ფაქტორი – სწორედ საქართველოს აქვს პოტენციალი, გახდეს რეგიონის ეკონომიკური და ლოგისტიკური ცენტრი და დღევანდელი დღე და კომერციის დეპარტამენტთან ხელმოწერილი მემორანდუმი ამის გაგრძელებაა.

На данном изображении может находиться: 1 человек, костюм

დოკუმენტის თანახმად, ჩვენ ამერიკელი მეგობრებისგან მივიღებთ ძალიან მნიშვნელოვან მხარდაჭერას და სწორედ საქართველოში შეიქმნება ის პლატფორმა, რომელიც საშუალებას მისცემს ამერიკულ ბიზნესს, უფრო ფართოდ იყოს წარმოდგენილი ჩვენს რეგიონში. როდესაც მსოფლიოს ნომერ პირველი ეკონომიკისგან გვაქვს ასეთი მხარდაჭერა, შეგვიძლია განვაცხადოთ, რომ ჩვენ გვაქვს ყველა წინაპირობა, ვიყოთ წარმატებული იმ სტრატეგიაში, რომელიც სწორედ საქართველოს აქცევს რეგიონის ეკონომიკურ ცენტრად”, – განაცხადა პრემიერ-მინისტრმა.

რას ნიშნვას ” ძალიან მნიშვნელოვანი მხარდაჭერა”?   ამერიკული ბიზნესის გაფართოვება საქართველოში? სხვა ქვეყნების ბიზნესიც არის ჩვენთან წარმოდგენილი და საკმაოდ წარმატებულად. რა არის აქ ისტორიული? საქართველო აშშ–ზე უფროსი და ისტორიულად მდიდარი ქვეყანაა. იქნებ რამე არასწორად მესმის, დინოზავრი ვარ და ცხოვრებას ჩამოვრჩი?

„ჩვენ შევთანხმდით ისტორიული მნიშვნელობის დოკუმენტებსა და პრინციპებზე, რომლებიც შემდეგი წლების განმავლობაში იქნება იმის გარანტი, რომ საქართველო განვითარდება სტაბილურად, მშვიდობიან გარემოში და ჩვენი ეკონომიკური ზრდა იქნება ხელშესახები, ინკლუზიური და საქართველოს თითოეულ მოქალაქეზე აისახება”, – აღნიშნა მამუკა ბახტაძემ.

რისი თქმა სურდა ჩვენ პრემიერს ნეტა?  ამას ცალკე თარჯიმანი დასჭირდება. ან არ დასჭირდება, თუ ეს ყველა ფრაზა და  ტექსტი განგებ შენიღბულია, და შემდეგ აღმოჩნდება, რომ საქართველო და ქართველი ხალხი არასახარბიელ და არასასურველ გარიგებაში აღმოჩნდება გახვეული.  არ მინდა, მოვლენებს წინ გავუსწროო, ბახტაძემ. კი ბატონო, მაგრამ ახალი კონსტიტუციის მიღების არ იყოს, მერე აქეთ საზოგადოებას არ დააბრალოთ, არ მოგვისმინეთო…

მემორანდუმის თანახმად, ორმხრივი სავაჭრო-ეკონომიკური ურთიერთობების შემდგომი გაღრმავებისა და ვაჭრობის მასშტაბების გაზრდის მიზნით, მხარეები დიალოგს კიდევ უფრო გაააქტიურებენ და ხელს შეუწყობენ ბიზნესწრეებს შორის პირდაპირი კონტაქტების დამყარებას. ასევე გაგრძელდება კომერციული სამართლის განვითარების პროგრამა (CLDP), რომელიც ხელს უწყობს კომერციული ეკონომიკური მიმართულებების განვითარებას საქართველოში და პროგრამა SABIT-ი (Special American Business Internship Training), რომელიც ეხმარება ქართულ ბიზნესს ამერიკულ კომპანიებთან დაახლოებაში, გამოცდილების გაზიარებასა და პარტნიორობის გააქტიურებაში (Special American Business Internship Training).

დოკუმენტით ასევე გათვალისწინებულია ინფორმაციის გაცვლა ორივე მხარისთვის საინტერესო საკითხებზე; საწარმოებისა და ორგანიზაციების მონაწილეობის წახალისება გამოფენებში, ბაზრობებშიბიზნესფორუმებში, სავაჭრო მისიებსა და ინვესტორებთან სერიულ შეხვედრებში, რომლებიც მემორანდუმის მონაწილე ქვეყნების ტერიტორიებზე და მათ ფარგლებს გარეთ გაიმართება.

გამგები გაიგებს, ალბათ…

ალექსანდრე მგალობლიშვილი

premiumi.ge




“საპარტნიორო ფონდმა“ დაახლოებით $300 მილიონი ინვესტირებით საქართველოში $2.5 მილიარდი მოიზიდა”


saganeli„საპარტნიორო ფონდის“ აღმასრულებელი დირექტორის, დავით საგანელიძის ინფორმაციით, „საპარტნიორო ფონდის“ რეფორმის საპარლამენტო განხილვა სავარაუდოდ საშემოდგომო სესიაზე შედგება. 

საგანელიძის შეფასებით, ფონდის რეფორმას, რომელიც ჯერ კიდევ 2016 წელს დაიწყო და შეჩერდა, მოქმედი მთავრობის დიდი მხარდაჭერა აქვს და მისი განხილვა პარლამენტში სავარაუდოდ საშემოდგომო სესიაზე დაიწყება

„რამდენიმე დღეში ეკონომიკის ექსპერტებთან გვექნება შეხვედრა, შემდეგ ალბათ 13 ივნისს ბიზნესასოციაციასთან, 20 ივნისს ეკონომიკის საბჭოზე იგეგმება ამ თემის განხილვა მთავრობაში, რომელიც შემდეგ გარკვეულ კონცეფციას დაამტკიცებს. სამი სამუშაო ვარიანტი გვაქვს, სამივეში პოზიტიური ძვრებია, თუმცა არსებობს ხარვეზებიც. ამიტომ იგეგმება კონსულტაციები ექსპერტებთან, ბიზნესმენებთან, ბანკებთან, ეკონომიკის საბჭოსთან. ალბათ ზაფხულში საბოლოო დოკუმენტი ჩამოყალიბდება, რომელიც საშემოდგომო სესიაზე პარლამენტში შევა“, – განაცხადა დავით საგანელიძემ “საქართველოს პირველი არხის” გადაცემა „ბიზნესპარტნიორის“ ეთერში.

„საპარტნიორო ფონდის“ ხელმძღვანელის თქმით, საინვესტიციო საქმიანობიდან მიღებული ფინანსური მაჩვენებლები მომგებიანია, მაგრამ ფონდის მფლობელობაში არსებული წამგებიანი სახელმწიფო კომპანიების ფინანსური მაჩვენებლები ფონდის იმიჯზე უარყოფით გავლენას ახდენს. საგანელიძე განმარტავს, რომ ფონდი არც ერევა მის პორტფელში არსებული სახელმწიფო კომპანიების მართვაში, რაც ფონდის საქმიანობას დაბრკოლებებს უქმნის.

