“სტრუქტურებში ის ხალხი ზის, თავის თანამდებობრივ მდგომარეობას პირადი ინტერესებისთვის რომ იყენებენ”

ქანთარიასაპარლამენტო უმრავლესობის წევრი ნუკრი ქანთარია სახელმწიფო სტრუქტურების იმ პირებისგან გაწმენდის აუცილებლობაზე საუბრობს, რომლებიც მისი თქმით, ფარულ ჩანაწერებს ავრცელებენ.

ჟურნალისტებთან საუბარში ნუკრი ქანთარია მირზა სუბელიანისა და ვიქტორ ჯაფარიძის შეხვედრას გამოეხმაურა და აღნიშნა, რომ ძნელია იმაზე საუბარი, რამდენად სერიოზულია პატიმრის მონაყოლი, ჩანაწერები ვინ ჩაწერა, როგორ გავრცელდა, წყარო ვინ არის და მას რა მიზნები ამოძრავებდა.

„ეს ყველაფერი ჰარი-ჰარალოზე ვრცელდება, ცუდია და ადგილი აქვს საზოგადოების მოწამვლის მცდელობას. ალბათ, საუბარი იყო, მაგრამ პენიტენციალური სისტემიდან ჩანაწერის გამოტანა როგორ მოხდა და რამდენად სერიოზულია პატიმრის მონაყოლი, ეს შემდგომი თემაა და პროკურატურამ უნდა იმუშაოს. ამ საკითხით პროკურატურა უნდა დაინტერესდეს და გაერკვეს.

არ ვიტყვი იმას, რომ ვინმე „ქართულ ოცნებაში“ შემომძვრალია, რომელსაც მადა გაეხსნა, კორუფციაში წილი არ აქვს ან ხელი არ აქვს ჩაყოფილი, ან კანონგარეშე ქმედებების სურვილი არ აქვს. დარწმუნებული ვარ, ასეთი შემომძვრალი პენიტენციალურ სისტემაში პირდაპირ გაძვრება. ჩვენი პრობლემაა, რომ სტრუქტურებში ის ხალხი ზის, რომლებიც როგორც ჩანს, თავის თანამდებობრივ მდგომარეობას იყენებენ არა სასურველად ქვეყნისთვის, არამედ პირადი ინტერესებისთვის და ამისთვის შემოსავლის სახით რას იღებენ, ეს ცალკე ამბავია.

ჩვენს მიერ ყველაფერი გაირკვევა და ამ საქმის დავიწყება არ მოხდება. წინა საარჩევნოდ ბოლო გაბრძოლებებია და მაყურებელი პორციების აღქმას ვერ ასწრებს. ეს ყველაფერი ავტორებს უკან დაუბრუნდებათ. როგორც ჩანს, ასეთმა ხალხმა გარკვეულ სტრუქტურებში თავი მოიყარა და უნდა გაიწმინდოს. შორს ვარ აზრისგან, რომ „ქართულ ოცნებაში“ სულ ანგელოზებმა მოიყარეს თავი და ვინც კი ასეთი ვნებებით შეპყრობილია, ყველა გამოსააშკარავებელია. უნდათ, რომ ეს ყველაფერი სისტემურად ბიძინას შეასაღონ, რაც გამორიცხულია”, – განაცხადა ქანთარიამ.

„რუსთავი 2“-მა გუშინ აუდიოჩანაწერი გაავრცელა, რომელიც, ამავე ტელეკომპანიის მტკიცებით, გლდანის N8 სასჯელაღსრულების დაწესებულებაში, მირზა სუბელიანის საკანშია გაკეთებული.

საქართველოს მთავარ პროკურატურაში აცხადებენ, რომ აუდიოჩანაწერზე, რომელშიც სავარაუდოდ მირზა სუბელიანი ფიგურირებს, გამოძიება 12 ოქტომბერს დაიწყო. მათივე ცნობით, გამოძიება მიმდინარეობს პირადი ცხოვრების საიდუმლოს უკანონოდ მოპოვებისა და შენახვის, იძულების, პატიმრობაში მყოფი პირის კერძო საუბრის უნებართვო ჩაწერის, უკანონოდ შენახვის, ხელმისაწვდომობის უზრუნველყოფისა და სამსახურებრივი უფლებამოსილების გადამეტების შესაძლო ფაქტებზე.

 

image_pdfimage_print

Comments

comments