გიორგი კვირიკაშვილი მერილენდში მდებარე ქართულ მონასტერს ესტუმრა


12193888_10153083440190899_2034089046857311468_n           საქართველოს საგარეო საქმეთა მინისტრი ამერიკის შეერთებულ შტატებში სამუშაო ვიზიტის ფარგლებში მერილენდში მდებარე ქართულ მონასტერს ესტუმრა. გიორგი კვირიკაშვილმა საქართველოს დელეგაციის წევრებთან ერთად წმ. ნინოს დედათა მონასტერი მოინახულა, საკვირაო ღვთისმსახურებას დაესწრო და ტაძრის მსახურებსა და მრევლს გაესაუბრა. ქართული მართლმადიდებლური ტაძარი მერილენდში ეპისკოპოს საბას ხელმძღვანელობით ფუქნციონირებს. მინისტრმა მადლობა გადაუხადა ტაძრის წინამძღვარსა და დედაოებს, ტაძრის ფარგლებში ჰუმანიტარული და საგანმანათლებო საქმიანობისთის, რაც ქართული კულტურის, ისტორიის, ღვთისმსახურებისა და ტრადიციების პოპულარიზაციას ემსახურება.




შორაპანში სტალინის ძეგლი შეღებეს


1353940023_stalinis-dzegli      სტალინის ძეგლი შეღებეს ზესტაფონის მუნიციპალიტეტის დაბა შორაპანში. ადგილობრივებმა ის გუშინ გვიან საღამოს შენიშნეს და მისი დადგმა საღებავების შესხმით გააპროტესტეს.

მოსახლეობის ინფორმაციით, ძეგლი ერთ-ერთი ყოფილი ქარხნის ეზოში იყო. ვინ გადმოიტანა ან როდის დაიდგა ის მეორე მსოფლიო ომში დაღუპულთა მემორიალთან, მათთვის უცნობია.

 




ჩინეთმა მოქალაქეებს 2 ბავშვის ყოლის ნება დართო


752004         ჩინეთის კომუნისტურმა პარტიამ  მოსახლეობას 2 ბავშვის ყოლის ნება დართო. ამრიგად, 1971 წელს ფართოდ შემოღებული პროგრამა ,,ერთი ოჯახი –ერთი ბავშვი,” რომლის მიზანი  ქვეყნის მოსახლეობის რეგულირება იყო, პრაქტიკულად დასრლდა. პროგრამის მიხედვით, რომელშიც პერიოდულად კორექტივები შეჰქონდათ, 2000 წლისთვის ჩინეთის მოსახლეობა 1,2 მილიარდი უნდა ყოფილიყო. სინამდვილეშიც ასე მოხდა – 2000 წელს  ქვეყნის მოსახლეობამ 42,5 მილიონს შეადგინა. ამას გარდა, 30 მილიონი საერთოდ არ მოხვდა სტატისტიკაში, რადგან აღნიშნული რაოდენობა საბუთების გარეშე ცხოვრობს და მუშაობს.

პროგრამას არასასურველი შედეგებიც ჰქონდა: ჩინეთში გენდერული დისბალანსი და მოსახლეობის მზარდი დაბერება იკვეთება. მრავალი ჩინელი სელექტიურ აბორტებს მიმართავს, ანუ მხოლოდ მამრობითი სქესის ნაყოფს ინარჩუნებენ. ბი–ბი–სის ინფორმაციით, მთავრობა ქალებს იძულებით აბორტებს აკეთებინებდა

ჩინელების მისწრაფებამ მამრობითი სქესის ყოლის შესახებ გამოიწვია ის, რომ დღესდღეობით ქვეყანაში მამაკაცების რაოდენობა ქალებთან შედარებით 20 მილიონზე მეტია.  ხელისუფლება სხვადასხვა ზომების გამოყენებით გოგონების დაბადების  წახალისებას ცდილობს, მაგრამ ჯერჯერობით ამაოდ.