„ფონდის ძირითადი საქმიანობა არის საქართველოში ინვესტიციების მოზიდვა, ინვესტორებთან ერთად გარკვეული პროექტების დაფინანსება. ჩვენ არასოდეს ვფლობთ 49 %–ზე მეტ აქციას, ანუ მინორიტარი აქციონერები ვართ და ძალიან მალე გამოვდივართ დაფინანსებული ბიზნესიდან, თანხა უკან გამოგვაქვს. შესაბამისად, როცა წლის ბოლოს ვნახავთ მოვიგეთ თუ წავაგეთ, ეს არის ჩვენი ციფრები. თუმცა არსებობს კონსოლიდირებული ბალანსი, სადაც ჩვენს მაჩვენებლებთან ერთად ხდება შვილობილი კომპანიების ბალანსის გაკეთებაც.

თუ „საქართველოს რკინიგზის“, „სახელმწიფო ელექტროსისტემის“, გაზისა და ნავთობის კორპორაციის და ელექტროენერგიის ბაზრის ოპერატორის ერთობლივ ბალანსს გავაკეთებთ, ფონდის საერთო ბალანსი არის წამგებიანი. საქმე ისაა, რომ ორმა კომპანიამ „საქართველოს რკინიგზამ“ და ელექტროსისტემამ წაგებით დახურეს წელი. ამ კომპანიებს ჩვენ არ ვმართავთ, მაგრამ როცა აუდიტორი აკეთებს დასკვნას, ერთიან ბალანსში მათი ციფრებიც შემოაქვს. ეს ორი კომპანია რომ არ იყოს ჩვენს შემადგენლობაში, ფონდმა 192.8 მილიონის მოგებით დახურა წელი ანუ დაახლოებით 193 მილიონის მოგება მოუტანა სახელმწიფოს. როცა ჩვენს მიერ დაფინანსებული საინვესტიციო პროექტებიდან გამოვდივართ ჩვენი წლიური მომგებიანობა 14.8 პროცენტი იყო“, – განაცხადა დავით საგანელიძემ.

მისი თქმით, „საპარტნიორო ფონდმა“ შექმნიდან დღემდე დაახლოებით 300 მილიონი დოლარის ინვესტირებით საქართველოში 2.5 მილიარდი დოლარი მოიზიდა.

გასულ კვირაში საგანელიძის საპარლამენტო მოსმენის შემდეგ  “საპარტნიორო ფონდის” რეფორმის საკითხი კიდევ ერთხელ გახდა აქტუალური. დეპუტატების დიდმა ნაწილმა ფონდის ეფექტიანობის საკითხი კითხვის ნიშნის ქვეშ დააყენა, პრემიერ-მინისტრმა კი განაცხადა, რომ „საპარტნიორო ფონდის“ ბიზნესმოდელი შესაცვლელია.




დაპირისპირება პანკისში – მთავრობა ადამიანის და ბუნების წინააღმდეგ


დღეს პანკისის ხეობის მოსახლეობის ნაწილმა ჰესის მშენებლობის დაწყება გააპროტესტა, რაც  პოლიციელებთან  დაპირისპირებაში გადაიზარდა. მათ სამართალდამცველებს ქვები დაუშინეს. სამართალდამცველებსა და ადგილობრივებს შორის შეტაკებისას პოლიციამ ცრემლმდენი გაზი რამდენჯერმე გამოიყენა. 

ვითარების გამწვავების გამო პანკისის ხეობაში შს მინისტრი გიორგი გახარია და მინისტრთა კაბინეტის სხვა წევრები ჩავიდნენ და პანკისის ხეობის უხუცესებს შეხვდნენ.  შეხვედრის შემდეგ ცნობილი გახდა, რომ მხარეები გარკვეულ საკითხებზე შეთანხმდნენ. კერძოდ, ჰესის მშენებლობასთან დაკავშირებით გაგრძელდება მოლაპარაკებები, აქციები შეწყდება, პანკისის ხეობას სპეცრაზმი დატოვებს თუმცა პოლიცია დარჩება ადგილზე.

პანკისის ხეობაში განვითარებულ მოვლენებზე განცხადება გაავრცელა საქართველოს მთავრობის ადმინისტრაციამაც, რომელშიც მოქალაქეებს მოუწოდა, არ აჰყოლოდნენ  პროვოკაციას.

შსს–ს ინაგან საქმეთა მინისტრმა გიორგი გახარიამ, ინფრასტრუქტურის მინისტრმა მაია ცქიტიშვილმა და მინისტრთა კაბინეტის სხვა წევრებმა თელავის რეფერალურ საავადმყოფოში პანკისის ხეობაში, საპროტესტო აქციაზე დაპირისპირებისას დაშავებული პოლიციელები მოინახულეს.

შს მინისტრის განცახდებით, საგამოძიებო მოქმედებები მიმდინარეობს და უწყება დაპირისპირების ყველა ვიდეოკადრს შეისწავლეს. მისი ინფორმაციით, ამ წუთებში დაკავებული არავინ არის.

გიორგი გახარია - ზოგიერთი ვაი პოლიტოლოგი სისულელეებს წერს, მათ პანკისის ხეობის კი არა, სამშობლოს სიყვარულიც არ ესმით, რა არის

“მადლობა უხუცესებს, რომლებიც ობიექტურად აფასებენ ვითარებას”, – განაცხადა გიორგი გახარიამ.

არსებული ინფორმაციით, პანკისის ხეობაში სამართალდამცველებსა და აქციის მონაწილეებს შორის დაპირისპირებისას პოლიციის 10-ზე მეტი ავტომანქანა დაზიანდა, მათ შორის სამი დაიწვა. ასევე, დაპირისპირებისას აქციის მონაწილეებმა სამშენებლო ტექნიკასაც წაუკიდეს ცეცხლი.

საგანგებო სიტუაციების მართვის სამსახურის ცნობით, პანკისის ხეობაში დაპირისპირების გამო სასწრაფო სამედიცინო დახმარება აღმოუჩინეს 35 ადამიანს. მათ შორის პოლიციელებიც არიან, რომლებიც საავადმყოფოში გადაიყვანეს.

გარემოს დაცვისა და სოფლის მეურნეობის მინისტრმა, ლევან დავითაშვილმა პანკისში აქციის მონაწილეებთან შეხვედრის შემდეგ განაცხადა, რომ კომპანია ხეობაში გააგრძელებს იმ ჰესზე მუშაობას, რომელზეც კითხვები არ არსებობს.  დავითაშვილის თქმით, სამართალდამცველებზე ხელის აღმართვა მიუღებელია, გადაცდომაზე პასუხი ყველას მოეთხოვება და საკითხს შინაგან საქმეთა სამინისტრო გამოიძიებს.

„რაც შეეხება დაგეგმილ პროექტებს, იცით, რომ ხეობაში რამდენიმე ჰესზე იყო ნებართვა გაცემული. კომაპნია გააგრძელებს იმ პროექტზე მუშაობას, სადაც არ არსებობს კითხვები. ნებისმიერ რეჟიმში, ჩვენ უნდა განვიხილოთ და განვიხილავთ კაბინეტში. შეიძლება, ხეობის მოსახლეობა თვითონ ჩამოვიდეს. ჩვენ ამაზე რამდენიმე დღის წინაც გვქონდა საუბარი, რომ ექსპერტების საჭიროება თუ იქნება, მზად ვართ.

