თერჯოლის მუნიციპალიტეტის გამგებელმა თეიმურაზ ჯაფარიძემ მედიის წარმომადგენლებს სიტყვიერი შეურაცხყოფა მიაყენა და ხელით შეეხო. შემთხვევა რამდენიმე საათის წინ გამგებლის კაბინეტში მოხდა.
გავრცელებული ინფორმაციით, ჟურნალისტები თერჯოლაში “იეჰოვას მოწმეებსა” და მართლმადიდებელ მრევლს შორის მოსალოდნელ სერიოზულ დაპირისპირებაზე გავრცელებული ინფორმაციით დაინტერესდნენ და დეტალების გასარკვევად გამგებელს ეწვივნენ. გამგებელმა თეიმურაზ ჯაფარიძემ კაბინეტში, საინფორმაციო სააგენტო “ნიუპრესის”, “ქუთაისინიუსის”, “GNnews”-ის და “ქუთაისი თუდეის” ჟურნალისტებს სიტყვიერი შეურაცხყოფა მიაყენა და ხელით შეეხო.
ჟურნალისტები თერჯოლის რაიონულ სამმართველოში არიან გადაყვანილი.

“ოფიციალური ტოკიო მეორე მსოფლიო ომში ჩადენილი ქმედებების გამო ღრმა სინანულს განიცდის და ბოდიშს მოიხდის ” , – განაცხადა იაპონიის პრემიერ მინისტრმა სინძო აბემ ჯაკარტაშიმ აზიისა და აფრიკის ქვეყნების  მიმდინარე სამიტზე სიტყვით გამოსვლის დროს. 

“ჩვენ მშვიდობიანი  სახელმწიფოს პრინციპებს ვემხრობით. ამიერიდან  იარაღის უკონტროლო გამოყენება დაუშვებელი უნდა იყოს.” – აღნიშნა პრემიერმა.

იაპონია აზიისა და აფრიკის ქვეყნებისთვის 350 ათასი სპეციალისტის მომზადების პროგრამაში აპირებს ჩართვას, რადგან ამ ქვეყნების უმეტესობა დღეს იაპონიის ეკონომიკური პარტნიორია. “ინფრასტრუქტურულ და საგანმანათლებლო პროექტებში ერთობლივი მონაწილეობა გააძლიერებს და დააჩქარებს ამ ორი რეგიონის განვითარებას”,– მიაჩნია ქვეყნის პრემიერ მინისტრს სინძო აბეს. ბოლო 60 წლის მანძილზე აზიისა და აფრიკის ქვეყნებს ტოკიომ 300 მილიონ დოლარზე მეტი ეკონომიკური დახმარება გაუწია, ასევე 140 ათასამდე სპეციალისტი გააზავნა სხვადასხვა რეგიონში.

                 არქეოლოგიური გათხრების შედეგად ქვემო ქართლში აღმოჩენილია VI ათასწლეულით დათარიღებული, უძველესი ყურძნის წიპწები. კომპლექსური კვლევის შედეგად დადგინდა, რომ ველური ვაზი ადამიანმა პირველად საქართველოს ტერიტორიაზე მოაშენა და შემდეგ უკვე კულტურული ვაზისგან ღვინო დაწურა. კერამიკული ჭურჭლის ანაფხეკებში აღმოჩენილია კულტურული ვაზის მტვერის მარცვლები, რაც ამ ჭურჭელში ღვინის არსებობის დასტურია.

ეს ის პერიოდია, როდესაც  საზოგადოება გადადის ცხოვრების ახალ ეტაპზე.   იწყება მიწათმოქმედების აღმავლობა, ჩნდება პირველი მეურნეობის ნიშნები, იწყებენ ცხოველების მოშინაურებას და ა.შ.

სამუშაოების შედეგად გამოვლინდა საცხოვრებელი ნაგებობები, სხვადასხვა შრომის იარაღები, ჭურჭელი, სამეურნეო ორმოები და სხვა. აღმოჩენილი მასალის დამუშავების  და პალეო-ბოტანიკური კვლევის შედეგები კიდევ უფრო ნათელ სურათს შექმნის საქართველოს ტერიტორიაზე არსებული უძველესი მეღვინეობა-მევენეხეობის კულტურის შესახებ.

