დღეს სვეტიცხოვლობაა


Картинки по запросу სვეტიცხოვლობა14 ოქტომბერს მართლმადიდებელი ეკლესია უფლის კვართისა და სვეტიცხოვლის დღესასწაულს აღნიშნავს. დღეს ასევე მცხეთობა აღნიშნეს, ძველი დედაქალაქი  მთელი დღის მანძილზე მასპინძლობდა სტუმრებს.

ქუჩებში ტრადიციულად შემოდგომის ხილი და ჩურჩხელები, ასევე ხალხური რეწვის ნიმუშები გამოიფინა.

დღესასწაულთან დაკავშირებით საქართველოს პრეზიდენტი  მცხეთაში იმყოფებოდა და სვეტიცხოვლის საკათედრო ტაძარში საზეიმო ლიტურგიას დაესწრო.

„მინდა, სრულიად საქართველოს მივულოცო დღევანდელი დღე, სვეტიცხოვლობა. ეს არის ერთ-ერთი ნამდვილად და ჭეშმარიტად ქართული ქრისტიანული დღესასწაული. მინდა, მოგილოცოთ ყველას. ამავე დროს, ეს არის სრულიად ქრისტიანული დღესასწაული. ასეთი არსად არ არის და ჩვენ გვაქვს ეს დიდი მადლი, რომ აქ ვიყოთ დღეს“,- განაცხადა სალომე ზურაბიშვილმა.




130 000 ადამიანს  საარსებო მინიმუმზე ნაკლები ხელფასი აქვს


Картинки по запросу საფულე ლარი130 000 ადამიანს ამ ქვეყანაში სახელმწიფოს მიერ დაწესებულ საარსებო მინიმუმზე ნაკლები ხელფასი აქვს, – ამის შესახებ პროფესიული კავშირების გაერთიანების თავმჯდომარემ, ირაკლი პეტრიაშვილმა საქართველოში მინიმალური ხელფასის თემაზე კონფერენციის დაწყებამდე ჟურნალისტებს განუცხადა

მისი თქმით, სოციალურ-ეკონომიკური პოლიტიკის თვალსაზრისით, სახელმწიფოს მთავარი ფუნქცია ეკონომიკური დოვლათის შექმნისთვის და ზოგადად, ეკონომიკის განვითარებისთვის ხელის შეწყობაა.

„სიცოცხლის უზრუნველყოფა გახლავთ სახელმწიფოს ფუნქცია. 130 000 ადამიანს ამ ქვეყანაში აქვს სახელმწიფოს მიერვე დაწესებულ საარსებო მინიმუმზე, ანუ რაც ადამიანს სჭირდება თვიდან თვემდე რომ იცოცხლოს, ამაზე ნაკლები ხელფასი. 100 ლარზე ნაკლები ხელფასი აქვს 23 500 ადამიანს, რაც ბუნებრივია, ქმნის უამრავ გამოწვევას და საფრთხეს ქვეყნისთვის. ფაქტია ის, რომ ქვეყანას აქვს ამბიცია იმასთან დაკავშირებით, რომ სამართლიანი გარემო იყოს და სამართლიანი გარემო მანამდე ვერ იქნება, ვიდრე ბიზნესს ეძლევა საშუალება, რომ ბიუჯეტს ფული მოპაროს.

ფულის მოპარვა გამოისახება სწორედ დღეს არსებულ მინიმალურ ხელფასში. ვერ დამანახებთ ვერც ერთ დასაქმებულს, რომელიც 20 ლარად თანახმაა, რომ დასაქმდეს, რაც ნიშნავს იმას, რომ კონვერტით ხდება ხელფასების გადახდა. კონვერტით ხელფასების გადახდა კი ნიშნავს იმას, რომ სახელმწიფო ბიუჯეტში საშემოსავლო გადასახადი ადეკვატურად არ შედის.

აქედან გამომდინარე, ბიუჯეტს უჩნდება პრობლემები იმ სოციალურ გამოწვევებთან დაკავშირებით, სადაც იგივე საარსებო შემწეობა გახლავთ 40-დან 60 ლარამდე, რაც ასევე ბევრად ნაკლებია, ვიდრე სახელმწიფო სტატისტიკის სამსახურის მიერ დაწესებული საარსებო მინიმუმი. ეს არის კოლოსალური პრობლემები. არ ვამბობ, რომ ყველაფერს მოაგვარებს მინიმალური ხელფასი და მხოლოდ 1 კომპონენტი, იგივე პროგრესული გადასახადები და ა.შ., მაგრამ ბევრი ჩვენი მოქალაქისთვის ადეკვატური მინიმალური ხელფასის არსებობა ქვეყანაში სასიცოცხლოდ მნიშვნელოვანია”, – განაცხადა ირაკლი პეტრიაშვილმა.

