პარტიებმა მედიკამენტების მაღალი ფასი მანიფესტაციით გააპროტესტეს


დღეს რამდენიმე პარტიამ წამლებზე ფასების ზრდა გააპროტესტა და პარტნიორებთან ერთად სააფთიაქო მონოპოლიების საწინააღმდეგო კამპანია დაიწყო.
როგორც “თავისუფალი საქართველოს” ლიდერებმა განაცხადეს, კავკასიის რეგიონში საქართველო წამლებზე მაღალი ფასის მხრივ პირველ ადგილზეა. მათივე ცნობით, სომხეთთან, აზერბაიჯანთან და რეგიონის სხვა ქვეყნებთან შედარებით პრეპარატების ფასები საქართველოში საშუალოდ 5-ჯერ ძვირია, რის მიზეზადაც პარტიის წარმომადგენლები ქართულ სააფთიაქო ბიზნესში დამკვიდრებულ მონოპოლიებს ასახელებენ, რომელებიც მათი მტკციებით, მედიკამენტების ღირებულებას ხელოვნურად აძვირებენ და მომხმარებელს არარეალურ ფასებს სთავაზობენ.
დღეს საქართველოს 12 ქალაქში „პე ეს პე“-სა და „ავერსის“ აფთიაქებთან ერთდროულად გაიმართა საპროტესტო მანიფესტაციები.
„თავისუფალი საქართველო“ და მასთან ერთად “ქრისტიან დემოკრატიული მოძრაობა და “რეფორმატორები” წამლებზე მაღალი ფასებით შეწუხებულ მოსახლეობას საპროტერტო მოძრაობაში ჩართვისკენ მოუწოდებენ.




დავით ნარმანიას დიდი უწყებების მართვის უნარი არ გააჩნია – ირაკლი აბესაძე


დავით ნარმანიას არ გააჩნია არავითარი უნარი, მართოს დიდი უწყებები, – ამის შესახებ თბილისის საკრებულოს ფრაქცია ,,ერთიანი ნაციონალური მოძრაობა – თბილისის’’ თავმჯდომარემ, ირაკლი აბესაძემ მერიაში მიმდინარე პროცესების შეფასებისას განაცხადა.
როგორც აბესაძემ ჟურნალისტებთან შეხვედრისას განაცხადა, შიდა აუდიტის სამსახურს, რომელსაც ნარმანიამ მერიის სამსახურების შემოწმება დაავალა, რეალურად არ შეუძლია კორუფციის აღმოფხვრა, რადგან ეს სტრუქტურა მერიის გარეთ მდებარეობს.
“მას არ აქვს უნარი, მართოს დიდი უწყებები. როგორც ჩანს, ნარმანიას თავად მოსწონს კორუფცია და ის, რომ მხოლოდ მისი ნათესავები და მისი მეგობრები საქმდებიან”, – განაცხადა აბესაძემ.




"სოკართან" განვიხილავთ ყველა შესაძლებლობას, რომ ამ ეტაპზე გაზის ტარიფი არ გაძვირდეს – კახი კალაძე


კომერციული ობიექტებისთვის გაზის გაძვირებასთან დაკავშირებით კომენტარი ენერგეტიკის მინისტრმა, კახი კალაძემ გააკეთა.
მისი თქმით, “ყველაფერი 1 მარტამდე გაირკვევა”. როგორც კალაძემ ჟურნალისტებთან საუბრისას აღნიშნა, საფასურის გაძვირების გადავადების საკითხზე “სოკართან” მოლაპარაკება უკვე დაწყებულია.
რაც შეეხება გაზის გაძვირებას, მხოლოდ კომერციულ ობიექტებზე იყო საუბარი. როგორც იცით, ეს კურსთა შორის სხვაობას უკავშირდებოდა. ყველაზე სერიოზული პრობლემები შეექმნა “ყაზტრანსგაზს” და თბილისში არსებულ კომპანიებს, რომლებიც დედაქალაქის მოსახლეობას ბუნებრივი აირით ამარაგებენ. შესაბამისად, მათ გააკეთეს განაცხადი, რომ კურსთა შორის სხვაობის გამო აუცილებელია, კომერციულ ობიექტებს, პურის საცხობების გამოკლებით, გაეზარდოთ ტარიფი, თუმცა “სოკართან” განვიხილავთ ყველა შესაძლებლობას, რომ ამ ეტაპზე გაზის ფასი არ გაძვირდეს”, – განაცხადა კალაძემ.