თბილისში სახელწოდებით - „სოლიდარობა პანკისს“ აქცია მიმდინარეობს

მოსახლეობა საუბრობდა, რომ შესაძლოა, მათ უნდოდეთ დამატებით ჩაერთონ საკითხში ექსპერტები, რომელთა მიმართ მათ ნდობა აქვთ. მზად ვართ, რომ ამ სპეციალისტებმა მიიღონ შესაბამისი ექსპერტული პასუხები, ასე რომ, ამაზე მოსახლეობასთან გაგრძელდება საუბარი იმისთვის, რომ მათი დიდი ნაწილი იყოს მომხრე“, – განაცხადა დავითაშვილმა.

დღესვე თბილისსა და ბათუმში გაიმართა აქციები  „სოლიდარობა პანკისს“. აქციაზე სამოქალაქო და არასამთავრობო სექტორის წარმომადგენლები იმყოფებიან. როგორც აქციაზე „საქართველოს ახალგაზრდა იურისტთა ასოციაციის“ (საია) წარმომადგენლებმა ვახუშტი მენაბდემ განაცხადა, ხელისუფლება არ ითვალისწინებს ადგილობრივების ინტერესებს.

„ეს არის სოლიდარობის აქცია და ამავდროულად, პროტესტი იმ ქმედებების მიმართ, რომელსაც ხელისუფლება იჩენს პანკისის ხეობის შემთხვევაში, ასევე ენერგორესურსებთან მიმართებაში. ის არ ითვალისწინებს საზოგადოების მოთხოვნას ადგილობრივი მოსახლეობის ინტერესებს, ეკოლოგიურ ინტერესებს. დღეს ამას დაემატა ქმედებები, საპოლიციო ძალის გამოყენება, რამაც მთელი ქვეყანა შეაშფოთა. ვფიქრობ, საკუთარ ხალხს ხელისუფლება ამ ენით,  რეზინის ტყვიებითა და ცრემლსადენი გაზით არ უნდა ესაუბრებოდეს“, – განაცხადა მენაბდემ.




ვაჟა კაკაბაძე:"ტყვიის მაღალი შემცველობა –არ არის გამორიცხული, რომ ადგილი ჰქონდეს დივერსიას"


ვაჟა კაკაბაძე-ის სურათის შედეგიგასულ წელს, როცა სტამბულში ვიყავი იქ მომუშავე ქართველებმა მითხრეს, რომ სტამბულის სავადმყოფო სავსეა ქართველი ბავშვებით, რომლის სისხლშიც მომატებული ტყვიის შემცველობაა დაფიქსირებული.

როგორც საინფორმაციო წყარო გადმოსცემს იტალიის ლაბორატორიიდან ჩამოსული ანალიზის პასუხებით, 2-დან 7 წლამდე ბავშვებში ტყვიის კონცენტრაცია მომატებულია, კერძოდ: 16-ბავშვს, სისხლში ტყვიის მაღალი შემცველობა დაუდგინდა, დანარჩენებს კი მომატებული.  ამ საკითხზე ისაუბრა დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო ხელმძღვანელი პაატა იმნაძემ, მან განაცხადა:

“ტყვიის შემცველობაზე კვლევის შედეგები ამ თვის ბოლოს გამოქვეყნდება (იგულისხმება აპრილი). შემთხვევითი შერჩევის პრინციპით გამოკვლეული 1600-მდე ბავშვიდან, სისხლში ტყვიის საყურადღებო მატება 16 ბავშვს დაუდგინდა. ამ ბავშვებთან დადიან ექიმები, საზოგადოებრივი ჯანდაცვის მუშაკი, გარემოს სპეციალისტი და ინდივიდუალური მკურნალობა უტარდებათ. ასევე მიმდინარეობს მათი საცხოვრებელი გარემოს შესწავლა, რათა დადგინდეს ტყვიის წყარო. კვლევის შედეგებზე დაყრდნობით, ცოტა ხანში სახელმწიფო პროგრამა ამუშავდება. ამ საკითხთან დაკავშირებით, შეხვედრა გაიმართა პრემიერ-მინისტრთან. მზადდება დიდი სამთავრობო პროგრამა სხვადასხვა უწყების ჩართულობით, იმისთვის, რომ ქვეყანაში დაისახოს გრძელვადიანი პროგრამა ტყვიის პრობლემების აღმოსაფხვრელად”.

ასევე გაირკვა, რომ დასავლეთის მხარეში, სახელდობრ ზღვის პირას მაცხოვრებელ ბავშვებში ტყვიის შემცველობა სხვა რეგიონებში მაცხოვრებელ ბავშვებთან შედარებით, უფრო მაღალია. აღნიშნულიდან გამომდინარე ჩნდება ლოგიკური კითხვა, რატომ? ამ კითხვაზე შევეცდები გავცე პასუხი:

  • პირველი – ტყვია დაკავშირებულია დარიშხანის საბადოსთან და როცა რაჭაში ხდებოდა ღია კარიერული წესით ვერცხლის მოპოვება, ვერცხლი და ტყვია ჩადიოდა გრუნტის წყლებში, გასული საუკუნის 80 წლებში დარიშხანის შემცველობა აღმოჩენილ იქნა ნიადაგში, მცენარეულ საკვებში და დედის რძეშიც კი. ამ გარემოებამ შეაშფოთა საბჭოთა ექიმები, მაგრამ ქმედითი ღონისძება არ განხორციელებულა – ეს ანალიზი, რათქმაუნდა, ეხება ტყვიასაც;
  • შემდეგი მიზეზი – ბათუმის მახლობლად განლაგებული იყო რუსეთის სამხედრო ბაზა და როცა მოხდა მათი გასვლა არ მომხდარა იქ დარჩენილი სამხედრო ნარჩენების უტილიზაცია;
  • და, კიდევ ერთი  მთავარი მიზეზი – სოხუმთან არსებული ეშერის საიდუმლო ლაბორატორია, რომელიც ახორციელებს საშიშ ცდებს.

ყოველივე ამას ემატება მანქანების გამონაბოლქვი, ნაგავსაყრელების მოუწესრიგებულობა, მეორადი საბურავების გამოყენება და წვა; ცნობისათვის: გემის საღებავები შეიცავს ტყვიის მაღალ შემცველობას, სამშენებლო მასალები გაჯერებულია ტყვიით და არ არის გამორიცხული, რომ ადგილი ჰქონდეს დივერსიასაც – მსგავსი მეთოდი გამოიყენება ჰიბრიდული ომის დროს.

არანაკლები სიმწვავით დგას ეკოლოგიური პრობლემა დასავლეთის ცალკეულ რაიონებში (ზესტაფონი, ტყიბული, ჭიათურა) და შემოგარენში. დასავლეთის რეგიონის სოფლების მოსახლეობა წლებია საუბრობს გამოწვევებზე, რაც მათ დასახლებულ პუნქტებში დგას ჰაერისა და ნიადაგის დაბინძურების, საყოფაცხოვრებო სავარგულების გამოუსადეგრად გადაქცევის თუ ადგილზე მოწეული პროდუქტის ხარისხთან დაკავშირებით.