მისივე თქმით, მინიმალური ხელფასის კუთხით, მთელ მსოფლიოში საქართველო 111-ე, ხოლო ევროპულ ქვეყნებში ბოლო ადგილზეა.

commersant.ge




„თბილისობის“ გამო ზოგიერთ უბანში ავტოტრანსპორტის მოძრაობა შეიზღუდება


Картинки по запросу ყვითელი ავტობუსები„თბილისობის“ დღესასწაულთან დაკავშირებით დედაქალაქის გარკვეულ უბნებში ავტოტრანსპორტის მოძრაობა ნაწილობრივ შეიზღუდება, ზოგიერთ ქუჩაზე კი აიკრძალება. 

“ამ დროისთვის მეტეხის ხიდზე ტრანსპორტის გადაადგილება აკრძალულია, შესაბამისად, ავტომანქანები ვახტანგ გორგასლის ქუჩიდან თავისუფლების მოედნის მიმართულებით იმოძრავებენ კოტე აფხაზის ქუჩის გავლით. გარდა ამისა, მოძრაობა, ასევე, აკრძალულია ათონელის ქუჩაზე და ნაწილობრივ ევროპის მოედანზე. ამიტომ  მეტეხის აღმართიდან მომავალი ავტომანქანები მოძრაობას გააგრძელებენ ევროპის მოედნისკენ, ხოლო გვირაბიდან გამომავალი ტრანსპორტის ნაკადი 1 ზოლად შევა ევროპის მოედნის წრეზე და სვლას გააგრძელებს ღვინის აღმართისკენ ან უკან დაბრუნდება.

00:00 საათიდან გადაიკეტება ლეღვთახევის ქუჩა და ორბელიანის მოედანი. შესაბამისად, ავტომანქანები იმოძრავებენ ბარათაშვილის ქუჩიდან თაბუკაშვილის ქუჩის მიმართულებით. ასევე 00:00 საათიდან გადაიკეტება მტკვრის მარცხენა სანაპირო, რის გამოც ავტომანქანები წმინდა ნიკოლოზის ეკლესიის მიმდებარე ტერიტორიიდან ვეღარ იმოძრავებენ ბარათაშვილის ხიდის მიმართულებით და სვლას გააგრძელებენ გვირაბის გავლით ისნის მიმართულებით. გადაიკეტება წყალტუბოს ქუჩაც და ავტოტრანსპორტი იმოძრავებს სამტრედიის ქუჩის გავლით.

5 ოქტომბრის 00:00 საათიდან 6 ოქტომბრის 00:00 საათამდე მოძრაობა აიკრძალება ბარათაშვილის ხიდის ამსვლელ პანდუსზე, ასევე კოსტა ხეთაგუროვის სკვერის მიმდებარე ტერიტორიაზე. გვირაბიდან წამოსული ნაკადი იმოძრავებს წმინდა ნიკოლოზის ეკლესიის მიმართულებით, ასევე წმინდა ნიკოლოზის ეკლესიიდან ტრანსპორტი გადაადგილებას შეძლებს მხოლოდ გვირაბის მიმართულებით“, – აღნიშნულია  შსს–ს მიერ გავრცელებულ  განცხადებაში.

„თბილისობა 2019“ 5-6 ოქტომბერს გაიმართება.




ჩეხეთში კარელ გოტის დაკრძალვის დღე გლოვის დღედ გამოცხადდება


Картинки по запросу KArel Gottცნობილი ჩეხი მომღერალი კარელ გოტი 80 წლის ასაკში გარდაიცვალა.

ინფორმაციას ჩეხეთის ტელევიზია ავრცელებს.

“კარელი ოჯახის წრეში, მშვიდად, ძილში გარდაიცვალა, “– აღნიშნა მომღერლის მეუღლემ ივანამ.

კარელ გოტი ჩეხეთის ერთერთი ყველაზე პოპულარული მომღერალი იყო, მას პოპ-მუსიკის მეფესაც  უწოდებდნენ.

როგორც  ჩეხეთის პრეზიდენტმა აღნიშნა, კარელ გოტის გარდაცვალება მთელი ქვეყნისთვის სევდიანი ამბავია. თაყვანისმცემლები ცნობილ მომღერალთან გამომშვიდობებას  საჯარაო პანაშვიდზე შეძლებენ, დაკრძალვის დღე სახელმწიფო გლოვის დღედ გამოცხადდება.