2014 წლიდან საქართველოს მთავრობის მხარდაჭერით მიმდინარეობს ღვინის ეროვნული სააგენტოს, საქართველოს ეროვნული მუზეუმისა და ასოციაცია „ქართული ღვინოს“  ერთობლივი საერთაშორისო პროექტი ,,ქართული ვაზისა და ღვინის კულტურის კვლევა’’, რომელიც ხელს უწყობს მსოფლიოში ქართული ვაზისა და ღვინის კულტურის განვითარებას და პოპულარიზაციას. პროექტის ფარგლებში მიმდინარეობს საქართველოს ტერიტორიაზე აღმოჩენილი სხვადასხვა ისტორიული ეპოქების ვაზის ნაშთების ლაბორატორიული შესწავლა, არქეოლოგიური მასალის ბიოქიმიური კვლევა, ასევე ნიადაგურ-კლიმატური და გენეტიკური რესურსების შესწავლა-დახასიათება და სხვა.

ქართველ მეცნიერებთან ერთად პროექტში მონაწილეობენ პენსილვანიის, მონპელიეს, მილანის, კოპენჰაგენის, ტორონტოს უნივერსიტეტის, ისრაელის ვაისმანის ინსტიტუტისა და მონპელიეს აგრარული კვლევის ინსტიტუტის მკვლევარები. პროექტის სამეცნიერო ხელმძღვანელიასაქართველოს მეცნიერებათა ეროვნული აკადემიის  წევრ-კორესპონდენტი დავით ლორთქიფანიძე. პროექტის მენეჯერი ლევან დავითაშვილი, ხოლო კოორდინატორი დავით მაღრაძე.

აღსანიშნავია, რომ  პროექტის შესახებ ამერიკელმა მწერალმა და ჟურნალისტმა პოლ სალოპეკმა „National Geographic”-ში ახლახანს გამოაქვეყნა სტატია “Ghost of the Vine – In Georgia, science probes the roots of winemaking“.

            22 აპრილს 18:00 საათზე საქართველოს ეროვნული მუზეუმის დიმიტრი შევარდნაძის სახელობის ეროვნულ გალერეაში  ქართული თეატრისა და კინოს გამორჩეული წარმომადგენლის, მსახიობ ჟანრი ლოლაშვილის პერსონალური გამოფენა  გაიმართება .

ექსპოზიციაზე წარმოდგენილი იქნება ავტორის მიერ სხვადასხვა წლებში შესრულებული 80–მდე ნამუშევარი, რომელთაც ჟანრული დიაპაზონის გარდა შესრულების მკვეთრად გამოხატული, ინდივიდუალური მხატვრული მანერა გამოარჩევს.

ჟანრი ლოლაშვილი 1959 წლიდან ხატავს.  მას გამოფენები ჰქონდა გერმანიასა და რუსეთში (საქართველოს კულტურის დღეების ფარგლებში). საქართველოში მონაწილეობდა ჯგუფურ გამოფენებში, ჰქონდა ასევე ერთი პერსონალური გამოფენა. მიუხედავად ამისა, ეს იქნება პირველი მასშტაბური ექსპოზიცია, რომლითაც ფართო საზოგადოება ჟანრი ლოლაშვილს, როგორც მხატვარს ისე გაიცნობს.

გამოფენა   საქართველოს კულტურისა და ძეგლთა დაცვის სამინისტროს,  შოთა რუსთაველის სახელობის აკადემიური თეატრის  და საქართველოს ეროვნული მუზეუმის  ძალისხმევით  მოეწყო და 30 აპრილამდე გაგრძელდება.