старые покрышки-ის სურათის შედეგი

ასევე, აუცილებლად უნდა შევეხოთ თბილისის ძირითად პრობლემას, სახელდობრ: თბილისის ცენტრში ბოლო ორი ათწლეულის მანძილზე, მდინარე მტკვრის ნაპირას ჩამოყალიბებული ელიავას ბაზრობა და მიმდებარე განვითარებები დიდ საფრთხეს უქმნის მოსახლეობის ჯანმრთელობას, ასევე არსებული საცხოვრებელი და ბუნებრივი გარემოს დეგრადირებას იწვევს.

ელიავას ბაზრობის მიმდებარე ტერიტორიებზე ხდება მეორადი საბურავების დაწვა და მისი გადამუშავება (აქვე მინდა აღვნიშნო და, თუ არ ვცდები, ამ ტერიტორიის ნაწილი ორი პარლამენტარის საკუთრებაში იმყოფება), მიღებულ რეზინას იყენებენ ბავშვების გასართობი ტერიტორიების რბილი საფარის დასაგებად (საზღვარგარეთ სუფთა კაუჩუკს იყენებენ), რაც დიდ ზიანს აყენებს იქ მოთამაშე ბავშვებს. მაშასადამე აუცილებელია მოცემული ტერიტორიის (ელიავას ბაზრობა) ეკოლოგიური და სარეკრეაციო პოტენციალის გააზრება და არეალზე შესაბამისი საქალაქო განვითარებების დაგეგმვა, ხოლო თავისი განლაგების გათვალისწინებით კი, ტერიტორია საქალაქო მნიშვნელობის პარკის მოწყობის პოტენციურ არეალად უნდა გადაიქცეს.

რა შედეგი მოყვება ტყვიის შემცველობის ზრდას ადამიანის ორგანიზმში: მოზარდებში გონებრივი განვითარების შეფერხება; თექვსმეტი და მეტი წლის ახალგაზრდებში სექსუალური პოტენციალის დაცემა, რაც იწვევს ნარკოტიკებისადმი მიდრეკილების ზრდას; გულის და ნერვიული სისტემის დაავადებას.

ზემოთ აღნიშნულიდან გამომდინარე და როგორც კარგი მკურნალი იტყოდა – ავადმყოფობის გამომწვევი მიზეზი თუ არ დავადგინეთ, სნეულებას ვერ ვუმკურნალებთ .

ჩვენი შვილები ჩვენი იმედია, არ მოვკლათ იმედი!!!

ეკონომიკის მეცნიერებათა დოქტორი, ინჟინერ–გეოლოგი,

საქართველოს საინჟინრო აკადემიის წევრ–კორესპოდენტი,

პუბლიცისტი ვაჟა კაკაბაძე.




სააღდგომოდ იერუსალიმში ჩასვლის მსურველებს საქართველოს საელჩო აფრთხილებს


დაკავშირებული სურათისაქართველოს საელჩო ისრაელში მოქალაქეებს აფრთხილებს და განცხადებას ავრცელებს.

“2019 წელს ცეცხლის გადმოსვლის ცერემონია გაიმართება 27 აპრილს, მაცხოვრის ტაძარში, იერუსალიმის ძველ ქალაქში. ათასობით მომლოცველი დაესწრება ცეცხლის გადმოსვლის ცერემონიას მსოფლიოს სხვადასვხა ქვეყნიდან, მათ შორის სხვადასხვა ქვეყნების ოფიციალური დელეგაციები.

მოქალაქეთათვის მნიშვნელოვანია იცოდნენ, რომ ყოველ წელს ისრაელის პოლიცია ცეცხლის გადმოსვლის ცერემონიის დროს უსაფრთხოებისათვის იღებს განსაკუთრებულ ზომებს. ამ დღისათვის ყველა მოქალაქეს, რომელსაც აქვს ჯანმრთელობის ცუდი მდგომარეობა, მოსალოდნელი ხალხის სიმრავლის გამო, რეკომენდებულია თავი შეიკავონ მაცხოვრის ტაძარში მისვლისგან.

ის პირები, რომლებიც დაესწრებიან ცეცხლის გადმოსვლის ცერემონიას, უნდა დაემორჩილონ პოლიციის პირველივე მითითებას ადგილის შეცვლასთან დაკავშირებით. დაუშვებელია იმ პირებისათვის წინააღმდეგობის გაწევა, რომელთაც ევალებათ ტაძარში და მასთან მისასვლელ გზებზე წესრიგის დამყარება.

გასათვალისწინებელია ასევე ის გარემოება, რომ მოქალაქის მხრიდან, თუნდაც თხოვნის ტონით შეპასუხება შეიძლება ჩაითვალოს, როგორც სამართალდამცავი ორგანოს მიმართ წინააღმდეგობის გაწევად და შესაბამისად ხალხის სიმრავლის გამო და წესრიგის დამყარების მიზნით შეიძლება გამოყენებულ იქნეს ძალა.

აუცილებელია ყველა მოქალაქე მოერიდოს სასულიერო პირებთან კამათს, რომელთა ფუნქციებშიც შედის ტაძარში წესრიგის დამყარება.

მოქალაქეები უნდა მოერიდნონ იერუსალიმის ძველ ქალაქში ე.წ. სპეციალური „ბრასლეტების“ – ტაძარში შესვლის საშვების შეძენას. იერუსალიმის პოლიციის თანამშრომლების მიერ მსგავსი ტიპის გაყალბებული „ბრასლეტების“ მქონე პირები გამოძევებულ იქნებიან მაცხოვრის ტაძრიდან.

იმ შემთხვევაში, თუ მოქალაქე დაიკარგა ძველ ქალაქში, დაუყოვნებლივ უნდა მიმართოს პოლიციას შემდეგ ტელეფონის ნომერზე: +972 26226100 (პოლიციის თანამშრომელი მიიყვანს მას უახლოეს პოლიციის განყოფილებაში) და დაუკავშირდეს საქართველოს საელჩოს საკონსულო სამსახურს.

ამასთან გასათვალისწინებელია, რომ სავიზო და სხვა სახის საზღვრის კვეთის მოთხოვნები საკმაოდ რთულია. დარწმუნდით, რომ გამომგზავრებამდე კარგად გაეცანით ისრაელის საემიგრაციო პოლიტიკას. ისრაელის დღესასწაულების და საზაფხულო ტურისტული სეზონის დღეებში გაითვალისწინეთ, რომ დაგჭირდებათ დამატებითი დრო, რათა გაიაროთ უსაფრთხოების კონტროლი აეროპორტში. ამ პერიოდში ისრაელი აძლიერებს უსაფრთხოების ზომებს. დამატებითი სასარგებლო ინფორმაცია ისრაელის საზღვრის კვეთისა და სხვა საკითხებთან დაკავშირებით იხილეთ შემდეგ ბმულზე: israel.mfa.gov.ge ” – აღნიშნულია საელჩოს მიერ გავრცელებულ ინფორმაციაში.




