თბილისის მერმა კახა კალაძემ ვიცე-მერს, ირაკლი ხმალაძეს, ისტორიულ უბნებში მდებარე ავარიული შენობა-ნაგებობების პრობლემის მოგვარების მიზნით, პროგრამის შექმნა დაავალა.
კახა კალაძის თქმით, სხვა უბნებში უკვე მიმდინარეობს ავარიული სახლების ჩანაცვლების პროგრამა, თუმცა საჭიროა, შემუშავდეს მიდგომა ისტორიულ არეალებში მდებარე ავარიული შენობა- ნაგებობებისთვის.
„დედაქალაქში 10 000-მდე შენობა-ნაგებობა გვაქვს სხვადასხვა კატეგორიის ავარიულობის ხარისხით. როგორც მოგეხსენებათ, კიდევ ერთი მნიშვნელოვანი პროგრამა, რომლის ინიცირება ასევე ჩემი საარჩევნო კამპანიის ფარგლებში მოხდა, არის ავარიული საცხოვრებელი სახლების ჩანაცვლების პროგრამა. ამ პროგრამის განხორციელება 2022 წლიდან დავიწყეთ. დაწყებულია ერთი საპილოტე პროექტის განხორციელება. მიმდინარეობს სამშენებლო სამუშაოები. ამავე დროს 25 საცხოვრებელ კორპუსზე მიმდინარეობს მოკვლევა სხვადასხვა ეტაპზე.
ზოგ პროექტზე მიმდინარეობს სამშენებლო ნებართვის პროცედურები, ზოგან მზადდება პროექტი, თუმცა გვაქვს ერთი პრობლემა: ავარიული სახლების ჩანაცვლება არ არის გათვალისწინებული ისტორიულ უბნებში. ვინაიდან ამ უბნებში განაშენიანების პარამეტრები მკაცრად არის შეზღუდული, ამ არეალებში წესიდან გამონაკლისია დადგენილი. ის მიდგომები, რაც გვაქვს სხვადასხვა უბანში, რაიონში, ჩვეულებრივ სივრცეებში, ისტორიულ უბნებში არ გამოიყენება“, – განაცხადა კახა კალაძემ.
დედაქალაქის მერმა ვიცე-მერს აღნიშნულ პროცესში თბილისის საკრებულოს მაჟორიტარი დეპუტატებისა და გამგეობების ჩართვა სთხოვა.
„დავდოთ კონკრეტული პროგრამა, თუ როგორ შეიძლება ამ პრობლემის მოგვარება. ძალიან ბევრი წერილი შემოდის მუნიციპალიტეტში იმასთან დაკავშირებით, რომ ისტორიულ უბნებში ავარიული საცხოვრებელი შენობა-ნაგებობების რეაბილიტაციას ადგილობრივი მცხოვრებლები ვერ ახერხებენ და მოგვმართავენ ჩვენ. ცხადია, მუნიციპალიტეტი ყველა ავარიული სახლის განახლება-რეაბილიტაციას ვერ შეძლებს, იმიტომ, რომ ძალიან დიდი რაოდენობაა. ამიტომ, აუცილებელია, შეიქმნას კონკრეტული პროგრამა, სადაც ბიზნესის ჩართულობით შესაძლებელი იქნება აღნიშნული ცვლილებების განხორციელება – ამ სივრცეების მოწესრიგება და რეაბილიტაცია.
მესმის, რომ ეს საცხოვრებელი სახლები არის კერძო საკუთრება, მაგრამ ყველას არ აქვს შესაძლებლობა, უზრუნველყოს საკუთარი უძრავი ქონების კაპიტალური რეაბილიტაცია-რესტავრაცია და მოწესრიგება. ამიტომ გავალებთ, რომ მუნიციპალიტეტმა გარკვეული პროგრამა შექმნას, რომელიც ხელს შეუწყობს ამ ადამიანებს, მერიასთან თანამშრომლობით და კოორდინაციით გაიუმჯობესონ საცხოვრებელი გარემო“, – განაცხადა კახა კალაძემ.
სოლოლაკი, ვერა, მთაწმინდა, ორთაჭალა, კრწანისი, მეიდანი, ავლაბარი, ჩუღურეთი, – ეს თბილისის იმ უბნების ჩამონათვალია, სადაც შენობების გადარჩენას ზოგჯერ, კულტურული მემკვიდრეობის სტატუსიც ვეღარ შველის, სახლების უმეტესობა გამაგრებას აღარ ექვემდებარება და მათი ბედი დროზეა მინდობილი. უამრავ ავარიულ სახლში, საკუთარი სიცოცხლის ფასად ცხოვრობენ ადამიანები.
როგორც მედია სააგენტო “24”-ს არქიტექტორმა ზურაბ კუხალაშვილმა განუმარტა, ავლაბარში შენობების ავარიულობის მთავარი მიზეზი, პრეზიდენტის რეზიდენციიდან ბარათაშვილის დაღმართამდე არსებული მიწისქვეშა კომუნიკაციების სიძველეა. ძველი მილებიდან წყალი მუდმივად ჟონავს, ამას ემატება წვიმის წყლები, რომლებიც ჩაედინება ეზოების წყალსაწრეტებში და ნაწილობრივ მიწა იწოვს, შედეგად სახლების საძირკველი ირეცხება და სახლის საყრდენი კედლები დეფორმირდება.
ქალაქის ძველი იერსახით აღდგენა ინვესტორისთვის არამომგებიანია, მაღალსართულიანი შენობების დადგმა კი ძველ ქუჩებს უნიკალურობას დაუკარგავს.
მხოლოდ თბილისი ყოველწლიურად რამდენიმე მილიონ ლარს ხარჯავს ავარიული სახლების მცხოვრებლების ბინის ქირაზე. ქალაქის ბიუჯეტის დაახლოებით 20% იხარჯება ინფრასტრუქტურის ობიექტების მშენებლობასა და ავარიული შენობების გამაგრებაზე. ერთიანი ბაზისთვის სახლების პასპორტიზაცია, ინვენტარიზაცია, ერთ საძებნ სისტემაში მოქცევა შრომატევადი და ხანგრძლივი საქმეა, რასაც წლები, ბევრი სხვადასხვა სპეციალობის კვალიფიციური ხალხის შრომა და პოლიტიკური ნება სჭირდება.
