“ოპოზიციის გეგმას განხორციელება არ უწერია, ვითარება განსხვავდება იმისგან, როცა ესენი ქვეყნის არევას ახერხებდნენ“

volski, ვოლსკიპარლამენტის პირველი ვიცე-სპიკერის, გია ვოლსკის  თქმით, ოპოზიციას მოლაპარაკებები არ უნდა, რადგან იძულებული იქნებიან, უარგუმენტო პოზიციით რევოლუციაზე, დესტრუქციასა და მავნებლობაზე ლაპარაკით შემოიფარგლონ საერთაშორისო პარტნიორებთან.

„პრაქტიკულად, ოპონენტების დიდ ჯგუფს სათქმელი არ აქვს და კომისიის შექმნაც არ უნდათ, რათა ის ეჭვები გავაქარწყლოთ, ვითომდა საზოგადოების გარკვეულ ნაწილს გააჩნია. რეალურად, იმ სცენარის გამეორება უნდათ, რაც 2003 წელს იყო, მაგრამ იმ პერიოდსა და დღევანდელ პერიოდს შორის განსხვავება არის ძალიან დიდი. მოლაპარაკებები არ უნდათ, რადგან იძულებული იქნებიან, უარგუმენტო პოზიციით რევოლუციაზე, დესტრუქციაზე, მავნებლობაზე ლაპარაკით შემოიფარგლონ ჩვენს საერთაშორისო პარტნიორებთან და ეს სერიოზულ დარტყმას მიაყენებს მათ სტრატეგიულ გეგმას, რომ არეულობა მოაწყონ.

თუ მაშინ, 2003 წელს, ამისთვის წინაპირობა იყო და მართლაც სუსტი ქვეყანა, განუკითხაობა დათვლის სისტემაში, ახლა უნდათ ისარგებლონ, იმავე მიზეზით, მაგრამ საფუძვლად ის მდგომარეობა, რაც შეგვიქმნა პანდემიამ ადამიანის ჯანმრთელობის ხაზით და ეკონომიკური პრობლემების გამოყენებით, რაც მთელ მსოფლიოს, მათ შორის საქართველოს შეექმნა. მათ გეგმას განხორციელება არ უწერია, რადგან საზოგადოება კარგად ხედავს, საითკენ მიდის მათი გეგმები და მოსაზრებები. რეალურად, სახელმწიფოში ვითარება განსხვავდება იმისგან, როცა ესენი ახერხებდნენ ქვეყნის არევას“, – განაცხადა გია ვოლსკიმ.

ვიცე-სპიკერი ასევე გამოეხმაურა  ირაკლი ოქრუაშვილის დღევანდელ განცხადებას, რომელმაც თქვა, რომ „არ იქნება მშვიდობა, თუ არ იქნება რიგგარეშე არჩევნები“.

„ხეპრული გამოთქმაა ლეგიტიმური რევოლუცია. არანაირი არგუმენტი არ დარჩათ განსაკუთრებით მას შემდეგ, რაც „სამართლიანი არჩევნების” დასკვნა გახდა ცნობილი. მიუხედავად იმისა, რომ მსოფლიოში რთული მდგომარეობა და სერიოზული საფრთხეებია, დესტრუქციასა და დესტაბილიზაციას არანაირი მხარდაჭერა არ ექნება არც საზოგადოებისგან და არც ეს ის სახელმწიფოა, როცა ამ რევოლუციური გეგმების აღსრულებას ახერხებდნენ.

არის მეორე მიმართულებაც, რომელმაც სამწუხაროდ, ხელი უნდა შეუწყოს ამ რევოლუციური მოსაზრებების განვითარებას, ეს არის მედიასაშუალებების მობილიზება იმისათვის, რათა საზოგადოების თვალში დაამცირონ უმრავლესობის წარმომადგენლები. დღეს კონკრეტული ტელევიზია პარლამენტის ერთ-ერთ წევრს სახლში შეუვარდა, რათა შეურაცხყოფა მიაყენოს და ამის ფონზე განავითაროს თავისი პროპაგანდისტული სტრატეგია. ეს არის უსუსური მცდელობები, მაგრამ არის შეურაცხმყოფელი საზოგადოებისთვის და დემოკრატიული სახელმწიფოსთვის შეუფერებელი“, – აღნიშნა გია ვოლსკიმ.

image_pdfimage_print

Comments

comments