რა საფრთხე ემუქრება ხადას ხეობას სატრანზიტო გზის გაყვანის შემთხვევაში?


 Imageგასული წლის ზაფხულში ცნობილი გახდა , რომ ქვეშეთი-კობის გზაზე  დაგეგმილია 2 ზოლიანი ასფალტ-ბეტონის – 22.7 კმ. გზის, 6 ხიდისა და 5 გვირაბის , მათ შორის ერთი 9 კმ-იანი გვირაბის მშენებლობა. გვირაბი, სოფელ წკერესთან დაიწყება და სოფელ კობთან დასრულდება..

„ქვეშეთი-კობის მონაკვეთი, სატრანზიტო მნიშვნელობის  ჩრდილო-სამხრეთის დერეფანის  ნაწილია. ზამთარში ზვავსაშიშროებისა და რთული მეტეოროლოგიური პიროებების გამო საავტომობილო მოძრაობა ხშირად იკეტება, ფერხდება სატრანზიტო მიმოსვლა. ახალი გზა მოაგვარებს არსებულ პრობლემებს. პროექტის დასრულების შემდეგ, ქვეშეთიდან კობამდე გადაადგილების მანძილი 12 კმ-ით შემცირდება და 1 საათიანი მგზავრობის ნაცვლად აღნიშნული გზის გავლა 20 წუთში იქნება შესაძლებელი.“– ნათქვამია საქართველოს გზების დეპარამენტის ინფორმაციაში.

უწყების განმარტებით, გზა გაუადვილებს ადგილობრივ მოსახლეობას კავშირს გარე სამყაროსთან. გზის არსებობამ შესაძლებელია ხელი შეუწყოს მოსახლეობის დაბრუნებას ხეობაში, მცირე ბიზნესის განვითარებას და ხეობის გაცოცხლებას. საავტომობილო გზების დეპარტამენტის თავმჯდომარის გიორგი სეთურიძის ინფორმაციით, მეორე ალტერნატიული მიმართულების დამუშავებაც ხდება –  მლეთადან არაგვი ჰესის მიმართულებით, შემდეგ გვირაბი და გასვლა თრუსოს ხეობაში, სოფელ კობთან.

პროექტის პირველი ტენდერი ჩავარდა, გამოცხადებულია მეორე, რომლის ვადა 2019 წლის 22 აპრილს იწურება. გეგმის თანახმად ახალი გზის მშენებლობა 2022 წელს უნდა დასრულდეს.

ცეცხლიჯვარი 2
ცეცხლიჯვრის კომპლექსი

აღნიშნულმა პროექტმა ადგილობრივ მოსახლეობაში არაერთგვაროვანი რეაქცია გამოიწვია. გზის მშენებლობა საფრთხეს უქმნის არა მხოლოდ ეკოლოგიას. საფრთხე ემუქრება სოფლის  სახლებს, რომელბიც მეტწილად  მშრალი წყობით, ან კირქვით არის ნაგები. რაც ყველაზე მთავარია, საფრთხე ექმნება ხეობაში არსებულ მრავალ ისტორიულ ძეგლს. ხეობა გამოირჩევა მდიდარი ხუროთმოძღვრული მემკვიდრეობით – ციხე-სიმაგრებით, ტანწყობილი  ზურგიანი  კოშკებით, რთული საცხოვრებელი თუ საკულტო ნაგებობებით. მათი უმეტესი ნაწილი რესტავრაციას საჭიროებს და არა უდიერ მოპყრობას. ხადას ხეობის ერთერთი შესანიშნავი საფორტიფიკაციო ნაგებობის,  ცეცხლიჯვრის კომპლექსის (IX-X ს.ს.) კედელზე უკვე გაჩენილია მსხვილი ბზარი და მცირე გეოლოგიურმა აფეთქებამაც შესაძლოა მთლად დააზიანოს.

შეგახსენებთ, 2002 წელს ჩრდილოეთ ოსეთში, კარმადონის ხეობაში ფილმს იღებდნენ, გადამღები ჯგუფი პიროტექნიკას იყენებდა. ფილმის დასრულება ვერ მოხერხდა – ერთ დილას მყინვარ კოლკას ყინულის გიგანტური მასა მოწყდა და მთლიანი ხეობა დაფარა, ცოცხლად დამარხა სოფლები, სანატორიუმები და ფილმის გადამღები ჯგუფი…

გარემოსდაცვითი საკითხების ექსპერტის, ორგანიზაცია „საქართველოს მწვანეები-დედამიწის მეგობრების“ თავმჯდომარის, ნინო ჩხობაძის განცხადებით, ეკოლოგიური თვალსაზრისით მთავრობას  მაქსიმალურად მიაწოდეს ყველა საჭორო რეკომენდაცია.

„კარგი პროექტია, ჩვენს მხრიდან არანაირი წინააღმდეგობა არ არის. რაც ეხება უშუალოდ ხადას ხეობას და იქ არსებულ ისტორიულ–კულტურულ მემკვიდრეობას, იყო ლაპარაკი, რომ ძალიან ფრთხილად იმოქმედებენ. მე ვესწრებოდი რამოდენიმეჯერ განხილვებს და ყველა საკითხი, რომელიც ეხება ეკოლოგიურ სფეროს, განხილულია და ჩადებულია პროექტში.“– აღნიშნა ნინო ჩხობაძემ.

საპირისპირო აზრს გამოთქვამს ეკონომიკის მეცნიერებათა დოქტორი, ინჟინერ-გეოლოგი, საქართველოს საინჟინრო აკადემიის წევრ-კორესპოდენტი, პროფესორი, მწერალი ვაჟა კაკაბაძე . მისი შეფასებით, ხეობაში მსგავსი პროექტის განხორციელება სასტიკად დაუშვებელია, რადგან ეს მეწყერულ პროცესებს გამოიწვევს. მისი თქმით, პროქტს არა მხოლოდ ეკოლოგიური, არამედ პოლიტიკური და ეონომიკური ასპექტები ერთვის თან.

„რამდენად მნიშვნელოვანია ეს პროექტი ქვეყნისთვის პოლიტიკური თვალსაზრისით? ცნობილია, რომ საქართველო სომხებისთვის სატრანზიტო გზას წარმოადგენს.  ეკონომიკის სამინისტროში ჩემი მუშაობის პერიოდში ( 1994–95 წ.წ.) ჯერ კიდევ შევარდნაძის დროს,  სომხებმა მოითხოვეს გზის გახსნა აფხაზეთის გავლით. მე თვითონ უშუალოდ ვიღებდი ამაში მონაწილეობას, მაშინ მათ უარი  ეთქვა საქართველოს მხრიდან.  რატომ სურთ სომხებს აფხაზეთის გავლით რკინიგზის გაყვანა? იმოტომ რომ მათ ინტერესები აქვთ აფხაზეთში, ამჟამად ისინი იქ უმრავლესობას წარმოადგეგნენ. თავისთავად,  რუსებსაც აქვს ინტერესები სომხეთშიც და აფხაზეთშიც.  რუსეთს სურს თავისი ინტერესები სწრაფად გადატიტანოს  სომხეთში.