ქონების ეროვნული სააგენტოს თავმჯდომარის ინფორმაციით, ათონელის ქუჩაზე მდებარე რეზიდენციაში ერთ-ერთი სამთავრობო უწყება განთავსდება.
ამის შესახებ ეკატერინე სისაურმა ჟურნალისტებთან საუბრისას განაცხადა.
მისი განმარტებით, აღნიშნული შენობა დაპროექტებულია, როგორც უმაღლესი თანამდებობის პირის რეზიდენცია და შესაბამისად, გათვლილი არქიტექტურით და შიდა სივრცით.
“სწორედ ესაა მიზეზი, რომ დღემდე ამ შენობით არავინ დაინტერესდა. ვინაიდან შენობის კომერციული მიზნებისთვის მორგება საკმაოდ რთული იქნებოდა, სავარაუდოდ შენობის გაყიდვა გაჭირდება და მისი გამოყენება მოხდება რომელიმე სამთავრობო უწყების მიერ”, – განაცხადა სისაურმა, თუმცა არ დაუკონკრეტებია, რომელი უწყება განთავსდება ათონელის რეზიდენციაში.
არსებული ინფორმაციით, ათონელზე მდებარე რეზიდენციაში შესაძლოა, საგარეო საქმეთა სამინისტრო გადავიდეს.

საბერძნეთის კუნძულ იკარიის მცხოვრებლები თითქოს დროს ატყუებენ – კუნძული ანომალური ხანდაზმულობის ერთერთ წერტილად აღიარეს. საიდუმლო ძალზე მარტივია: თავიდან მოიშორეთ მაღვიძარები, უარი თქვით პრინციპებსა და პირობითობაზე, ნუ ბრაზობთ და ნუ ღელავთ უმნიშვნელო წვრილმანებზე…

მეტეხის გვირაბთან არსებული ხიდის კაპიტალური შეკეთება დაიწყო. სამუშაოების მიმდინარეობის პროცესი თბილისის მერმა დავით ნარმანიამ კეთილმოწყობის სამსახურის უფროსთან, ავთანდილ სუდაძესთან ერთად დაათვალიერა.
დავით ნარმანიას განცხადებით, ხიდი ლაბორატორიულად შემოწმდა და არსებული მძიმე მდგომარეობის გამო, მისი აღდგენა უმოკლეს ვადებში გახდა აუცილებელი. კვლევის შედეგად დადგინდა, რომ ხიდს, რომელსაც წლების განმავლობაში რეაბილიტაცია არ ჩატარებია, დაზიანებული აქვს სადეფორმაციო ნაკერები და ბურჯის რიგელები. მოშლილია, ასევე, ჰიდროიზოლაცია, მოაჯირები და დამცავი პარაპეტები, რაც უსაფრთხოების ნორმების სრული დარღვევაა.
“2 თვის განმავლობაში ძირითადი სამუშაოები დასრულდება, პირველ რიგში, ხიდი სრულად გამაგრდება, რომ გადაადგილება უსაფრთხო გახდეს. მთლიანად შეიცვლება ხიდის საფარი და მოწესრიგდება ტროტუარები. სამუშაოების დასრულების შემდეგ ხიდის ექსპლოატაციის ვადა მნიშვნელოვნად გახანგრძლივდება”, – განაცხადა დავით ნარმანიამ.
ავთანდილ სუდაძის თქმით, სარეაბილიტაციო სამუშაოები 24 საათიან რეჟიმში მიმდინარეობს. ამ დროისთვის გზის მხოლოდ ერთი ნაწილია დაკეტილი. მისი რეაბილიტაციის დასრულების შემდეგ ხიდის მეორე ნაწილის კაპიტალური შეკეთება დაიწყება. გზის აღნიშნულ მონაკვეთზე ტრანსპორტის მოძრაობა შესაძლებელია იალბუზის ქუჩიდან მარჯვენა სანაპიროს მიმართულებით. შეცვლილი მარშრუტით მოძრაობს როგორც კერძო, ისე საზოგადოებრივი ტრანსპორტი.

         ახლახანს სოციალურ ქსელებში გავრცელდა ვიდეოფრაგმენტი, სადაც იეზიდი გოგონას ოჯახში დაბრუნების კადრებია ასახული. როგორც ცალკეული პიროვნებები, ასევე საქველმოქმედო ორგანიზაციები ქალების ტყვეობიდან დასახსნელად სოლიდურ თანხებს არ იშურებენ.