16 თებერვლიდან მიწის ნაკვეთის სამშენებლოდ გამოყენების პირობები იცვლება


16 თებერვლიდან მიწის ნაკვეთის სამშენებლოდ გამოყენების პირობები იცვლება. არქიტექტურის სამსახური მიწის ნაკვეთის სამშენებლოდ გამოყენების პირობების დოკუმენტის ახალ, გაუმჯობესებულ ფორმაზე გადადის.
მერიის ცნობით, სიახლე პროცესში მონაწილე პირთათვის ინფორმაციის სწორად და სრულად მიღებას გააადვილებს.
უწყებაში განმარტავენ, რომ ელექტრონული განაცხადის ფორმა დაიხვეწა როგორც შინაარსობრივად, ისე გარეგნულად. კერძოდ, ერთმანეთისგან გაიმიჯნა აქტისა და პირობების შინაარსობრივი შემადგენლობა; აქტის ნაწილში გაუმჯობესდა რეკვიზიტებისა და განაცხადის შესახებ ინფორმაცია; პირობების ნაწილი დაიყო თავებად და ნაწილებად, რომლებშიც მოქმედი კანონმდებლობის შესაბამისობით დაჯგუფდა ინფორმაცია მნიშვნელობის მიხედვით.
მიწის ნაკვეთის სამშენებლოდ გამოყენების პირობების ახალ ფორმაში გამოიყო ოთხი თავი, სადაც დეტალურად არის მოცემული ინფორმაცია მიწის ნაკვეთის შესახებ, ასევე, კანონმდებლობით გათვალისწინებული ვალდებულებების თაობაზე და სანებართვო პირობებთან დაკავშირებით.
მიწის ნაკვეთის სამშენებლოდ გამოყენების პირობების ცვლილების მიზანი მიწის ნაკვეთების სამშენებლოდ გამოყენების პროცესში დაინტერესებულ და მესამე პირთა უფლებების დაცვა და სამშენებლო საქმიანობაში რისკების შემცირებაა. კერძოდ, გამოყენების პირობების სრულად განსაზღვრა ნებართვის გაცემის პირველივე სტადიაზე გამოავლენს ყველა შესაძლო შემაფერხებელ თუ სამშენებლო განვითრების შემზღუდავ გარემოებას.




უმრავლესობის დეპუტატებსა და კაკო ბობოხიძეს შორის სიტყვიერი დაპირისპირება მოხდა


პარლამენტში საგაზუფხულო სესიის პირველი პლენარული სხდომა დეპუტატებს შორის დაპირისპირებით დაიწყო.
საპარლამენტო უმცირესობის წევრმა აკაკი ბობოხიძემ წყალტუბოში აგროკრედიტების გაცემაზე არსებულ პრობლემებზე ისაუბრა, რასაც უმრავლესობის დეპუტატმა დავით საგანელიძემ უპასუხა. მისი თქმით, ბობოხიძემ ჭკუის სწავლების ნაცვლად ბოდიში უნდა მოიხადოს.
საგანელიძეს სოსო ჯაჭვკლიანი დაეთანხმა, რასაც მასსა და ბობოხიძეს შორის სიტყვიერი დაპირისპირება მოხდა.
„არ მინდა დაიძაბოს სიტუაცია, თორემ გახვალ დარბაზიდან“, – მიმართა ჯაჭვლიანმა ბობოხიძეს.
პარლამენტის თავმჯდომარემ დეპუტატებს დაწყნარებისკენ რამდენჯერმე მოუწოდა.
„შეგინებაზე პასუხის არგაცემა მძიმეა და მძიმე არჩევანის წინაშე დაგაყენეთ. მე ნამდვილად ვაპირებდი ამ განცხადების გაკეთებას, მაგრამ ბატონი დავითი ამბობს, რომ მე ბოდიშით უნდა დამეწყო გამოსვლა. ბოდიშების მოხდა მითითებით არ ხდება“, – განაცხადა ბობოხიძემ.