მრავალი ოჯახი კანონის გვერდის ავლას ცდილობს და მშობიარობისთვის ჰონკონგში ჩადიან, სადაც საკუთარი კანონმდებლობა მოქმედებს. ჩინეთისა და ჰონკონგის მთავრობა ცდილობს ამგვარი „დედობრივი ტურიზმის“ აღკვეთას, მშობიარეთა რაოდენობა ჰონკონგის ადგილობრივ მოსახლეობასაც აღიზიანებს.

2013 წელს ხელისუფლებაში ახალი თაობის მოსვლის შემდეგ, რომელსაც სი ცზინპინი მეთაურობს, მთავრობამ დემოგრაფიული პოლიტიკის შერბილებაზე დაიწყო ზრუნვა, ახლანდელი გადაწყვეტილება მოსახლეობისთვის მოცემული დაპირების ასრულება იყო.




ბაგები-წყნეთის 10 კილომეტრიან მონაკვეთზე სანათი წერტილების მოწესრიგების სამუშაოები დასრულდა


12189919_1191802014169730_2605247557391995036_n        ბაგები-წყნეთის 10 კილომეტრიან მონაკვეთზე სანათი წერტილების მოწესრიგების სამუშაოები დასრულდა. ობიექტი თბილისის მერმა დავით ნარმანიამ მერის მოადგილე გიორგი სოლომონიასა და “სინათლის ქალაქის” დირექტორ ვასილ ხორავასთან ერთად დაათვალიერა.

აღნიშნულ მონაკვეთზე 260 გარე-განათების ბოძი შეიღება. სანათი ბოძების სამღებრო სამუშაოებზე “სინათლის ქალაქის” 30 თანამშრომელი და 12 ერთეული ტექნიკა მუშაობდა.

სანათი წერტილების მოწესრიგების სამუშაოები ზაფხულში დაიწყო.
დავით ნარმანიას თქმით, სამუშაოების დაწყებიდან დღემდე, დედაქალაქის მასშტაბით, სულ 8 000-მდე სანათი წერტილი შეიღება.

“სამუშაოები კვლავ ინტენსიურად მიმდინარეობს. ამ ეტაპზე არსებული რესურსით, კიდევ 7 000-ზე მეტი სანათის შეღებვას შევძლებთ. ამინდის შესაბამისად, მაქსიმალური დატვირთვით ვიმუშავებთ, რომ დედაქალაქი უფრო მეტად გალამაზდეს”,-განაცხადა დავით ნარმანიამ.




დავით ნარმანიამ მოსახლეობას დედაქალაქის მთავრობის საქმიანობის ერთი წლის ანგარიში წარუდგინა


12191063_1191853697497895_3414013153149728501_n         თბილისის მერმა დავით ნარმანიამ მოსახლეობას დედაქალაქის მთავრობის საქმიანობის ერთი წლის ანგარიში წარუდგინა. პრეზენტაციაზე მერიის სამსახურებისა და გამგეობების მიერ 2014 წლის აგვისტოდან 2015 წლის აგვისტოს ჩათვლით წარმოებული სამუშაოები იყო წარმოდგენილი.

დედაქალაქის მთავრობის საქმიანობის ერთი წლის ანგარიში სხვადასხვა მიმართულებებს მოიცავს, მათ შორის ერთ-ერთი მთავარი თბილისის 2015 წლის ბიუჯეტია, რომელიც პრიორიტეტების მიხედვით დაიგეგმა – მნიშვნელოვნად გაიზარდა ინფრასტრუქტურული, სოციალური, ჯანდაცვის, კულტურის, განათლებისა და სხვა პროგრამების ბიუჯეტები, ამასთან, შემცირდა თბილისის წარმომადგენლობითი და აღმასრულებელი ორგანოების ადმინისტრაციული ხარჯები.