მძევლად ჩავარდნილ ქალებს ისლამისტები საგანგებოდ შექმნილ ტყვეთა ბაზრობაზე ხარჭებად ყიდიან. ექსპერტების მონაცემებით, დღესდღეობით “ისლამის ხალიფატის” მესვეურების ხელში 4 000-მდე ტყვე ქალია. მოხალისეები ასევე ნინევიაში მცხოვრებ ქალბატონებს ქურთების დაცვის ქვეშ მყოფ ქალაქ კირკუკში ევაკუაციაში ეხმარებიან.

უსაფრთხოების თვალსაზრისით მოხალისეთა სახელები არ მჟღავნდება, ქველმოქმედებას ისინი ფარულად ეწევიან, ხოლო მათ მიერ განთავისუფლებული გოგონების და ქალების რიცხვი უცნობია.

აფრიკის დასავლეთში არსებული ყველაზე პატარა სახელმწიფოს გამბიის პრეზიდენტმა იაჰია ჯამემ ჰომოსექსუალიზმისთვის სამუდამო პატიმრობის განმსაზღვრელ კანონს მოაწერა ხელი.
დარჩენილი ცხოვრების დღეები ციხეში შესაძლოა გაატარონ, გეებმა, ლესბოსელებმა, პირებმა, რომლებმაც არაერთხელ მოიხადეს სასჯელი არატრადიციული კავშირისთვის და ასევე შიდცით დაავადებულებმა.
კანონპროექტის ამოქმედებისთანავე უკვე რამოდენიმე ადამიანი დააკავეს სოდომური კავშირის ბრალდებით. 2008 წელს სახელმწიფოს მეთაურმა ყველა ჰომოსექსუალისტსა და ლესბოსელს ქვეყნის დატოვება ურჩია, წინააღმდეგ შემთხვევაში თავის მოკვეთით დაემუქრა.
ახალი კანონის მიღებამდე გამბიაში არატრადიციული ორიენტაციი ადამიანებისთვის 14 წლამდე თავისუფლების აღკვეთა იყო გათვალისწინებული.

2016 წელს დაზვერვის სამსახურს საერთაშორისო სტანდარტების შესაბამისი ახალი ადმინისტრაციული შენობა ექნება – მშენებლობის პროცესის დაწყებას საფუძველი საქართველოს პრემიერ-მინისტრმა ირაკლი ღარბაშვილმა დაზვერვის სამსახურის უფროს დავით სუჯაშვილთან და რეგიონული განვითარებისა და ინფრასტრუქტურის მინისტრ დავით შავლიაშვილთან ერთად ჩაუყარა.
“დაზვერვის სამსახურის გამართული და ეფექტიანი მუშაობა გადამწყვეტია ჩვენი ქვეყნის უსაფრთხოებისათვის. მოგეხსენებათ, რომ ჩვენი სახელმწიფო დიდი გამოწვევების წინაშე დგას, გლობალური პროცესები და რეგიონში არსებული ვითარება, რა თქმა უნდა, ზრდის საგარეო საფრთხეებს, და ასეთ სიტუაციაში თქვენ უდიდესი როლი გაკისრიათ. მინდა იცოდეთ, რომ ჩვენი მთავრობისგან ყოველთვის გექნებათ სათანადო მხარდაჭერა, ჩვენ ყველაფერს ვაკეთებთ იმისათვის, რომ თქვენი პროფესიონალიზმი სრულად იყოს გამოყენებული ჩვენი სახელმწიფოს ინტერესების სასიკეთოდ, “- განაცხადა სიტყვით გამოსვლისას საქართველოს პრემიერ-მინისტრმა.
ირაკლი ღარიბაშვილმა აღნიშნა, რომ მთავრობა ყოველმხრივ შეუწყობს ხელს დაზვერვის სამსახურის ისეთ სტრუქტურად გარდაქმნას, რომელიც მორგებული იქნება თანამედროვე გამოწვევებზე.