მერიის გადაწყვეტილებით თბილისში ტროტუარებზე ავტომანქანის პარკირების 210 ადგილი გაუქმდება


თბილისის მერის დავით ნარმანიას განცხადებით, დედაქალაქში ტროტუარებზე ავტომანქანის პარკირების 210 ადგილი გაუქმდება.
ამის შესახებ დავით ნარმანიამ თბილისის მერიის მთავრობის სხდომაზე განაცხადა.
“ეს შვებას მისცემს ფეხით მოსიარულეებს. იქ სადაც სამ მეტრზე ნაკლებია ტროტუარის სიგანე, იქ შეუძლებელია ავტომანქანის ისეთნაირად პარკირება, რომ ფეხით მოსიარულეებს ხელი არ შეეშალოთ“– განაცხადა ნარმანიამ.
მისივე თქმით, მერია დაინტერესებული ინვესტორებისთვის გამოაცხადებს კონკურსს, რომელიც მიწისზედა და მიწისქვეშა პარკინგების აშენებას ითვალისწინებს, რათა ავტომანქანის მძღოლებს პარკინგის ადგილების შემცირების გამო დისკომფორტი არ შეექმნათ და მათ შეძლონ გარკვეულ ადგილებში მანქანების გაჩერება.
ტრანსპორტის საქალაქო სამსახურის უფროსის, პაატა ჯაჭვლიანის განცხადებით, ტროტუარებზე პარკირების აკრძალვა ძირითადად, ვაკე-საბურთალოს რაიონს შეეხება.
მისი თქმიით მოსახლეობიდან მერიაში ხშირად შედიოდა საჩივრები იმასთან დაკავშირებით, რომ მოქალაქეები ტროტუარით ვერ სარგებლობდნენ.
“ჩვენ გვესმის, რომ ეს გარკვეულ დისკომფორტს მოუტანს ავტომანქანის მფლობელებს, რომლებიც აჩერებდნენ მანქანებს იმ ადგილებზე, სადაც ადრე პარკინგის ნიშანი იყო. თბილისის მერიის დღევანდელი გადაწყვეტილების შემდეგ, აღნიშნულ ადგილებზე მონიშვნები წაიშლება და მძღოლები იქ ავტომანქანებს ვეღარ გააჩერებენ. მაგრამ როგორც მერმა დღევანდელ სხდომაზე აღნიშნა, აქტიურ ფაზაშია პარკინგების მშენებლობის პროექტი, დოკუმენტაცია მზადდება და ახალი პარკინგის ადგილების მშენებლობა მალე დაიწყება”, – აღნიშნა პაატა ჯაჭვლიანმა.