ანგარიშში ყურადღება გამახვილებულია ინფრასტრუქტურულ პროექტებზე – 2014 წლის ბოლო 3 თვის განმავლობაში ჩატარებული ინფრასტრუქტურული სამუშაოები (23 609,3 ლარი), წინა ხელისუფლების პირობებში, 2014 წლის პირველი 7 თვის განმავლობაში, ამავე ტიპის სამუშაოებში ბიუჯეტის ათვისებას (25 020,4 ლარი) უტოლდება. რაც შეეხება 2015 წლის საგზაო სამუშაოებს, 2014 წლის პირველი ორი კვარტლის მონაცემებთან შედარებით (224 119,20 მ2 ასფალტი), 2015 წლის ამავე პერიოდის განმავლობაში არსებითად მეტი გზის საფარი დაიგო (269 726,85 მ2 ასფალტი). განხორციელდა საინჟინრო ნაგებობებისა და სხვა ობიექტების მშენებლობა-რეკონსტრუქცია, ავარიული საცხოვრებელი შენობების კაპიტალური გამაგრება.

დამუშავების პროცესშია მიწათსარგებლობის ახალი გენერალური გეგმა, რომელიც ქალაქის მდგრადი განვითარების ძირეულ პრინციპებს მოიცავს. ამასთან, ქალაქის საჭიროებების გათვალისწინებით მომზადდა საკანონმდებლო ცვლილებები, გამკაცრდა სარეკრეაციო ზონების დაცვის რეჟიმი, მშენებლობისას გაიზარდა გამწვანებული ნაწილის კოეფიციენტი. დედაქალაქის მდგრადი განვითარებისთვის თბილისის მერია “მომავლის ქალაქის” პროექტის განხორციელებას იწყებს. ქალაქის ისტორიაში პირველად, ძალაში შევიდა თბილისის გარემოსდაცვითი სტრატეგია, რომელიც მდგრადი განვითარების უზრუნველსაყოფად, დედაქალაქის გარემოსდაცვით პრიორიტეტებს განსაზღვრავს. მყარი ნარჩენების მართვის პოლიტიკის შემუშავების მიზნით განხორციელდა მთელი რიგი ღონისძიებები. აქტიურად მიმდინარეობს მუშაობა ემისიების, CO2-ის, შემცირებისა და თბილისში ჯანსაღი საცხოვრებელი გარემოს უზრუნველსაყოფად.

დედაქალაქის მთავრობის საქმიანობის ერთი წლის ანგარიშში დეტალურად გაიწერა თბილისის მერიის მიერ 12 თვის განმავლობაში წარმოებული სამუშაოები, მათ შორისაა – შშმ პირთა ხელშეწყობა და ადაპტირებული გარემოს შექმნა, ჯანდაცვა და სოციალური უზრუნველყოფა, ეკონომიკისა და ბიზნესის ხელშეწყობა, კულტურა, განათლება, სპორტი და ახალგაზრდობა, გამწვანება, მუნიციპალური ტრანსპორტის განახლება.

ანგარიშის დიდი ნაწილი 13 ივნისის სტიქიის შედეგებსა და სალიკვიდაციო სამუშაოებს ეთმობა – დედაქალაქის მთავრობამ დაზარალებულები დაუყოვნებლივ უზრუნველყო დროებითი საცხოვრისებით, რის შემდეგაც სტიქიის ზონებში დაზარალებულთა საცხოვრებელი სახლების მდგომარეობის აღწერა/შეფასება განხორციელდა და ბოლო მონაცემებით, მერიის ხელშეწყობით, 37-მა ოჯახმა საცხოვრებელი ფართი უკვე შეიძინა. ამასთან, კვლევის შედეგების მიხედვით, შეიქმნა საოჯახო პაკეტები და დაზარალებულებს შესაბამისი კომპენსაციები ჩაერიცხათ. სტიქიის შედეგად დაზარალებული პირების სწავლის დაფინანსებას, უმაღლესი განათლების ყველა საფეხურზე, დედაქალაქის მერია უზრუნველყოფს. მომზადდა დასკვნა ადამიანის სიცოცხლისა და ჯანმრთელობისათვის რისკის შემცველი არეალების შესახებ, განხორციელდა და მიმდინარეობს მთელი რიგი საგზაო და ინფრასტრუქტურული სამუშაოები.