Картинки по запросу ვაჟა კაკაბაძე
ვაჟა კაკაბაძე

რადგან ახალა ისევ წამოიჭრა ეს საკითხი და საქართველოს მთავრობამ კვლავ უთხრა უარი სომხეთს, გადავიდნენ ამ პროექტზე. სომხეთის ინტერესი მხოლოდ ეკონომიკურია,  ხოლო რუსეთის –  როგორც სამხედრო, ასევე ეკონომიუკური. თქვენ ძალიან კარგად იცით, რომ რუსები ყველანაირად ცდილობენ, კარგი ურთიერთობა დაამყარონ ირანთან და ყველანაირი პირობა შეუქმნეს, რათა ირანს ბირთვული იარაღი ქონოდა. ამგვარად, იარანის დახმარიბით თურქეთზე ახდენენ ზემოქმედებას. გარდა ამისა,  რუსები ეხმარებიან სომხებს, თავისი ინტერესები განახორციელონ აზერბაიჯანში, სადაც რამოდნიმე ტერიტორიაზე  აცხადებენ პრეტენზიას.

რაც ეხება  გეოლოგიურ და ეკოლოგიურ ასპექტს – რაც უფრო მაღლა გავა გზა, მით უფრო მეტ საშიშროებას გამოიწვევს, იმიტომ რომ ხეობაში ისეთი  ქანებია განვითარებული, როგორიცაა  თიხა–ფიქალი,  ქვიშიანი ფიქალი, თიხები, რომლებისათვის დამახასიათებელია წყლის გატარება ანუ უფრო ადვილად ექვემდებარებიან მეწყერულ პროცესებს. რა დიდი კედელი უნადა აშენდეს, რომ დაიცვას ეს მთელი მასა? ძალიან რთულია ამის განხორციელება, მაშინ ქედზე უნდა გაიყვანონ, რაც უფრო ძვირი დაუჯდებათ. შეუსრულებელი პროექტია. არც ერთ პოლიტიკურ პარტიას არ ვეკუთვნი და, აქედან გამომდინარე, ობიექტურად ვმსჯელობ – ეს მთავრობა დაიწყებს ამის განხორციელებას და ვერ მოასწრებს.  ვთქვათ, შეიცვალა მთავრობა,  და ის დაიწუნებს პროექტს, წყალში ჩაეყრებათ ფული.“ – ამტკიცებს ვაჟა კაკაბაძე.

ექსპერტი  ყურადღებას კლიმატურ ცვლელებებზეც ამახვილებს და განმარტავს, რომ  დასავლეთის  ქვეყნებში მსგავსი პროექტების მომზადებისას  ითვალისწინებენ  გლობალური დათბობის ფაქტორს. ამის გათვალისწინების გარეშე არ შეიძლება ასეთი პროექტის განხორციელება, ხოლო საქართველოს  მთავრობას ამის გაკეთება ეზარება.

„სვანეთში  მოსახლეობამ არ მისცა ჰესის აშენების უფლება.  ჰესების მოწინაღმდეგე არ ვარ, უნდა აშენდეს, მაგრამ მცირე – ხაზს ვუსვამ – მცირე ჰიდროელექტროსადგურები. დიდი ჰესი ზრდის აორთქლების სარკეს, ანუ წაყალი რომ დაგუბდება, აორთქლების ტერიტორია გაიზრდება, და შეიძლება სვანეთში  არა, მაგრამ, ვთქვათ, სეტყვის ან წვიმის სახით მოვიდეს კახეთში და გაუნადგუროს გლეხს მოსავალი.

ჟინვალჰესზე წყლის დაგუბება არ შეიძლებოდა, რადგან ამან გაზარდა არსებული მეწყერული პროცესები. ასეთივე საშიშრეობას შექმნის ეს ახალი პროექტი ხადას ხეობაში.

დევდორაკის ხეობაში რომ დაიწყეს ჰესის მშენებლობა, ესეც შეცდომა იყო. თავის დროზე მე ვმუშაობდი ამ ხეობაში. წყალი რომ დაგროვდებოდა ნიადაგში, მცირე აფეთქებებს ვაწარმოებდით,   დაგროვილი ნაშალი ქვემოდ ჩამოდიოდა  და წყალს გაქონდა. საბჭოთა კავშირის პერიოდშიც განიზრახეს ხეობაში ჰესის აგება, მაგრამ გეოლოგიური დასაბუთებით იქ მცირეელექტროსადგურის აშენებაც სასტიკად იქნა აკრძალული.

იგივე მინდა ვთქვა ვერის ხეობასთან დაკავშირებით – გეოლოგებმა ოდითგანვე ვიცოდით,  რომ იქ მეწყერული პირობები იყო, აქაც მცირე მუხტით ხდებოდა მასის ჩამოშლა, რომელიც ვერეს წაყალს მიქონდა და საშიშროება აღარ იქმნებოდა. ახლა კი არ გაითვალისწინეს ეს გარემოება, გადაუკეთეს წყალს გზა და წვრილი მილები ჩაყარეს ვარაზის ხევში. გავა 20–25 წელი და ზუსტად იგივე შაშიშროება შეიქმნება.

როცა თურქეთმა მის ტერიტორიაზე გამავალ მდინარე ჭოროხზე ჰიდროელექტრო სადგურის მშენებლობა დაიწყო, საერთაშორისო მოთხოვნის შესაბამისად, როგორც მეზობელი სახელმწიფო,  ჩვენგან მოითხოვა აშენებაზე ნებართვა, რამეთუ იცოდა, რომ ზღვაში ნაშალის ჩამოტანა შემცირდებოდა, რაც საფრთხეს შეუქმნიდა ბათუმის ზღვის სანაპიროს. ეკონომიკის სამინისტროსგან  და უშუალოდ ჩემგან თურქეთის მოთხოვნაზე დაიწერა უარყოფითი დასკვნა, ხოლო გარემოს დაცვის სამინისტროდან (მაშინ მინისტრი იყო ნინო ჩხობაძე) წავიდა დადებითი დასკვნა; და, დღეს უკვე გვაქვს უარყოფითი შედეგები –  ყოველი პატარა შტორმის შემდეგ ირეცხება ბათუმის სანაპირო – აი, ეს გააკეთა ნინო ჩხობაძემ.“– აცხადებს ვაჟა კაკაბაძე.

მეცნიერის განმარტებით, ყოველი ტენდერის ჩატარება გარკვეული თანხა ჯდება, აქედან გამომდინარე ერთხელ და ორჯერ ჩატარებული ტენდერით ინტერესს ვუკარგვათ ინვესტორს, სახელს ვიფუჭებთ. მისი თქმით, პროექტისთვის განსაზღვრული თანხით  საქართველოს სამხედრო გზის ფერდობის გასწვრივ სადრენაჟო სისტემა რომ გააკეთონ და გაამაგრონ კედლები, ბევრად რაციონალური ნაბიჯი იქნება.