კარწახში პირველი სატესტო მატარებელი გაივლის


ბაქო-თბილისი-ყარსის სარკინიგზო მაგისტრალის ახალქალაქი-კარწახის მონაკვეთზე დღეს პირველი სატესტო მატარებელი გაივლის, – პროექტის შესახებ საქართველოს პრემიერ-მინისტრმა ირაკლი ღარიბაშვილმა და აზერბაიჯანის რესპუბლიკის ტრანსპორტის მინისტრმა ზია მამედოვმა დღეს გამართულ შეხვედრაზე ისაუბრეს.
მთავრობის პრესსამსახურის ცნობით, მხარეებმა ორ ქვეყანას შორის სატრანსპორტო სფეროში თანამშრომლობის საკითხები განიხილეს და ხაზგასმით აღნიშნეს ბაქო-თბილისი-ყარსის პროექტის მნიშვნელობა.
სარკინიგზო მაგისტრალი, რომელიც აზერბაიჯანს, საქართველოსა და თურქეთს დააკავშირებს, ევროპასა და აზიას შორის ეფექტიან და სწრაფ სამგზავრო და სატვირთო გადაზიდვებს უზრუნველყოფს. პროექტის დასრულება 2015 წლის ბოლოს იგეგმება.
სატესტო მატარებლის გაშვების ცერემონიას აზერბაიჯანის ტრანსპორტის მინისტრი კარწახში დღეს საქართველოს ეკონომიკისა და მდგრადი განვითარების მინისტრთან, ვიცე-პრემიერ გიორგი კვირიკაშვილთან ერთად დაესწრება.




რუსულ – ქართული მხარე ფრენების რაოდენობაზე ვერ შეთანხმდნენ


რუსეთის საავიაციო სფეროს წარმომადგენლებისა და ქართულ მხარის მოლაპარაკება ფრენების რაოდენობასთან დაკავშირებით შეთანხმების გარეშე დამთავრდა. რუსული დელეგაციის ხელმმძღვანელი მოლაპარაკებებს პროგრესულად აფასებს და აცხადებს, რომ ამ საკითხში წინსვლა შეინიშნება.
დახურული მოლაპარაკებები 2 დღის განმავლობაში მიმდინარეობდა, როგორც ინფორმაცია ვრცელდება, ჯერ-ჯერობით ფრენების სიხშირის რაოდენობა კვლავ 18/18- ზე რჩება და ეს რეჟიმი 31 იანვარამდე იმოქმედებს. შემდეგ კი არ არის გამორიცხული რომ სიხშირეების რაოდენობა გაიზარდოს, რისი იმედიც რუსულ მხარეს აქვს. ქართული მხარის განცხადებით კი სიხშირეების გაზრდა მათთვის არახელსაყრელია.
რუსეთის სამოქალაქო ავიაციის ტრანსპორტის დეპარტამენტის თავმჯდომარის მოადგილის სერგეი სესკუტოვის განცხადებით, მოლაპარაკების პროცესში პროგრესია:
„ჩვენ ბევრი საკითხი წინ წავწიეთ, ჯერ-ჯერობით მოლაპარაკების პროცესია, პოზიტიურად ვაფასებთ კონსულტაციებს და ვთვლით რომ ყველაფერი კარგად იქნება ჩვენი ამოცანაა, რომ ყველა ქართველმა რომელიც რუსეთში ცხოვრობს შეძლოს ფრენა სამშობლოში და ყველა რუსმა იფრინოს რამდენჯერაც გაუხარდება, ეს კარგად აისახება ქართულ რუსულ ურთიერთობაზე.“
საქართველოს სამოქალაქო ავიაციის სააგენტოს დირექტორის გურამ ჯალაონიას განცხადებით, შეხვედრაზე საუბარი სიხშირეებს, ქალაქებს და რეისებს შეეხებოდა.
„ჩვენი მთავარი პრინციპი არის ის, რომ დაცული იყოს, კომპანიების ინტერესები, ქვეყნის ინტერესები და მომხმარებვლის ინტერესები.“
„აირზენას“და ოპოზიციური პარტიების წარმომადგენლების განცხადებით აღნიშნული თანაფარდობით ფრენების განხორციელებით საავიაციო სისტემის მონოპოლიზება ხდება, მმართველი გუნდის განცხადებით კი მონოპოლიზაცია გამორიცხულია.