ანგარიში, ასევე, მოიცავს თბილისის საცობებისგან განტვირთვის მიზნით ჩატარებულ, მიმდინარე და დაგეგმილ სამუშაოებს, მათ შორისაა – კრწანისი-შინდისის დამაკავშირებელი გზა, აეროპორტის ხიდიდან ლოჭინის ხიდამდე დაგეგმილია გზის კაპიტალური შეკეთება, ასევე, მნიშვნელოვანია კახეთის გზატკეცილის თბილისის ზღვასთან დაკავშირება.

დედაქალაქის მთავრობის საქმიანობის ეფექტურობის გაუმჯობესებისა და გამჭვირვალობის მიზნით განხორციელდა მთელი რიგი ცვლილებები, ამასთან, დამტკიცდა შიდა აუდიტის 2015-2017 წლების სტრატეგიული გეგმა, რაც სისტემის ფინანსური მართვისა და კონტროლის ეფექტურობას უზრუნველყოფს.

ადგილობრივი თვითმმართველობის შესახებ საქართველოს ორგანული კანონის თანახმად, მუნიციპალიტეტის მერი წელიწადში ერთხელ მაინც, არაუგვიანეს 1 ნოემბრისა, ვალდებულია მუნიციპალიტეტის ამომრჩეველს დედაქალაქის მთავრობის საქმიანობის შესახებ შესაბამისი ანგარიში წარუდგინოს.




ადრეული და სკოლამდელი აღზრდისა და განათლების სფერო კანონით დარეგულირდება


12189169_1116605888357155_8835861094270884300_n            ადრეული და სკოლამდელი აღზრდისა და განათლების სფერო კანონით დარეგულირდება. კანონპროექტზე ორწლიანი კომპლექსური მუშაობის შედეგების პრეზენტაცია სასტუმრო „რადისონ ბლუ ივერია“-ში ადამიანის უფლებათა დაცვისა და სამოქალაქო ინტეგრაციის კომიტეტის და გაეროს ბავშვთა ფონდის ერთობლივი ორგანიზებით მოეწყო.
ღონისძიების მონაწილეებს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია, საქართველოში გაეროს ბავშვთა ფონდის წარმომადგენელი საშა გრაუმანი და განათლებისა და მეცნიერების მინისტრის მოადგილე ლია გიგაური მიესალმნენ. გამომსვლელებმა კანონპროექტის მომზადების, მასში ასახული ნორმების და პრინციპების საკანონმდებლო რეგულირების და ბავშვთა ადრეული ასაკის განვითარების მნიშვნელობაზე ისაუბრეს.
ეკა ბესელია: „ორწლიანი, მძიმე და შრომატევადი მუშაობის შედეგად, მომზადდა პროდუქტი, რომელიც ჩვენს მომავალ თაობას საუკეთესო სერვისს შესთავაზებს და სკოლაში შესვლამდე კარგ განათლებას მისცემს. ეს არის განათლების სფეროს უპრეცედენტო რეფორმა, რომელიც ადრეული და სკოლამდელი ასაკის ბავშვებს მნიშვნელოვან სიახლეს სთავაზობს – ეს პროექტი ბაგა-ბაღებში ბავშვებს საგანმანათლებლო პროგრამების გაცნობის და შესაბამისი განათლების მიღების საშუალებას მისცემს, როგორც ეს წამყვან განვითარებულ სახელმწიფოებში ხდება“.
„ადრეული და სკოლამდელი აღზრდისა და განათლების შესახებ“ კანონპროექტით გათვალისწინებულია ორსაფეხურიანი სწავლების სისტემა:
1. ადრეული განათლება და ზრუნვა დაბადებიდან 2 წლამდე ასაკის ბავშვებისთვის;
2. სკოლამდელი განათლება 2 წლის ასაკიდან ბავშვის სკოლაში შესვლამდე.
დოკუმენტში განმტკიცებულია პრინციპი, რომლის თანახმადაც, დაწესებულებაში აკრძალულია ბავშვთა მიმართ ძალადობა, მათ შორის, ფიზიკური დასჯა, უგულებელყოფა, შეურაცხმყოფელი ან/და დამამცირებელი მოპყრობა. კანონპროექტის ერთ-ერთ ძირითად პრინციპს განათლების მომსახურებაში მშობელთა სრული ჩართულობის უზრუნველყოფა და საკონსულტაციო საბჭოების შექმნა წარმოადგენს. აღნიშნულ სფეროში მკაფიოდ იმიჯნება ცენტრალური და ადგილობრივი ხელისუფლების უფლებამოსილებები და საქართველოს მთავრობის, ცალკეული სამინისტროებისა და მუნიციპალიტეტების კომპეტენციები. კანონპროექტით შემოთავაზებულ ერთ-ერთ სიახლეს ადრეული და სკოლამდელი დაწესებულებების ავტორიზაციის სავალდებულო წესის შემოღება წარმოადგენს.