მომღერალი მწვავე ლეიკემიას 2016 წლიდან ებრძოდა და მკურნალობას პრაღის ერთერთ კლინიკაში გადიოდა.




გარდაიცვალა კომპოზიტორი გია ყანჩელი


Картинки по запросу giya kancheli84 წლის ასაკში ცნობილი კომპოზიტორი გია ყანჩელი გარდაიცვალა. კომპოზიტორი ჯანმრთელობის გაუარესების გამო კლინიკაში იყო გადაყვანილი.

მის შემოქმედებით მემკვიდრეობას განეკუთვნება: ოპერა „და არს მუსიკა“ (1983), 6 სიმფონია, კონცერტი სიმფონიური ორკესტრისათვის(1962); ლარგო და ალლეგრო სიმებიანი ორკესტრის, ფორტეპიანოსა და ლიტავრებისათვის (1963); „სევდა ნათელი“ – ბიჭუნათა გუნდის, ორი სოლისტისა და დიდი სიმფონიური ორკესტრისათვის(1985); მუსიკა სპექტაკლებისთვის: „ხანუმა“, „კავკასიური ცარცის წრე“, „რიჩარდ III“ (შოთა რუსთაველის თეატრის დადგმები); მუსიკა კინოფილმებისთვის: „არ დაიდარდო“, „ქვევრი“, „არაჩვეულებრივი გამოფენა“, „მიმინო“, „შერეკილები“, „რამდენიმე ინტერვიუ პირად საკითხებზე“, „როცა აყვავდა ნუში“ და სხვ.

საქართველოს პრემიერ-მინისტრმა გიორგი გახარიამ კომპოზიტორ გია ყანჩელის გარდაცვალებას გამო მწუხარება გამოთქვა.

„დიდ მწუხარებას გამოვთქვამ უდიდესი ქართველი კომპოზიტორის გია ყანჩელის გარდაცვალების გამო. გენიალური შემოქმედის მუსიკა არა მარტო ქართულ, არამედ მსოფლიოს საგანძურად იქცა. თანავუგრძნობ გია ყანჩელის ოჯახს, ახლობლებს და მთელ საქართველოს,“- ნათქვამია პრემიერ-მინისტრის სამძიმარში.




სოხუმის დაცემიდან 26 წელი გავიდა


Картинки по запросу soxumis dacemaაფხაზეთში სამხედრო დაპირისპირება 13 თვეს და 13 დღეს გაგრძელდა.

1992-1993 წლების დაპირისპირების შედეგად, საქართველომ აფხაზეთის ტერიტორიაზე იურისდიქცია დაკარგა, აფხაზეთმა კი ე.წ. დამოუკიდებლობა მოიპოვა. საერთაშორისო თანამეგობრობამ მოგვიანებით ეს ფაქტი რუსეთის მიერ ოკუპაციად აღიარა.

დილიდან გმირთა მემორიალთან დაღუპულთა ოჯახის წევრები და პოლიტიკოსები იკრიბებიან.

„რა თქმა უნდა, ამის შემდეგ ჩვენც და აფხაზებმაც ბევრი რამ ვისწავლეთ. ჩვენ ბევრი რამ გვაერთიანებს, მათ შორის იმის გაგება და შეგრძნება, რომ ომი იყო ჩვენი ყველაზე დიდი ტრაგედია. ეს არის ფუნდამენტი, რომელზეც შემდგომში ერთიანი სახელმწიფო უნდა ავაშენოთ. მშვიდობა კრიტიკულად მნიშვნელოვანია ქართველებისთვის და აფხაზებისთვის“, – განაცხადა გახარიამ.

ამ დრომდე დაუზუსტებელი მონაცემებით, ომს აფხაზეთში ქართულ მხრიდან 10 ათასზე მეტი ჯარისკაცი და მშვიდობიანი მოქალაქე ემსხვერპლა. აფხაზეთიდან დევნილი 250 000-ზე მეტი ქართველი კი უსახლკაროდ დარჩა. აფხაზური მხარე კი აცხადებს, რომ დაიღუპა 3 500 და დაიჭრა 2 ათასამდე აფხაზი.




საქართველოში პირველი ქორწინების საშუალო ასაკი ქალებისთვის 27 წელი, მამაკაცებისთვის - 30 წელია


Картинки по запросу свадебные кольцаსტატისტიკის ეროვნული სამსახურის მონაცემებით, 2018 წელს პირველი ქორწინების საშუალო ასაკმა ქალებისთვის 27.7, ხოლო მამაკაცებისთვის 30.4 წელი შეადგინა.