„რატომ გააკეთეს საქართველოს სამხედრო გზა იქ , სადაც არის და არა სხვაგან? თავიდანვე ამ საკითზე შეიქმნა ძალიან ბევრი ნაშრომი, ყველაზე კარგი ვარიანტი იყო ეს ადგილი. მაშინ მართლა ინჟინრები მუშაობდნენ, მართლა მიმდინარეობდა შესწავალა. ახალა? არსებობს თანხა, ამ თანხის ათვისება სურთ და სად გაიტანონ არ იციან.  კობთან,  გვირაბიდან რომ გავდივართ, ტრავერტინებია, რომლებიც რამოდენიმე წლის წინ გადაჭრეს, ეს უდიდესი დანაშაულია. ეს რომ გაიგოს მსოფლიოს ბუნების დაცვის საზოგადოებამ, დააჯარიმებენ ამ იდიოტებს. ტრავერტინების ჩამოყალიბებას წლები სჭირდება. მათი დაზიანება დიდი შეცდომა იყო და ახლაც უშევებენ შეცდომას ჰადას ხეობასთნ მიმართებაში. დარწმუნებული ვარ,  გეოლოგიური კვლევა ჩატარებული არ არის.

ილია ჭავჭავაძეს რა აქვს ნათქვამი – ვისაც თავისი წარსული  დავიწყებულია აქვს, მას მომავალი არ ექნება. არ შეიძლება წარსულის განადგურება. ასეთი კოშკების,  ეკლესიების დანგრევა და მოსახლეობისთვის რთული პიროებების შექმნა. ამ წარსულზე იზრდება ჩვენი მომავალი თაობა. ყოველთვის გული მწყდება, რომ ვხედავ  ჟინვალჰესში ჩაძირულ ეკლესიას.

რაც შეეხება ხეოაბში არსებული ოქროს შესახებ გავრცელებულ ინფორმაციას, არა მგონია იქ იყოს ოქროს საბადო, თუმცა  მცირე გამოვლინება სხვადსახვა გეოლოგიური საბადების არის დაფიქსირებული.

ჩემი პირდაპირი თხოვნაა მთვარობის მიმართ  –  თუ ამდენი თანხაა გაგაჩნიათ, ააშენეთ  საწარმო ხადას ხეობაში,  სადაც ადამიანები დასაქმდებიან და მიიღებენ გარკვვეულ შემოსავალს, წელში გაიმართებიან. მთავრობას, პარლამენტს ირჩევს ხალხი და ვალდებულნი არიან ემსახურონ ხალხს და არა თავიანთ ინტერესებს.“– აცხადებს ვაჟა კაკაბაძე.

ასმათ ჯაღმაიძე

www.premiumi.ge




დღეს საქართველოს პირველი პრეზიდენტის  დაბადების დღეა


Похожее изображениеდღეს საქართველოს პრეზიდენტის დაბადების დღეა, მას 80 წელი შეუსრულდებოდა.

ზვიად გამსახურდია საქართველოს პრეზიდენტი 1991 წლის მარტში გახდა.

1993 წლის ოქტომბრის დამლევს ის და მისი რამდენიმე მხარდამჭერი იძულებულნი გახდნენ თავი სამეგრელოს მთიანი ნაწილისათვის შეეფარებინათ. 1993 წლის 31 დეკემბერს საქართველოს პრეზიდენტი დაიღუპა ხობის რაიონის სოფელ ხიბულაში. ამ ფაქტზე 2004 წლიდან მიმდინარეობს გამოძიება.

ზვიად გამსახურდიას მმართველობის დროს ჩატარებულ რეფერენდუმზე ამომრჩეველთა უდიდესმა უმრავლესობამ დადებითი პასუხი გასცა კითხვას: „თანახმა ხართ თუ არა, აღდგეს საქართველოს სახელმწიფოებრივი დამოუკიდებლობა 1918 წლის 26 მაისის აქტის საფუძველზე“. სწორედ რეფერენდუმზე მიღებული შედეგები გახდა საქართველოს სახელმწიფო დამოუკიდებლობის გამოცხადების საფუძველი.

რეფერენდუმში მონაწილეობა მიიღო სამხრეთ ოსეთის ყოფილი ოლქისა და აფხაზეთის ავტონომიური რესპუბლიკის მოსახლეობამაც. საქართველოს მოსახლეობამ გამოხატა თავისი არჩევანი და 3,672,403 ამომრჩევლიდან 3,295,493-მა ამომრჩეველმა ხმა მისცა საქართველოს სახელმწიფოებრივი დამოუკიდებლობის აღდგენას 1918 წლის 26 მაისის საქართველოს დამოუკიდებლობის აქტის საფუძველზე. 9 აპრილს უმაღლესი საბჭოს სესიაზე მიიღეს საქართველოს დამოუკიდებლობის აქტი. 1991 წლის 5 აპრილს გამოქვეყნდა რეფერენდუმის შემაჯამებელი შედეგები.

საქართველოს პრემიერ-მინისტრმა მამუკა ბახტაძემ,  პარლამენტის თავმჯდომარემ ირაკლი კობახიძემ და მთავრობის წევრებმა საქართველოს პირველი პრეზიდენტის ზვიად გამსახურდიას საფლავი, მისი 80 წლის იუბილესთან დაკავშირებით, გვირგვინით შეამკეს.

ზვიად გამსახურდიას ხსოვნას პატივი მიაგეს ასევე „ძალა ერთობაშიას“ წევრებმა.  მთაწმინდის მწერალთა და საზოგადო მოღვაწეთა პანთეონში საქართველოს პირველი პრეზიდენტის  საფლავი პარტიის წევრებმა ყვავილებით შეამკეს და ზვიად გამსახურდიას ღვაწლსა და დამსახურებებზე ისაუბრეს.

 




ამ დღეს კონსტანტინოპოლს სტამბოლი დაერქვა – რატომ გაქრა ბიზანტია


Похожее изображение1930 წლის 28 მარტს საბოლოოდ დაესვა წერტილი ბიზანტიური იმპერიის დიდებას – 89 წლის წინ ქალაქებს კონსტანტინოპოლს და ანგორას ახალი, თურქული სახელები მიენჭა – სტამბოლი და ანკარა. 

კონსტანტინოპოლი (ბერძ. Κωνσταντινούπολις) —  საუკუნეების განმავლობაში ბიზანტიის იმპერიის დედაქალაქი იყო (ქალაქის ძველი ბერძნული სახელი იყო ბიზანტიუმი). ქალაქი  სტრატეგიულად მდებარეობდა ოქროს რქისა და მარმარილოს ზღვის უბეში, იმ ადგილას სადაც ევროპა აზიას ხვდება. მან წარმატებულად გაართვა თავი ძველი რომის გადმოცემულ

მემკვიდრეობას და უდიდესი და უმდიდრესი ქალაქი იყო ევროპაში მთელი შუა საუკუნეების განმავლობაში, რის გამოც მას „ქალაქთა დედოფალი“ შეარქვეს.