კანონპროექტის პრეზენტაციის შემდეგ, ღია დისკუსია გაიმართა. დაინტერესებულმა პირებმა საკუთარი მოსაზრებები გამოთქვეს და კითხვა-პასუხის რეჟიმში დამატებითი ინფორმაცია მიიღეს.
ღონისძიებას კანონპროექტის შემუშავებაში მონაწილე სახელმწიფო უწყებების, მუნიციპალიტეტების და არასამთავრობო ორგანიზაციების წარმომადგენლები, დარგის სპეციალისტები და პარლამენტის აპარატის თანამშრომლები დაესწრნენ.




გორის სოფლებში ეპიდემიაა – სურსათის ეროვნული სააგენტო


1444654753           გორის სოფლებში – წედისსა და ბნავისში ცხოველების დაცემის ფაქტთან დაკავშირებით სურსათის ეროვნული სააგენტო განმარტავს, რომ აღნიშნულ სოფლებში ოქტომბრის დასაწყისიდან დღემდე სულ 4 სული მსხვილფეხა პირუტყვის დაცემა დაფიქსირდა, რომლის მიზეზი დაავადება ემკარი გახდა.

მიუხედავად იმისა, რომ ემკარი არ არის განსაკუთრებით საშიში დაავადება და მის წინააღმდეგ პროფილაქტიკური თუ სალიკვიდაციო ღონისძიებების ჩატარება სახელმწიფო პროგრამით არ არის გათვალისწინებული, სააგენტოს შიდა ქართლის რეგიონული სამმართველოს სპეციალისტების დახმარებით ჩატარდა მოსახლეობის კუთვნილი საქონლის ვაქცინაცია. სურსათის ეროვნული სააგენტო მოუწოდებს მოსახლეობას, მიმართონ კერძო ვეტერინარებს და პროფილაქტიკის მიზნით კუთვნილ შინაურ ცხოველებს ვაქცინაციები ჩაუტარონ ისეთ დაავადებებზე, რომლებზეც სახელმწიფო პროგრამით იმუნიზაცია გათვალისწინებული არ არის. სააგენტოს სპეციალიტები მზად არიან კონსულტაციები გაუწიონ მოსახლეობას.