ამასთან, საქსტატის ინფორმაციით, გასულ წელს რეგისტრირებული ქორწინებების რაოდენობამ 23 202 შეადგინა, ხოლო რეგისტრირებულ განქორწინებათა რაოდენობამ – 10 288. 2017 წელს რეგისტრირებულ ქორწინებათა რიცხვმა 23 684 შეადგინა, 2016-ში კი, 25 101. საქართველოში ქორწინებებისათვის ყველაზე პოპულარული სეზონი შემოდგომაა, რომელზეც ქორწინებათა 32 პროცენტი მოდის.

აღსანიშნავია, რომ ქორწინების რიცხვის შემცირების პარალელურად, პირველი ქორწინების ასაკი ბოლო წლებში იზრდება. 2016 წელს ქალისთვის პირველი ქორწინების საშუალო ასაკი 27.2 წელი იყო, კაცების კი 30.1; 2017-ში ქალისთვის 27.4, კაცისთვის – 30.2 წელი. 10 წლის წინ, 2008 წლის მონაცემებით, ქალების პირველი ქორწინების საშუალო ასაკი 25 წელი, მამაკაცებისთვის კი 28.8 წელი იყო.




„თბილისობა“ 5-6 ოქტომბერს ოთხ ადგილზე გაიმართება


თბილისიითბილისობა 2019“ 5-6 ოქტომბერს გაიმართება, საზეიმო ღონისძიებები კი ოთხ სხვადასხვა ადგილზე: რიყეზე, ლეღვთახევში, მეტეხის ხიდზე და ორბელიანის მოედანზე ჩატარდება. ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა. 

თბილისის მერმა „თბილისობა 2019“-ის პროგრამით გათვალისწინებული საზეიმო აქტივობები ჩამოთვალა და  დაინტერესებული პირები  ღონისძიებებზე დასასწრებად მიიწვია.

„წელს თბილისობის პროგრამა საკმაოდ დატვირთული და მრავალფეროვანი იქნება. ღონისძიებებს შორის იქნება საბავშვო კონცერტები და ატრაქციონები; კულინარიის, ტკბილეულის და ყვავილების ფესტივალები; ქუჩის კოსტიუმირებული მსვლელობები და სპორტული აქტივობები; ორბელიანის ღია ბაზარი; თბილისთან დაძმობილებული ქალაქების პავილიონები; მუსიკალური წარმოდგენები, თბილისის მერიის „ბიგ ბენდის“ კონცერტი და სხვა. ლეღვთახევში მოეწყობა „მუზეუმი ღია ცის ქვეშ“, სადაც წარმოდგენილი იქნება პროექცია კლდეზე: ქართველი მწერლებისა და საზოგადო მოღვაწეების ვიდეოები, ცნობილი ფერწერული ნამუშევრები და ა.შ. ამ ადგილის დათვალიერებისას ინსტალაციის შესაბამისად შეიცვლება მუსიკა და გამოსახულება. მეტეხის ხიდზე გაიმართება რარიტეტული ავტომანქანების გამოფენა”, – განაცხადა კახა კალაძემ.

მისივე თქმით, თბილისობის ფარგლებში ჩატარდება კიდევ რამდენიმე ღონისძიება, მათ შორის: 5 ოქტომბერს, 20:00 საათზე საპატიო თბილისელების დაჯილდოება და გალაკონცერტი – „მე ვარ თბილისი“.

„6 ოქტომბერს, 20:00 საათზე ვიკრიბებით ევროპის მოედანზე, სადაც დედაქალაქის მერიის მიერ დაფუძნებული თბილისის საერთაშორისო თეატრალური ფესტივალის ფარგლებში წარმოდგენილი იქნება „მუარე“ – ესაა აკრობატების საჰაერო შოუ როკ მუსიკის თანხლებით და ვფიქრობ, ძალიან შთამბეჭდავი სანახაობა გველის წინ. გიწვევთ ყველას, თბილისელებს, დედაქალაქის სტუმრებს, დიდებსა თუ პატარებს და ვფიქრობ, ძალიან მხიარული და სასიამოვნო დღეები გველის წინ“, – განაცხადა დედაქალაქის მერმა.




თამბაქოთი უკანონო ვაჭრობის შემთხვევებით სამეგრელო ლიდერობს


Картинки по запросу გიორგი ბახტურიძესაქართველოში თამბაქოთი უკანონო ვაჭრობის შემთხვევები ძირითადად სამეგრელოს რეგიონში ფიქსირდება, – ამის შესახებ საქართველოს სოციალური კვლევისა და ანალიზის ინსტიტუტის მიერ მომზადებულ ანგარიშშია აღნიშნული. კვლევა თამბაქოს კონტროლის ალიანსის დაკვეთით მომზადდა.