დავით ნარმანია კოლექტორების სარეაბილიტაციო სამუშაოებს გაეცნო


თბილისის მერი დავით ნარმანია გლდანის რაიონში მდებარე „დიდი ხევძმარას“ და „სააფთრის ხევის“ სანიაღვრე კოლექტორების სარეაბილიტაციო სამუშაოებს კეთილმოწყობის საქალაქო სამსახურის უფროსთან ავთანდილ სუდაძესთან ერთად გაეცნო.
კოლექტორებში, რომლის სიგანე 6, სიმაღლე კი 4 მეტრია, ნაზვავი გრუნტის მასები ჩაედინება, რის გამოც მათი გამტარუნარიანობა 90%-ით არის შემცირებული და კიდევ უფრო აზიანებს ნაგებობას.
სარეაბილიტაციო პროექტების ფარგლებში იგეგმება დაზიანებული მონაკვეთის დემონტაჟი, მიწის სამუშაოები, დაზიანებული კოლექტორის მოსაწყობად ჩატარდება მოსამზადებელი სამუშაოები, შემდეგ კი დაიწყება ნაგებობების მშენებლობა. სარეაბილიტაციო სამუშაოები მიმდინარე წლის მაიში დასრულდება.
“დედაქალაქში ძალიან დიდი პრობლემაა სანიაღვრე სისტემასთან დაკავშირებით, რის გამოც, წვიმის დროს ქალაქის დიდი ნაწილი იტბორება. ამ მიმართულებით გადაუდებელი სამუშაოებისთვის მიმდინარე წლის ბიუჯეტში 4 000 000 ლარზე მეტი გავითვალისწინეთ. მათ შორისაა აღნიშნული ობიექტები. თავის დროზე ამ ადგილზე ძალიან ბევრი სამშენებლო ნარჩენი დაიყარა, რასაც სისტემამ ვერ გაუძლო და ჩაინგრა. ეს არის ერთ–ერთი ყველაზე მძლავრი სისტემა, რომელიც მდინარე მტკვარს უერთდება. სამუშაოების დასრულების შემდეგ, სანიაღვრე ქსელი სრულად აღდგება“ – განაცხადა დავით ნარმანიამ.
“დიდი ხევძმარას“ სამშენებლო-სარეაბილიტაციო სამუშაოებისთვის დედაქალაქის ბიუჯეტიდან 665 898 ლარია გამოყოფილი. სამუშაოებს შპს „ პალიტრა“ ახორციელებს.




თბილისში ცხოველების სილამაზის სალონი გაიხსნა


თბლისში ცხოველების სილამაზის პირველი სალონი გაიხსნა. ვაკეში მდებარე “хот-доги”-ი მოემსახურება შინაურ ცხოველებს.
ძაღლებსა და კატებს სალონში დაბანენ, დავარცხნიან, ბეწვს და ბრჭყალებს შეაჭრიან, კბილებს გაუხეხავენ და ყურებს გამოუწმედენ. ამის გარადა ბეწვის ცვენის საწინააღმდეგო და ბზინვარების მომატების პროცედურებსაც ჩაუტარებენ. შესაძლებელია ასევე შინაური ცხოველის შეფერილობის შეცვლაც – სალონის ადმინისტრაციის მტკიცებით, ისინი ცხოველებისთვის უსაფრთხო საღებავებს იყენებენ.
მომსახურების ღირებულება 5 ლარიდან 150 ლარამდე მერყეობს. სალონში ასევე სხვადსახვა აქსესუარების შეძენაც იქნება შესაძლებელი.”მსურდა, საქართველოშიც ყოფილიყო ისეთი სალონი, როგორც ევროპის მრავალ ქვეყნაშია. ჩვენ გუნდთან ერთად ვიზრუნებთ იმაზე, რომ ოთხფეხა მეგობრები გავალამაზოთ.” – განაცხადა სალონის დამფუძნებელმა ირაკლი ქორიძემ.