თბილისში გამხმარი ხეების ჭრა და მათი ჩანაცვლება დაიწყო


12190093_1191361160880482_2876425169445278388_n          ოქროყანაში მავნებელ დაავადებებისგან გამხმარი წიწვოვანი ხეების მოჭრისა და მათი ჩანაცვლების მასშტაბური სამუშაოები დაიწყო. ტერიტორიაზე მონიშნული 10 ათასი გამხმარი შავი ფიჭვი ეტაპობრივად, ორი კვირის განმავლობაში მოიჭრება.
ხეების მოჭრის სამუშაოების მიმდინარეობას ადგილზე გაეცნო ეკოლოგიისა და გამწვანების სამსახურის უფროსი ბიძინა გიორგობიანი.
ბიძინა გიორგობიანის თქმით, მავნებლებისგან დაზიანებული ხეები მთაწმინდის ფერდობებზე, თბილისის მერიის ინიციატივით, მიმდინარე წლის ივლის-აგვისტოში მოინიშნა.
„აღნიშნული ღონისძიებები იმ გეგმის შესაბამისად ხორციელდება, რომელიც ჩვენმა სამსახურმა მცენარეთა ბიოლოგიური დაცვის ცენტრის რეკომენდაციის საფუძველზე, დედაქალაქის ფერდობებზე მცენარეული საფარის მასობრივი ხმობის წინააღმდეგ შეიმუშავა. აღნიშნული გეგმა მთაწმინდის ფერდობებზე 10 000 ძირი გამხმარი ხის მონიშვნას, მათ დაუყოვნებლი მოჭრასა და შესაბამისი სახეობის ნარგავებით ინტენსიურ ჩანაცვლებას ითვალისწინებს. მცენარეების ხმობა დღეისათვის ქალაქის გამწვანების ერთ-ერთ ყველაზე მწვავე პრობლემას წარმოადგენს და, შესაბამისად, ძალიან მაღალია მის მიმართ საზოგადოებრივი ინტერესი. პროცესის პირველ ეტაპზე, ხეების მონიშვნის სამუშაოებში საზოგადოებრივი ორგანიზაციები, მათ შორის პარტიზანი მებაღეები, აქტიურად იყვნენ ჩართული“, – განაცხადა ბიძინა გიორგობიანმა.
თბილისის მერიასთან გაფორმებული ხელშეკრულების შესაბამისად, „მცენარეთა ბიოლოგიური დაცვის ცენტრის“ მიერ ფიტოსანიტარიული მონიტორინგი ჩაუტარდა თბილისის შემოგარენის ტერიტორიაზე გაშენებული ფიჭვების ნარგაობას და გამოვლინდა პრობლემები, რომელიც სამსახურის მხრიდან დაუყოვნებლივ რეაგირებას საჭიროებდა. ფიტოსანიტარიული დასკვნის თანახმად, რეაგირების ღონისძიებები გამხმარი ნარგაობისგან ტერიტორიების გაწმენდას, მათ ჩანაცვლებას, ბუნებრივი განახლებისთვის ხელშეწყობასა და საშიში კერების გაზრდის პრევენციას გულისხმობს. ამჟამად ნარგავების ხმობის მხრივ ყველაზე საშიშ კერებს მთაწმინდისა და კუს ტბის ფერდობები წარმოადგენენ. გამხმარი ხეების მოჭრისა და მათი ჩანაცვლების ღონისძიებები დაგეგმილია ასევე ლისისა და კუს ტბის გზაზე არსებულ ფერდობებზე.
ხე-მცენარეების მოჭრისა და გამოტანის სამუშაოებს ეკოლოგიისა და გამწვანების სამსახურის კონტრაქტორი კომპანია განახორციელებს.
ხმობის შედეგად მოჭრილი ხეები გამწვანების შესაბამის სეზონზე ჩანაცვლდება კლიმატური ცვლილებების მიმართ ისეთი რეზისტენტული ჯიშებით, როგორიცა არის ჰიმალაის კედარი, იფანი, მუხა და აკაცია.
მოჭრის შედეგად მიღებული საშეშე მერქანი გასათბობად სოციალურად დაუცველ ოჯახებს გადაეცემა. მოჭრილი ხეების მერქანი ბიძინა გიორგობიანმა დღესვე ოქროყანაში მცხოვრებ სოციალურად დაუცველ ოჯახს გადასცა.




როშკა -არხოტის დამაკავშირებელი 28 კმ-იანი გზის მშენებლობა დაიწყო


5631f6d30cf20aa08475978b        საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, პირიქითა და პირაქეთა ხევსურეთის დამაკავშირებელი, 28კმ-იანი გზის მშენებლობა დაიწყო. სამშენებლო სამუშაოები დღეს სოფელ როშკაში მინისტრის პირველმა მოადგილემ ილია დარჩიაშვილმა და  მუნიციპალური განვითარების ფონდის აღმასრულებელმა დირექტორმა ჯუანშერ ბურჭულაძემ გახსნეს.
 