როგორც ორგანიზაციის ხელმძღვანელი გიორგი ბახტურიძე აცხადებს, კვლევა ჩატარდა 2017 და 2018 წლის ნოემბერში, ასევე 2019 წლის აპრილში. მისი თქმით, შეისწავლეს ხუთი რეგიონი – სამეგრელო, სამცხე-ჯავახეთი, შიდა ქართლი, იმერეთი და თბილისი.

„სამეგრელოს გარდა, ყველა რეგიონში ნორმალური მდგომარეობა გვაქვს. გამოკვლევის პირველი ტალღის დროს უკანონო ვაჭრობის შემთხვევები 5 %  იყო, აქედან აბსოლუტური უმრავლესობა უკანონო ნაწარმის, აფხაზურ აქციზიანი იყო.

გამოკვლევის მეორე ტალღის დროს  უკანონო ვაჭრობის  შემთხვევები 14%-მდე  გაიზარდა,  მესამე ტალღაში კი  32%-ს მიაღწია. თუმცა, მთალიანად საქართველოში უკანონო ვაჭრობის შემთხვევები 2-3%-ს არ სცილდება“, – აცხადებს გიორგი ბახტურიძე.

მისი განმარტებით, ჩამოთვლილ რეგიონებში გაზრდილია გასახვევი თამბაქოს მოხმარებაც.

გიორგი ბახტურიძე ამბობს, რომ პარლამენტი უკვე განიხილავს კანონპროექტს თამბაქოს ნედლეულის დაბეგვრის შესახებ და იმედს გამოთქვამს, რომ გადასახადები გასახვევ თამბაქოზეც გაიზრდება.




სამუშაოს მაძიებელთა პროფესიული გადამზადებისთვის რეგისტრაცია 20 სექტემბერს სრულდება


Картинки по запросу jobსოციალური მომსახურების სააგენტო „სამუშაოს მაძიებელთა პროფესიული მომზადება-გადამზადებისა და კვალიფიკაციის ამაღლების სახელმწიფო პროგრამის”  მორიგ ეტაპს იწყებს. რეგისტრაცია 12 სექტემბერს დაიწყო და 20 სექტემბრის ჩათვლით გაგრძელდება. 

სოციალური მომსახურების სააგენტოს ინფორმაციით, პროფესიულ კურსებზე სწავლის მსურველებს სააგენტო ვაუჩერს გადასცემს, რომლის მაქსიმალური ღირებულება  1000 ლარს, შეზღუდული შესაძლებლობების მქონე პირებისთვის კი 1500 ლარს შეადგენს.  მოკლევადიანი კურსები 2-დან 4 თვემდე გრძელდება.

მომზადება-გადამზადების პროგრამები შრომის ბაზრის თვისობრივი კვლევის საფუძველზე შემუშავდა, რომელმაც  41 მოთხოვნადი პროფესია გამოავლინა.  მოთხოვნად პროფესიებს შორისაა: გიდი, კონდიტერი, სასტუმრო საქმის სპეციალისტი,  შემდუღებელი, მცენარეთა დაცვის ტექნიკოსი, ბარმენი, ვებპროგრამისტი, ბაგა-ბაღის აღმზრდელი და სხვ.

პროგრამის სამიზნე ჯგუფს 16 წლის ზემოთ, შრომითი ქმედუნარიანობის მქონე საქართველოს მოქალაქეები, საქართველოში მუდმივი ბინადრობის მქონე მოქალაქეობის არმქონე პირები და ლტოლვილის ან ჰუმანიტარული სტატუსის მქონე პირები წარმოადგენენ.

უწყების ცნობით, მოკლევადიანი კურსების გავლა,  საქართველოს მასშტაბით,  24, როგორც სახელმწიფო ისე კერძო, აკრედიტირებულ პროფესიულ საგანმანათლებლო დაწესებულებაშია  შესაძლებელი.

სამუშაოს მაძიებელმა,  რეგისტრაციისთვის, საცხოვრებელი ადგილის შესაბამისად,  სოციალური მომსახურების სააგენტოს ტერიტორიულ სამსახურს უნდა მიმართოს. სწავლის დასაფინანსებლად  სპეციალურ ვაუჩერებსაც  სააგენტოს ტერიტორიული სამსახურები გასცემენ.

კურსების გავლის მსურველთა სასწავლო პროცესი 25 სექტემბერს   დაიწყება.