1453 წლის 29 მაისს, ოსმალეთის იმპერიის ერთ-ერთმა ცნობილმა და გამოჩენილმა სულთანმა, მეჰმედ II-მ კონსტანტინოპოლის ალყა დაიწყო. სულთან მეჰმედის წინაპრებს არაერთი მცდელობა ჰქონდათ ბიზანტიის იმპერიის დედაქალაქის აღების, მაგრამ ყოველი მცდელობა უშედეგოდ სრულდებოდა. მაგრამ ამ შემთხვევაში ბიზანტიის იმპერიის დედაქალაქს აღარ გაუმართლა და ოსმალებმა მისი აღება მოახერხეს. ეს იყო ოსმალეთის იმპერიის ისტორიაში ერთ-ერთი უდიდესი გამარჯვება.

ისტორიკოსების შეფასებით კონსტანტინოპოლის დაცემა შიდაფეოდალური დაპირისპირების, საზოგადოებაში გავრცელებული მანკიერების და მძიმე ეკონომიკური პირობების შედეგად მოხდა.

ამაოდ შეაგონებდნენ ჭეშმარიტი მოძღვრები ერსა და ბერს, ამაოდ აფრთხილებდნენ, ღვთის სასჯელი არ აგვცდებაო – სამღვდელობა უფრო მეტად ეფლობოდა უზნეობაში, მრევლი კი განცხრომაში ატარებდა დროს.  დაივიწყეს  წინაპართა სჯული. წარჩინებული და განათლებული ახალგაზრდობა კათოლიციზმის იდეებს იზიარებდა და რომის ტახტს ემხრობოდა. ძალზე გავრცელდა სხვდასხვა ერესი, ცრურწმენა, მკითხაობა, მათ შორის  – მართლმადიდებლურ ხატზებზე.

Картинки по запросу падение константинополя

ამაოდ თხოვდა დახმარებას იმპერატორი კონსტანტინე ქედმაღალ ფეოდალებს, ფინანსურად დახმარებოდნენ ქვეყანას იარაღის შეძენაში. პასუხად კადნიერი  თავად–აზნაურები საეკლესიო ოქროს ნივთების გაყიდვას ურჩევდნენ მეფეს …როდესაც დაპყრობილი ქალაქის კანტიკუნტად დარჩენილმა დიდებულებმა სულთანს ოქროს ზოდები მიართვეს, მას ძალზე გაუკვირდა – ამდენი ოქრო თუ გქონდათ, იმპერატორ კონსტანტინეს რატომ არ უბოძეთ, რათა  ჯარი შეეკაზმა? აღსანიშნავია, რომ იმპერატორმა  უბრალო მეომარივით, ყველასგან მიტოვებულმა, ქუჩის შეტაკებებში დაასრულა სიცოცხლე – ხმლით ხელში იცავდა საკუთარ ქალაქს. ხოლო ოსმალებმა კონსტანტინოპოლის აღებისას  სულ 3 მეომარი დაკარგეს…

კონსტანტინოპოლის დაპყრობის შემდეგ, ბიზანტიის იმპერია საბოლოოდ გაქრა რუქიდან, ხოლო ოსმალეთის სასულთნო ოსმალეთის იმპერიად ჩამოყალიბდა. ოსმალებმა უწოდეს მას სახელი „სტამბოლი“ და დედაქალაქად გამოაცხადეს.

ალექსანდრე მგალობლიშვილი

premiumi.ge 




ოკუპირებული რეგიონები ფინანსურად დამოკიდებული არიან რუსეთის ბიუჯეტზე


ოკუპირებული რეგიონები ფინანსურად კვლავაც დამოკიდებული არიან რუსეთის ფედერაციის ცენტრალურ ბიუჯეტზე, – ამის შესახებ სახელმწიფო უსაფრთხოების სამსახურის 2018 წლის ანგარიშშია ნათქვამი, რომელიც უწყებამ საქართველოს პარლამენტში წარადგინა.

უწყებაში განმარტავენ, რომ ოკუპირებულ აფხაზეთში პროცესების სამართავად საოკუპაციო ძალა აქტიურად იყენებს ხელოვნურად შექმნილ „პოლიტიკურ-ეკონომიკურ“ არასტაბილურობას და დე ფაქტო რეჟიმს მისთვის სასურველი გადაწყვეტილებების მიღებისკენ უბიძგებს. სუს-ში ასევე აღნიშნავენ, რომ ცხინვალის რეგიონში მოქმედი დე ფაქტო რეჟიმი ღიად უჭერს მხარს ოკუპირებული ტერიტორიის რუსეთის ფედერაციასთან გაერთიანებას.

„ანექსიის პროცესის ჭრილშია განსახილველი ე.წ. საბაჟო სამსახურების სინქრონიზაციის საკითხი. საანგარიშო პერიოდში ასევე გრძელდებოდა ოკუპირებულ რეგიონებში რუსეთის მოქალაქეობის ფლობის წახალისება და მისი გამარტივებული წესით მიღების მექანიზმების შემუშავება.

ოკუპირებული რეგიონები ფინანსურად კვლავაც დამოკიდებული არიან რუსეთის ფედერაციის ცენტრალურ ბიუჯეტზე. არსებული მონაცემებით, საანგარიშო პერიოდში რუსეთის ფედერაციიდან მიღებული პირდაპირი ფინანსური დახმარების წილმა დე ფაქტო აფხაზეთის ე.წ. სახელმწიფო ბიუჯეტში დაახლოებით 45 პროცენტი (64 მლნ აშშ დოლარი), ხოლო ცხინვალის რეგიონის „ბიუჯეტში“ დაახლოებით 86 პროცენტი (113 მლნ აშშ დოლარი) შეადგინა. ე.წ. ბიუჯეტების დარჩენილი წილის შევსება კი რუსეთის მიერ გამოყოფილი არაპირდაპირი ფინანსური დახმარების მეშვეობით განხორციელდა“, – აღნიშნულია სუს-ის ანგარიშში.

უწყების ცნობით, საანგარიშო პერიოდში რუსეთის ფედერაცია კვლავ იყენებდა ოკუპირებულ რეგიონებს საკუთარი ეკონომიკური, ფინანსური და სამხედრო მიზნებისთვის.

„ხაზგასასმელია დე ფაქტო ლიდერების გახშირებული ვიზიტები უკრაინის ოკუპირებულ რეგიონებში და „ურთიერთდახმარების“ მიზნით დაწყებული თანამშრომლობა (მათ შორის, სამხედრო სფეროში). აღსანიშნავია, რომ 2018 წელს, ოკუპირებული ცხინვალის რეგიონის მსგავსად, ოკუპირებულ აფხაზეთში ოპერირება დაიწყო რუსული საბანკო სექტორის წარმომადგენლობამ, რომელსაც, დიდი ალბათობით, რუსეთის ფედერაცია უკანონო ფინანსური ოპერაციებისთვის იყენებს. ამავე პერიოდში დაიწყო ე.წ. აფხაზური საბანკო ბარათების გამოყენება რუსეთის ფედერაციის ტერიტორიაზე. საქართველოს ოკუპირებული ტერიტორიების ეკონომიკური ურთიერთობები გააქტიურდა სირიის არაბთა რესპუბლიკასთან, რომელმაც 2018 წელს აფხაზეთისა და ცხინვალის რეგიონის ე.წ. დამოუკიდებლობა აღიარა“, – ნათქვამია საქართველოს სახელმწიფო უსაფრთხოების სამსახურის 2018 წლის ანგარიშში.