როშკა-არხოტის დამაკავშირებელი გზა აქამდე არ არსებობდა და  გადაადგილება მხოლოდ ფეხით, ცხენითა და ვეტმფრენით იყო  შესაძლებელი. საქართველოს მთავრობის ძალისხმევითა და დაფინანსებით 2017 წლიდან   პირიქითა და პირაქეთა ხევსურეთს სრულიად ახალი გზა დააკავშირებს. გზის მშენებლობის შემდეგ  მშობლიურ სოფელში რამდენიმე ათეული ოჯახი დაბრუნდება.  პროექტის ღირებულება –  10 900 000 ლარია.
 
აღსანიშნავია, რომ გზის არარსებობის გამო, წლების განმავლობაში, არხოტი ნელ-ნელა დაიცალა და ამ დროისთვის  საზღვირსპირა სოფელში მხოლოდ 4 ოჯახი ცხოვრობს, რომელთაგან ზამთარში მხოლოდ 2 ოჯახი რჩება ადგილზე.  შესაბამისად, აღნიშნული გზის მშენებლობას ამ მხარის განვითარებისთვის სასიცოცხლო მნიშვნელობა აქვს. გარდა ამისა,  პროექტის განხორციელება ხელს შეუწყობს  ხევსურეთის ტურისტული პოტენციალის განვითარებასაც.
აღნიშნული გზის მშენებლობა საქართველოს კათოლიკოს-პატრიარქმა, ილია მეორემ დალოცა და მას საუკუნის პროექტი უწოდა. 



ტერმინ „დიეტურის“ დარღვევით გამოყენების გამო ოთხი ბიზნესოპერატორი დაჯარიმდა


1442908560           სოფლის მეურნეობის სამინისტროს სსიპ სურსათის ეროვნული სააგენტოს იმერეთის რეგიონული სამმართველოს სპეციალისტებმა ევრაზიის თანამშრომლობის ფონდის მიერ მოწოდებული ინფორმაციის საფუძველზე, უალკოჰოლო სასმელების დოკუმენტური შემოწმება განახორციელეს. შემოწმების შედეგად გამოვლინდა ეტიკეტირების წესის დარღვევის ორი შემთხვევა (ი/მ „გიორგი ნიკოლაძე“, ი/მ „ელისო დევდარიანი“). კერძოდ, ეტიკეტზე მითითებული იყო დეფინიცია „დიეტური“ , თუმცა მეწარმეებმა ვერ წარმოადგინეს შრომის, ჯანმრთელობისა და სოციალური დაცვის სამინისტროს შესაბამისი ნებართვა, რისთვისაც ისინი ეტიკეტირების წესის დარღვევის გამო დაჯარიმდნენ.

აგრეთვე, შემოსული შეტყობინების საფუძველზე სურსათის ეროვნული სააგენტოს თბილისის სამმართველოს სპეციალისტებმა გადაამოწმეს „ნიკორას“ მიერ წარმოებული მოხარშული ძეხვი „დიეტური“ და შპს ,,ელთი დისტრიბუციის” (ლიტვური საცხობი) მიერ წარმოებული ,,გერმანული დიეტური პურის” ეტიკეტირება. ბიზნესოპერატორებმა ასევე ვერ წარმოადგინეს შრომის, ჯანმრთელობისა და სოციალური დაცვის სამინისტროს ნებართვა და ვერ დაადასტურეს ტერმინი ,,დიეტურის” შესაბამისობა, რისთვისაც ისინი დაჯარიმდნენ.

ამასთან, მიმდინარეობს დიაბეტური სურსათის ეტიკეტირების მონიტორინგი, რომლის ფარგლებშიც სურსათის ეროვნული სააგენტოს მცხეთა-მთიანეთის რეგიონულმა სამმართველომ შეამოწმა ს/ს “ქართული ლუდის კომპანია”. დოკუმენტური შემოწმების შედეგად დარღვევა არ გამოვლენილა, კომპანიამ ლიმონათის ეტიკეტზე წარწერა “დიაბეტურის” დასატანად შესაბამისი ნებართვა წარმოადგინა.